Փաստ ինֆո

Գերմանիայի Բունդեսթագում հունիսի 2-ին քննարկվելիք՝ Քրիստոնեա-դեմոկրատական, Սոցիալ-դեմոկրատական և Կանաչների խմբակցությունների կողմից համատեղ մշակված բանաձևում կդատապարտվեն Օսմանյան կայսրությունում հայ ժողովրդի և այլ քրիստոնյա փոքրամասնությունների նկատմամբ կատարված տեղահանումները, ջարդերն ու բռնությունները:

Այս մասին ՀՀ Ազգային ժողովում ասաց Բունդեսթագի փոխնախագահ Էդելգարդ Բուլմահնը՝ լրագրողների համար հանդես գալով հայտարարությամբ:

«Մենք կարծում ենք, որ առաջին հերթին կարևոր է մշտարթուն պահել հիշողությունը, ուստի՝ այս բանաձևի մեջ հիշատակելու և ոգեկոչելու ենք Հայոց ցեղասպանության զոհերին:

Այս բանաձևի մեջ մենք նաև դատապարտելու ենք այն տխրահռչակ դերը, որն ունեցել է Գերմանական կայսրությունը՝ լինելով այն ժամանակ Օսմանյան Թուրքիայի գլխավոր դաշնակիցը, այն, որ Գերմանական կայսրությունը չի կանխել այն ոճրագործությունը»,-ընդգծեց Գերմանիայի Բունդեսթագի փոխնախագահը:

Ըստ նրա՝ այն փաստաթղթերը, որ գերմանական կառավարությունը հրապարակեց 1998թ.-ին, ցույց են տալիս, որ ժամանակին Գերմանիայի կառավարությունը, իր դիվանագիտական աղբյուրներով, տեղյակ է եղել Օսմանյան կայսրությունում տեղի ունեցած իրադարձությունների մասին:

Այդ պատճառով բանաձևում անդրադարձ է կատարվում նաև Հայոց ցեղասպանության մեջ Գերմանիայի մեղսակցությանը, և Գերմանիան այս բանաձևի շարադրանքով փաստորեն ստանձնում է իր պատմական պատասխանատվությունը՝ առերեսվելու պատմությանը:

Նա նշեց նաև, որ 1980-ականներից մինչև 1990-ական թվականները Գերմանիայի կառավարությունը, գերմանացի ժողովուրդը բազմաթիվ հուշարձաններ և հուշահամալիրներ կանգնեցնելով, փորձել են վառ պահել Հոլոքոստի զոհերի հիշատակը և դրանով նաև վառ պահել համագերմանական պատասխանատվությունը կատարված ցեղասպանության նկատմամբ:

Տիկին Բուլմահնը նշեց, թե պատմությանն առերեսվելու այդ մեծ գործընթացի շրջանակում գերմանացի ժողովուրդն իր համար որոշել է մի բան, այն է՝ անմիջական մեղսակցությունը, որ իր ազգը կատարել է հրեա ժողովրդի հանդեպ, և այն համաժողովրդական պատասխանատվությունը, որը պետք է փոխանցվի սերունդներին և մշտապես վառ պահվի նրանց հիշողության մեջ:

«Քննադատական մոտեցմամբ պատմությանն առերեսվելը կարող է միայն հաջողություն ունենալ այն դեպքում, եթե հստակ բաժանվի անմիջական մեղսակցությունը և հետագա սերունդների կողմից պատասխանատվության զգացումը: Միայն այս դեպքում կարելի է հասնել հիշողության մշակույթի հաստատմանը»,-ընդգծեց նա:

Բունդեսթագի փոխնախագահը նշեց նաև, որ Թուրքիայում ավելանում է այն մարդկանց թիվը, ովքեր համարձակորեն առերեսվում են իրենց պատմության հետ և քննադատական վերաբերմունք են ցուցադրում այն ժամանակ Օսմանյան կայսրության կողմից վարած քաղաքականությանը:

«Հաշվի առնելով նաև մեր պատմության մութ էջերը և մեր պատմական փորձառությունը, մենք ցանկանում ենք նաև պատասխանատվություն ստանձնել՝ օգնելու հայ և թուրք ժողովուրդներին, հասարակություններին երկխոսության ձև գտնելու և առերեսվելու իրենց պատմությանը»,-նշեց Բունդեսթագի փոխնախագահ Էդելգարդ Բուլմահնը՝ հավելելով, թե Գերմանիային հաջողվել է հաշտեցման եզրեր գտնել և լիակատար ձևով հաշտվել Ֆրանսիայի և Լեհաստանի հետ:

«Մենք կարծում ենք, որ թեև դա դժվար, բայց հնարավոր ճանապարհ է, որով կարող են գնալ նաև Հայաստանն ու Թուրքիան՝ վերահաստատելով հարաբերություններ և երկխոսություն միմյանց միջև»,-հայտարարեց Բունդեսթագի փոխնախագահ Էդելգարդ Բուլմահնը:

Լուսանկարը՝ Ֆոտոլուրի

Աղբյուր` Փաստինֆո