Փաստ ինֆո

Աժ պատգամավոր Գուրգեն Արսենյանի թիկնապահ Ավետիս Գալստյանի նկատմամբ սպանության փորձի ու խուլիգանության վերաբերյալ գործով այսօրվա դատական նիստում ամբաստանյալներից մեկը՝ Գարիկ Բաբախանյանը, փորձել է վնասել ինքն իրեն, ուղեկցողները թույլ չեն տվել:
Մյուս ամբաստանյալներն էլ են խառնվել, սկսվել է ահավոր քաշքշոց, և դատական նիստը հետաձգվել է:

«Փաստինֆո»-ի տեղեկություններով, հիշյալ ամբաստանյալի ինքնավնասման փորձը պայմանավորված էր դատական նիստերի հետաձգումներով՝ արդեն երրորդ նիստն է, ինչ դատական նիստերն հետաձգվում են:

Այսօրվա դատական նիստում ևս տուժողը դիմում էր ներկայացրել դատարանին՝ հայտնելով, որ ցանկանում է փաստաբան ներգրավել գործում և խնդրել էր նիստը հետաձգել:

Ըստ մամուլի հրապարակումների, Աժ պատգամավոր Գուրգեն Արսենյանի թիկնապահը դանակահարվել էր անցյալ տարվա սեպտեմբերի 19-ին՝ առավոտյան 7-ի սահմաններում, Երևանի Մաշտոցի պողոտայում տեղի ունեցած ծեծկռտուքի ընթացքում:

«Փաստինֆո»-ի հետ զրույցում ամբաստանյալ Գարիկ Բաբախանյանի պաշտպան, փաստաբան Վարդան Զուռնաչյանը հայտնեց, որ իր պաշտպանյալը չի ընդունում իրեն առաջադրված՝ մի խումբ անձանց ու կազմակերպված խմբի կողմից կատարված խուլիգանության ու կողոպուտի երկու դրվագով մեղադրանքը: Գ.Բաբախանյանը, ըստ պաշտպանի, խուլիգանություն չի արել, փորձել է բաժանել, իսկ կողոպուտի դրվագներով ընդհանրապես այնտեղ չի եղել:

Լուսանկարը՝ Armlur.am-ի

Աղբյուր` Փաստինֆո