Փաստ ինֆո

Տուժող Փայլակ Հայրապետյանի ու նրա ներկայացուցիչների միջնորդությամբ «Օֆշորի գործով» այսօրվա դատական նիստում հարցաքննվեցին ՀՀ ֆինանսների նախարարությունը ներկայացնող երկու վկաներ:

Վկաները գործի նախաքննության ընթացքում քննիչի որոշմամբ ստուգումներ էին անցկացրել «Ձորաղբյուր» արտադրական կոոպերատիվում (որի նախագահը գործով միակ ամբաստանյալ, առանձնապես խոշոր չափերով հանցավոր ճանապարհով ստացված եկամուտներն օրինականացնելու, առանձնապես խոշոր չափերի խարդախության և առանձնապես խոշոր չափերով հարկերը վճարելուց չարամտորեն խուսափելու մեջ մեղադրվող Աշոտ Սուքիասյանն է) և կազմել համապատասխան տեղեկանք:

Բիզնես ծրագրին համապատասխա՞ն են ծախսվել վարկային գումարները, արդյոք դրանք ոչ նպատակայի՞ն են ծախսվել, քանի որ, ըստ տուժող կողմի, վարկային գումարներով ձեռք են բերվել ոսկու ձուլակտորներ, այլ բանկերում ունեցած վարկային գումարներ վճարվել, և շատ այլ հարցերի վերաբերյալ երկու վկաներն էլ հայտարարեցին, որ չեն կարող դրանց պատասխանել:

Ըստ նրանց՝ փաստաթղթերն իրենց լիարժեք չեն տրամադրվել, դրա համար իրենք կոոպերատիվի ֆինանսատնտեսական գործունեությունը չեն ուսումնասիրել, պարզապես ֆիքսել են բանկային հաշիվների գումարների շարժը: Կոոպերատիվի կողմից փաստաթղթերը թերի են ներկայացվել, նշեց վկաներից մեկը՝ կար ծրագրային խնդիր, իսկ տարբեր տարիների փաստաթղթեր պարզապես բացակայում էին:

Այսօրվա դատական նիստի մասին ծանուցվել էր նաև դատահաշվապահական փորձաքննություն կատարած փորձագետը, սակայն դատարանին անհայտ պատճառով չէր ներկայացել դատական նիստին: Դատարանը որոշեց նրան մեկ անգամ ևս ծանուցել:

Աղբյուր` Փաստինֆո