Փաստ ինֆո

Ստամբուլի` ծանր հանցագործությունները քննող 14-րդ դատարանում մայիսի 24-ին սկսվել է «Ակոս» պարբերականի նախկին գլխավոր խմբագիր Հրանտ Դիքի սպանության գործով դատավարության հերթական նիստը: Ինչպես հաղորդում է «Արմենպրես»-ը` վկայակոչելով «Ակոս»-ը, նիստին ներկա են Դինքի ընտանիքի փաստաբաններ Բահրի Բելենը, Հաքան Բաքըրջըօղլուն, Սեբու Ասլանգիլը, Թանգյուլ Օզերը, Մելիքե Փոլաթը, Զեյնեփ Փարմաքսըզօղլուն:

Ձերբակալված մեղադրյալներ Յասին Հայալը, Ալի Ֆուաթ Յըլմազերը, Ռամազան Աքյուրեքը, Էրջան Դեﬕրը, ինչպես նաև  սպանությունն իրականացրած Օգյուն Սամասթը դատական նիստին միացել են տեսակապի միջոցով։ Կասկածյալներ   Ջելելեթին Ջերահը, Ահմեդ Իլհան Գյուլերը, Ռեշաթ Ալթայը, Ֆարուք Սարըն, Հասան Դուրմուշօղլուն, Սաբրի Ուզունը, Օնուր Քարաքայան, Մեհմեդ Այհանը, Էրհան Թունջելը և Մեհմեդ Ալի Օզքըլըչը ներկա էին դատական նիստին։

Մեղադրյալներ Ջելելեթին Ջերահը, Ահմեդ Իլհան Գյուլերը, Ռեշաթ Ալթայը, Ֆարուք Սարըն, Հասան Դուրմուշօղլուն, Սաբրի Ուզունը, Օնուր Քարաքայան, Մեհմեդ Այհանը, Էրհան Թունջելը և Մեհմեդ Ալի Օզքըլըչը, ովքեր ձերբակալված չեն, ինչպես նաև նախորդ նիստի ժամանակ ազատ արձակված Մուհիթին Զենիթը և Օզքան Մումջուն ներկա էին դատական նիստին։

Ոստիկանության հետախուզության բաժնի պետ Էնգին Դինչը ներկա չէր դատական նիստին։ Էնգին Դինչը նախորդ նիստին նույնպես չի ներկայացել։

Ստամբուլի Ոստիկանության նախկին պետ, այժմ նահանգապետ Ջելալեթին Ջերահի փաստաբանները դատական նիստի ժամանակ պահանջել են Ջերահի դեմ վարույթը կարճել՝ նշելով, որ նրա դեմ մեղադրական ակտը կազմվել է առանց   դատաքննության արտոնություն ստանալու։ Նրանք նշել են, որ միայն Գերագույն դատարանը կարող է վարույթ սկսել Ջերահի դեմ, քանի որ նա նահանգապետի պաշտոնն է զբաղեցնում։ Ստամբուլի հետախուզության բաժնի նախկին պետ Ահմեդ Իլհան Գյուլերը և մեղադրյալ Մեհմեդ Ուչարը դիմում են  ներկայացրել դատարան՝ պահանջելով կարճել վարույթը, քանի որ դատաքննության արտոնություն չկա։

Դինքի ընտանիքի փաստաբաններ Բահրի Բելենը և Հաքան Բաքըրջըօղլուն Ջերահի փաստաբանների առարկությունների դեմ են հանդես եկել։ Բահրի Բելենը հիշեցրել է, որ Դինքի սպանությունից հետո ստեղծված քաղաքական մթնոլորտը խոչընդոտել է պետական պաշտոնյաների նկատմամբ հետաքննության իրականացմանը։ Բելենը նշել է, որ Ջերահի նկատմամբ հետաքննություն իրականացնելու դեմ ոչ մի խոչընդոտ չկա։ Հաքան Բաքընջըօղլուն, հիշեցնելով Բաքըրգյուղի 8-րդ ծանր հանցագործությունների գործով դատարանի և Սահմանադրական դատարանների որոշումները, նշել է, որ մեղադրական ակտը կազմվել է հավուր պատշաճի։ Դատախազը մերժել է Ջերահի և Գյուլեր Ուչարի առարկությունները։ Դատարանը որոշել է, որ Ուչարի և Ջերահի նկատմամբ դատավարություն սկսելու դեմ ոչ մի արգելք չկա։ Դատարանը մեջբերել է պետական պաշտոնյաների նկատմամբ հետաքննության մասին Մարդու իրավունքների եվրոպական դատարանի, Բաքըրքյոյի 8-րդ ծանր հանցագործությունների դատարանի որոշումները։

Հայտարարված ընդմիջումից հետո դատական նիստը շարունակվում է։

Ստամբուլի «Ակոս» թերթի հայազգի խմբագրապետ Հրանտ Դինքը սպանվել է 2007 թվականի հունվարի 19-ին`խմբագրության առջեւ նրա վրա կատարված զինված հարձակման արդյունքում:

2012 թվականի հունվարի 17-ին դատարանի որոշմամբ` Դինքի սպանության կազմակերպիչ Յասին Հայալը ցմահ բանտարկության դատապարտվեց, անﬕջական հանցագործ Օգյուն Սամասթը` 22 տարվա ազատազրկման:

2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում էր կայացրել Հրանտ Դինքի սպանության գործով դատավարությունը սկսել զրոյից:

Այս անգամ բոլոր ամբաստանյալներին պետք է առաջադրվեր «հանցավոր խմբավորման ստեղծման եւ կառավարման կամ դրանում մասնակցություն ունենալու «մեղադրանք: Բացի այդ, որոշումներ էին ընդունվել Դինքի սպանության ժամանակ    բարձր պաշտոններ զբաղեցրած 9 անձանց, այդ թվում` Ստամբուլի նախկին ոստիկանապետ Ջելալեթին Ջերահի նկատմամբ դատական գործեր հարուցելու կապակցությամբ:

Աղբյուր` Փաստինֆո