Փաստ ինֆո

Ապօրինի կերպով ձեռք բերված «ԱԿ» տեսակի ինքնաձիգից Վ.Ասոյանի սպանության մեջ մեղադրվող Գագիկ Ղանդիլյանը կենթարկվի դատահոգեբուժական և դատահոգեբանական ստացիոնար համալիր փորձաքննության: Այսօր այսպիսի որոշում կայացրեց դատարանը՝ բավարարելով ամբաստանյալի պաշտպան Սարգիս Խաչատրյանի միջնորդությունը:

Ըստ պաշտպանի, դեռևս նախաքննության ընթացքում քրեակատարողական հիմնարկում այցելելով իր պաշտպանյալին՝ նրա պահվածքում տարօրինակություններ է նկատել: Ըստ նրա` ամբաստանյալը որոշակի հոգեկան խնդիրներ ունի: Ինչպե՞ս կարելի է մարդ սպանել 5-6 տարի առաջ հնչած հայհոյանքների համար, հարց տվեց պաշտպանը: Ըստ նրա, հոգեկան հիվանդության մասին է վկայում նաև այն, որ ամբաստանյալը քրեակատարողական հիմնարկում փորձել է ինքնասպանություն գործել:

Պաշտպանը միջնորդեց փորձագետներին ուղղել, մասնավորապես, հետևյալ հարցերը՝ արդյոք ամբաստանյալը 2015թ. հուլիսի 6-ին, այն է՝ սպանության օրը, տառապե՞լ է հոգեկան հիվանդությամբ, եթե այո՝ դա կարո՞ղ էր զրկել նրան իր գործողությունների համար հաշիվ տալու ու դրանք ղեկավարելու ունակությունից, արդյոք ամբաստանյալը մեղսունա՞կ է, սահմանափա՞կ մեղսունակ, թե՞ անմեղսունակ, բժշկական հարկադիր միջոցների կարիք կա՞, թե՞ ոչ, կարո՞ղ է մասնակցել դատավարական գործողություններին ու դատական նիստերին, թե՞ ոչ:

Մեղադրողն առարկեց միջնորդության դեմ՝ հայտնելով, որ որպես կասկածյալ հարցաքննվելիս Գ.Ղանդիլյանը հայտարարել է, որ ֆիզիկապես ու հոգեպես առողջ է, և որ գիտակցել է, թե ինչ գործողություններ է կատարում: Ըստ մեղադրողի, ամբաստանյալի լարված, ջղագրգիռ վիճակը նրա անազատության մեջ գտնվելով է պայմանավորված: Դատախազը նշեց նաև, որ ինքնասպանության փորձի վերաբերյալ նյութեր են նախապատրաստվել, կրկին չի նշվել հոգեկան հիվանդության առկայության մասին: Ինքնասպանության փորձը պայմանավորվել է ստեղծված իրավիճակով, ինչպես նաև երկարատև ազատազրկման հեռանկարով: Ըստ մեղադրողի, միջնորդությունը դատաքննությունը ձգձգելու ու պատասխանատվությունից խույս տալու նպատակ ունի:

Տուժողի իրավահաջորդի ներկայացուցիչ, փաստաբան Սեդա Սաֆարյանը նշեց, որ համամիտ է մեղադրողի փաստարկների հետ և որ փորձաքննություն նշանակելու անհրաժեշտություն չկա:

Դատարանը, սակայն, գտավ, որ պաշտպանի միջնորդությունը հիմնավոր է ու ենթակա բավարարման: Ըստ դատարանի, 5 տարի առաջ սեռական բնույթի հայհոյանքների համար սպանություն կատարելու դրդապատճառն անտրամաբանական է: Դատարանը գտավ, որ փորձաքննությունն անհրաժեշտ է՝ պարզելու համար հոգեկան հիվանդության առկայության կամ սիմուլյացիայի հանգամանքը:

Դատարանի որոշմամբ փորձագետներին, մասնավորապես, պետք է առաջադրվեն հետևյալ հարցերը՝ ամբաստանյալը տառապե՞լ կամ տառապո՞ւմ է հոգեկան հիվանդությամբ, եթե այո՝ ինչպիսի՞ հիվանդությամբ, զրկվա՞ծ է իր գործողությունների համար հաշիվ տալու ու դրանք ղեկավարելու ունակությունից, թե՞ ոչ, կարո՞ղ է մասնակցել դատավարական գործողություններին ու դատական նիստերին, հանցանքը կատարելու պահին մեղսունակ եղե՞լ է, բժշկական հարկադրանքի միջոցների կարիք կա՞, եթե այո՝ ինչպիսի՞ միջոցների, շրջապատի ու իր համար վտանգ ներկայացնո՞ւմ է, թե ո՞չ:

Դատաքննությունն անորոշ ժամանակով հետաձգվեց, նիստի օրվա մասին դատավարության մասնակիցները կտեղեկացվեն լրացուցիչ:

Աղբյուր` Փաստինֆո