Փաստ ինֆո

Հայաստանի տնտեսական աճը 2015 թվականին կազմել է 3 տոկոս՝ կրելով հիմնական գործընկեր երկրների տնտեսական անբարենպաստ զարգացումների, մետաղների միջազգային գների նվազման, Ռուսաստանից ներհոսող դրամական փոխանցումների կրճատման արդյունքում իրական տնօրինվող եկամտի նվազման, ինչպես նաև տնտեսությունում վարկավորման մակարդակի նվազման ազդեցությունը: Ազգային ժողովի մշտական հանձնաժողովների համատեղ նիստում ՀՀ 2015 թ. պետական բյուջեի կատարման հաշվետվության քննարկմանն ասաց ՀՀ ֆինանսների նախարարի տեղակալ, գլխավոր գանձապետ Ատոմ Ջանջուղազյանը:

«2015 թվականին 2014 թվականի նկատմամբ գրանցվել է ՀՆԱ-ի 3 տոկոա աճ: Ընդ որում, ՀՆԱ-ի աճին նպաստել են գյուղատնտեսությունը՝ 2.1 տոկոսային կետ, արդյունաբերությունը՝ 1.0 տոկոսային կետ և ծառայությունները՝ 0.8 տոկոսային կետ»,- «Արմենպրես»-ի հաղորդմամբ՝ ասաց Ջանջուղազյանը:

2015 թվականին արձանագրվել է արդյունաբերական արտադրանքի թողարկման ծավալի 5.2 տոկոս աճ: Չնայած միջազգային շուկայում մետաղների գների նվազման միտումին՝ արդյունաբերությանը հիմնականում նպաստել է հանքագործական արդյունաբերության 50.4 տոկոս աճը, որը պայմանավորված է Թեղուտի հանքավայրի շահագործմամբ: Մշակող արդյունաբերությանն էական դրական նպաստում է ունեցել ծխախոտային արտադրատեսակների արտադրության 49.1 տոկոս աճը, որը պայմանավորված է ծխախոտի արտահանման ծավալների աճով:

Ջանջուղազյանը հավելեց, որ 2015 թվականին գյուղատնտեսության համախառն թողարկումն աճել է իրական արտահայտությամբ 11.5 տոկոսով: Անասնաբուծությունը և ձկնորսությունը նույնպես նպաստել են գյուղատնտեսությանը՝ աճելով համապատասխանաբար 6.1 տոկոսով և 6.4 տոկոսով: Գյուղատնտեսության աճն ուղեկցվել է նաև ոլորտում ներդրումների (կապիտալ շինարարության) 61.9 տոկոս աճով:

2015 թվականի տնտեսական աճն ուղեկցվել է ներքին պահանջարկի նվազմամբ և զուտ արտահանման բարելավմամբ: «2015 թվականի առաջին կիսամյակի ընթացքում 12-ամսյա գնաճն աստիճանաբար աճել է՝ մոտենալով նպատակային ցուցանիշի տատանումների թույլատրելի միջակայքի վերին սահմանին և կազﬔլով 5.5 տոկոս»,- ասաց Ջանջուղազյանը:

Լուսանկարում՝ Ատոմ Ջանջուղազյանը
Լուսանկարը՝ Armenpress-ի

Աղբյուր` Փաստինֆո