Փաստ ինֆո

ՀՀ էկոնոմիկայի նախարար Արծվիկ Մինասյանը խոստանում է հաջորդ շաբաթ ներկայացնել մենաշնորհների վերաբերյալ զեկույցը:

Կառավարության նիստից հետո լրագրողների հարցին, թե կոնկրետ անձանց անուններ կհնչե՞ն, Մինասյանն ասաց. «Կլինեն, ինչպես խոստացել եմ, այն բոլոր տվյալները, որոնք մենաշնորհային ոլորտներում կան: Թեև դրանք օրենքով մենաշնորհ չեն համարվում, բայց փաստացի ընկալումն այդպիսին է, նաև այդ ոլորտներում մեզ հասանելի տեղեկատվության շրջանակում կհրապարակենք կազմակերպությունների անվանումները, որոնք ունեն գերիշխող դիրք կամ կենտրոնացվածության բարձր աստիճան, կամ խաթարում են մրցակցությունը»: 

Մինասյանը նշեց, որ առանձնացրել են այն 10 հիմնական ապրանքատեսակները, որոնք հանրության ու լրագրողների շրջանում աﬔնապահանջվածն են, որոնք մենաշնորհային ոլորտներ են դիտարկվում հանրության և մասնագիտական     շրջանակների կողմից՝ կարագը, ալյուրը, ցորենը, շաքարավազը, արևածաղկի յուղը, հավի միսը, նարինջը, բանանը, բենզինը և դիզելային վառելիքը: Մշակվել է այս ապրանքների ներկրման համար պահանջվող փաստաթղթերի հուշաթերթ, իսկ եթե դրանից դուրս որևէ մարմին, ներառյալ Պետական եկամուտների կոմիտեն, կպահանջի այլ փաստաթուղթ, սա հիմք կլինի, որպեսզի առարկություն ներկայացվի:

«Իսկ արդեն հաջորդ շաբաթ, երբ կներկայացվի վարչապետի հանձնարարականի կատարման արդյունքը, դուք այնտեղ կտեսենք նաև երկարաժամկետ ու կարճաժամկետ լուծումներ, որոնք լինելու են շատ ավելի հիմնավոր ու ամբողջական»,- «Արմենպրես»-ի փոխանցմամբ՝ խոստացավ նախարարը:

Հարցին՝ գազի և էլեկտրաէներգիայի ոլորտում առկա ﬔնաշնորհը վերացվելո՞ւ է, Մինասյանը պատասխանեց, որ այդ  ոլորտներում բնական մենաշնորհ է:

Էկոնոմիկայի նախարարի համոզմամբ՝ սահմանադրական նոր կարգավորումներին համապատասխան պետք է իրականացվի ամբողջական վերանայում բոլոր ուղղություններով:

«Փոխանակ մենք բոլորս կարողանանք միավորվել և այդ քաղաքականությունը կյանքի կոչել, հենց մի լավ բան է փորձ արվում անել, սկսում եք քննադատել, թե նախկինում ինչո՞ւ չէր արվում»,- ասաց Մինասյանը:

Աղբյուր` Փաստինֆո