Փաստ ինֆո

«Ինչքան լայն կոնսենսուս, այդքան ավելի լավ, այդքան ավելի վստահելի կլինի Ընտրական օրենսգիրքը»,- Ազգային ժողովի այսօրվա արտահերթ նիստում, ԸՕ օրենսդրական փաթեթի վերջնական ընթերցմամբ ընդունումից առաջ, ասաց հիմնական զեկուցող՝ ՀՀ կառավարության աշխատակազմի ղեկավար-նախարար Դավիթ Հարությունյանը՝ արձագանքելով ՀԱԿ խմբակցության ղեկավար Լևոն Զուրաբյանի հայտարարությանը:

Ընդդիմադիր պատգամավորը, մասնավորապես, նշել էր, թե այս տեսքով օրինագծին դեմ են քվեարկում՝ ըմբռնումով, որ լայն կոնսենսուսի հասնելու շուրջ պայմանավորվածությունը կյանքի կկոչվի, և դրան հասնելու դեպքում ԸՕ-ում կարվեն համապատասխան փոփոխություններ:

«Մենք թեև այսօր ներկայացնում ենք Ընտրական օրենսգիրքը, բայց նաև այսօր պատրաստ ենք մեկ անգամ ևս վերահաստատելու մեր հայտարարությունը, որը տեղի ունեցավ երկրորդ ընթերցման ժամանակ, որ եթե անգամ հունիսի 1-ից հետո մեզ հաջողվի գտնել փոխադարձ ընդունելի այնպիսի մեխանիզմներ, որ էլ ավելի կուժեղացնեն Ընտրական օրենսգիրքը, որոնք կլինեն իրատեսական, մենք իսկապես պատրաստ կլինենք հրավիրելու նաև արտահերթ նստաշրջան կամ նիստ, կախված թե դա երբ տեղի կունենա, և ներկայացնելու առաջարկություններ Ընտրական օրենսգրքում փոփոխություններ կատարելու համար»,-հայտարարեց Դ.Հարությունյանը:

Նա վստահեցրեց նաև, որ իրենք այդ ժամանակ կաշխատեն օգտագործել առիթը և անդրադառնալ այն առաջարկություններին, որոնք ներկայացվել են սահմանված ժամկետից ուշ և այդ իսկ պատճառով հնարավորություն չի եղել դրանց անդրադառնալու, կաշխատեն այդ առաջարկությունները ևս դարձնել քննարկման առարկա:

«Հուսով եմ, որ քննարկումները և համատեղ աշխատանքը շարունակելու մեր առաջարկությունն անպատասխան չի մնա»,-ասաց նախարարը՝ հավելելով, թե դատելով Լ. Զուրաբյանի հայտարարությունից, ինքը հասկացավ, որ իրենց առաջարկությունն անպատասխան չի մնա:

Ինչ վերաբերում է այսօր երրորդ ընթերցմամբ և ամբողջությամբ ընդունված Ընտրական օրենսգրքի նախագծին, ապա, ինչպես հայտնեց Դ.Հարությունյանը, նախագծում երկրորդ ընթերցումից հետո տեղի են ունեցել խմբագրական փոփոխություններ, շտկումներ, վրիպակների ուղղումներ, որոշակի հոդվածային մասերի տեղաշարժեր, որպեսզի շարադրանքն ավելի կոռեկտ լինի, որոշ նախադասություններ վերաշարադրվել են:

Ըստ Դ.Հարությունյանի՝ ԲՀԿ-ի առաջարկի հիման վրա մի շատ կարևոր տող է ավելացվել, երբ ընտրությունների ավարտին արդյունքների ամփոփման ժամանակ լրացուցիչ մի տվյալ պետք է հրապարակվի, որպեսզի պարզ լինի, թե որ դեպքերում էլեկտրոնային գրանցման սարքն «ավտոմատ կերպով ճանաչել է անձը հաստատող փաստաթղթի տվյալները, այսինքն՝ ինքնաշխատ եղանակով է աշխատել, և որ դեպքերում սարքը չի կարողացել ճանաչել տվյալները, և ձեռքով է մուտքագրվել»:

Լուսանկարը՝ Ֆոտոլուրի

Աղբյուր` Փաստինֆո