Փաստ ինֆո

Զորակոչի ժամանակ ի՞նչ լիազորություններ ունի Կենտրոնական բժշկական հանձնաժողովը: Հարցին պատասխանում է «Նորիկյան և գործընկերներ» փաստաբանական գրասենյակը: 

Կենտրոնական բժշկական հանձնաժողովը, «Գեներալնի կամիսիան», /այսուհետ` ԿԲՀ/, արտահաստիքային հանձնաժողով է, որը գործում է զորակոչերի ժամանակ և հանդիսանում է ռազմաբժշկական փորձաքննություն իրականացնող մարմին:

ԿԲՀ-ն կազմավորվում է ՀՀ Կառավարության որոշմամբ հաստատված անհատական կազմով:

Որպես կանոն, հանձնաժողովի նախագահ է նշանակվում ՀՀ զինվորական կոմիսարը, տեղակալ (բժիշկ), անդամներ` թերապևտ, սրտաբան, վիրաբույժ, վնասվածքաբան, նյարդաբան, հոգեբույժ, ակնաբույժ, մաշկաբան, օտոլարինգոլոգ, համակարգչային օպերատոր ու քարտուղար:
ԿԲՀ-ն բժշկական փորձաքննության ղեկավար մարմին է և հաշվետու է հանրապետական զորակոչային հանձնաժողովի նախագահին, որն ի պաշտոնե հանդիսանում է ՀՀ պաշտպանության նախարարը:

ՀՀ պաշտպանության նախարարի 2013թ. թիվ 410 հրամանի հավելվածի 25-րդ կետի համաձայն` ԿԲՀ-ի գործառույթներն են.

1) բժշկական փորձաքննության ենթարկել զինկոմիսարիատներում նախնական բժշկական հետազոտում և փորձաքննություն անցած զորակոչիկներին,

2) նախազորակոչային և զորակոչային տարիքի անձանց բժշկական փորձաքննության աշխատանքներում գործնական և մեթոդական օգնություն ցուցաբերել զինկոմիսարիատների բժշկական հանձնաժողովներին,

3) նախազորակոչային և զորակոչային տարիքի անձանց հետազոտման և բուժման արդյունավետությունը բարձրացնելու նպատակով համագործակցել առողջապահական մարմինների հետ,

4) զորակոչիկների առողջական վիճակի մասին գրավոր եզրակացություն ներկայացնել, եթե նրանք.
ա) պիտանի են ճանաչվել զինվորական ծառայությանը (կամ պիտանի զինվորական ծառայության` սահմանափակումով),
բ) տարկետում են ստացել առողջական վիճակի պատճառով` բուժման նպատակով,
գ) ժամանակավորապես ոչ պիտանի են ճանաչվել առողջական վիճակի պատճառով` պարտադիր զինվորական ծառայության համար,
դ) ոչ պիտանի են խաղաղ ժամանակ զինծառայության համար,
ե) ոչ պիտանի են ճանաչվել զինծառայության համար` հանելով զինվորական հաշվառումից,
5) վերահսկել զինկոմիսարիատների բժշկական հանձնաժողովների գործունեությունը,
6) անհրաժեշտության դեպքում վերանայել նախկինում ընդունած իր որոշումները,

7) ՀՀ զորակոչային հանձնաժողովի հաստատմանը ներկայացնել ԿԲՀ-ի եզրակացությունները` զորակոչից հետո 20-օրյա ժամկետում:

Նույն հրամանի հավելվածի 27-րդ կետի համաձայն` Զորակոչիկների առողջական վիճակի վերաբերյալ ԿԲՀ-ի եզրակացությունները վերջնական են:

Հասարակության մեջ գերիշխում է այն մտայնությունը, որ ԿԲՀ-ն է որոշում ընդունում առողջական խնդիրներ ունեցող զորակոչիկներին ծառայության ուղարկելու կամ պահեստազորում հաշվառելու մասին:

Անհրաժեշտ է նկատի ունենալ, որ ԿԲՀ-ն զորակոչիկների առողջական վիճակի վերաբերյալ ընդամենը տալիս է եզրակացություն:

«Զինապարտության մասին» ՀՀ օրենքի 17-րդ հոդվածի համաձայն` զորակոչի և զորակոչիկներին ըստ զորատեսակների զինված ուժերում և այլ զորքերում զինվորական ծառայության ուղարկելու մասին որոշում ընդունում է Տեղական զորակոչային հանձնաժողովը:

Աղբյուր` Փաստինֆո