Փաստ ինֆո

Հայաստանի Ազգային ժողովի փոխնախագահ Էդուարդ Շարմազանովի հրավերով Երևանում գտնվող Բունդեսթագի փոխնախագահ Էդելգարդ Բուլմահնը հայաստանյան ԶԼՄ-ների ներկայացուցիչներին հայտնեց, որ իրենց հանդիպման առանցքային կետերից մեկը Լեռնային Ղարաբաղի հակամարտությունն էր, Հայաստանի և Ադրբեջանի միջև հակամարտությունը:

Տիկին Բուլմահնը նշեց, թե ինքը շեշտել է, որ Գերմանիայի Բունդեսթագը մեծապես սատարում է ԵԱՀԿ Մինսկի խմբի ջանքերը, որոնց արդյունքում Հայաստանի և Ադրբեջանի նախագահների միջև վերջերս ձեռք բերվեց հրադադարի պահպանման պայմանավորվածություն:

«Մենք համոզված ենք, որ այս հակամարտությունը չի կարող լուծվել ռազմական ճանապարհով և չի լուծվի, ուստի մենք կոչ ենք անում, որ երկու կողմերը պահպանեն հրադադարի շուրջ ձեռք բերված նոր պայմանավորվածությունը»,-հայտարարեց նա՝ որպես հակամարտության հետագա թեժացումը կանխարգելող նախապայման կարևորելով շփման գծում մշտադիտարկման մեխանիզմների հաստատումը:

Ըստ նրա՝ մշտադիտարկան գործընթացի լրացուցիչ բաղկացուցիչ կհանդիսանա ԵԱՀԿ գրասենյակի անձնակազմի մեծացումը:

«Հուսով ենք, որ հրադադարի շուրջ նորից ձեռք բերված պայմանավորվածությունը հիմք կհանդիսանա հետագա բանակցությունների վերսկսման համար, և դրանց հիմքում կշարունակեն մնալ Մինսկի խմբի եռանախագահների կողմից առաջարկված սկզբունքները»,-հայտարարեց Բունդեսթագի փոխնախագահը:

Նա ընդգծեց, թե քանի որ Գերմանիան այս տարի ստանձնել է ԵԱՀԿ նախագահությունը, Գերմանիայի արտգործնախարար Շտայնմայերն իր անձնական ջանքերը կներդնի տարածաշրջանում խաղաղության հաստատման ուղղությամբ:

Հայաստանի Ազգային ժողովի փոխնախագահ Էդուարդ Շարմազանովը համամիտ լինելով իր գերմանացի գործընկերոջ հետ՝ ընդգծեց, թե, կարծում է, որ մոնիտորինգի մեխանիզմերի ներդրումից հետո «այլևս կարիք չի լինի կողմերին կոչ անել, այլ կարիք կլինի կոչ անել նրան, ով խախտել է հրադադարը»:

Աղբյուր` Փաստինֆո