Փաստ ինֆո

Երրորդմասցի Լյովիկի ու նրա ընկերների սպանության գործով վկան մահացել է: Վերջինս, ոչ ավել ոչ պակաս, օրեր առաջ մայրաքաղաքում իր իսկ կողմից կատարված ավազակային հարձակման ժամանակ է մահացել:

Պարզվում է, որ այս գործով մահացած վկա Հրաչյա Ֆալանջյանը նույն անձն է, ով մայիսի 13-ին Շենգավիթ վարչական շրջանի Դոդոխյան փողոցի 24-րդ տան վրա մեկ այլ անձի հետ ավազակային հարձակում էին կատարել, վերջիններս ատրճանակի ու դանակի սպառնալիքներով հարձակվել էին այդ պահին տանը գտնվող 5 անձանց վրա և փորձել գումար հափշտակել։

Սակայն տան բնակիչները դիմադրություն էին ցույց տվել և վնասազերծել տուն մուտք գործած անձանց, որոնցից մեկը՝ Ֆալանջյանը ոստիկանության աշխատակից էր և մեր տեղեկություններով գտնվում էր կադրերի ռեզերվում:

Այս դեպքով ավազակային հարձակում կատարած մյուս անձը, ինչպես նաև ընտանիքի անդամներից 3-ը դեպքից հետո ստացած մարմնական վնասվածքներով տեղափոխվել են հիվանդանոց։

Դատարանը՝ դատավոր Արտուշ Գաբրիելյանի նախագահությամբ կողմերին տեղեկացրեց, որ դատակոչված և ծանուցված 7 վկաներից ոչ մեկը չի ներկայացել դատարան, սակայն գրություն էր ստացվել, որ նրանցից երկուսը գտնվում են Լեռնային Ղարաբաղի Հանրապետությունում, մեկը հիվանդ է, մյուսը մահացած վկա Ֆալանջյանն էր:

Վկաների դատարան չներկայանալու վերաբերյալ նիստը նախագահող դատավորը նաև տեղեկացրեց, որ մինչև նիստի օրը նրանք հեռախոսակապով հասանելի են լինում, իսկ նիստի օրը դառնում են անհասանելի:

Ավազակային հարձակում գործած անձինք վնասազերծվել են տան բնակիչների կողմից. մեկը մահացել է, մյուսը՝ վիրավորվել

Նշենք, որ նախորդ նիստին ծանուցված վկաները կրկին չէին ներկայացել:

Մեղադրող դատախազները միջնորդեցին դատարան չներկայացող վկաների նկատմամբ բերման որոշում կայացնել, սակայն պաշտպանական կողմը՝ փաստաբան Լուսինե Սահակյանը գտավ, որ աընդունելի է այս փուլում նրանց բերման ենթարկել: Նա կարծիք հայտնեց, որ կարելի է ծանուցել այլ վկաների և միայն վկաների հարցաքննության ավարտին բերման որոշում կայացնել այն վկաների նկատմամբ, ովքեր չեն ներկայանում:

Այսպիսով, դատարանը որոշեց ծանուցված 7 վկաներից 3-ի նկատմամբ բերման ենթարկելու որոշում կայացնել, իսկ մյուսներին կրկին ծանուցել, կծանուցվեն նաև ևս 5 վկա:

Այսօրվա դատական նիստը հետաձգվեց և նշանակվեց մայիսի 31-ին:

Ըստ մեղադրանքի՝ 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նշենք նաև, որ բոլոր երեք ամբաստանյալները «Գաստիկ»-ը՝ Վահան Հակոբյանը, «Տլե»-ն՝ Սարգիս Հախանումյանն ու «Ծգլ»-ը՝ Սարգիս Գրիգորյանը առաջադրված մեղադրանքում իրենց մեղավոր չեն ճանաչում:

Աղբյուր` Փաստինֆո