Փաստ ինֆո

Կոռուպցիայի դեմ պայքարում վերջնաժամկետ չկա, իսկ շոշափելի արդյունքները երկարաժամկետ շրջանում են դրսևորվում: Նման տեսակետ. 168.am-ի փոխանցմամբ, այսօր ԱԺ-ում լրագրողների հետ զրույցում հայտնեց ՊԵԿ փոխնախագահ Արմեն Ալավերդյանը: Նա նշեց, որ եթե պետական ապարատը պաշտպանված չէ սոցիալապես, աշխատավարձերի մակարդակը բարձր չէ, որ պաշտոնյաների անձնական կարիքները բավարարի, ապա այդ ռիսկը մշտապես լինելու է:

«Դա պատճառներից մեկն է, բայց առանձին դեպքերում նույնիսկ բարձր վարձատրություն ստացողը կարող է գնալ այդ քայլին: Ուրեմն՝ պետք է, որ այդ ոլորտում պատասխանատվությունն ավելի հասցեական դարձնենք»,- ասաց Ա.Ալավերդյանը:

Անդրադառնալով շատ պաշտոնյաների հայտարարագրած միլիոններին` ՊԵԿ փոխնախագահը նշեց, որ պետք է ուրախանալ, որ պաշտոնյաները հայտարարագրերում միլիոններ են գրանցում, դա ավելի թափանցիկության նշան է, և ավելի վատ և վտանագավոր է այն դեպքը, երբ պաշտոնյան միլիոններ ունի, բայց չի հայտարարագրում:

Ըստ նրա` իր մոտ հարցեր առաջանում են, թե որտեղի՞ց այդ գումարը, բայց խորհուրդ տվեց չմտածել, թե պաշտոնյաներն այդքան անմիտ ու անգետ են, որ առանց հիմքերի կարող է պատահել մեծ գումար հայտարարագրեն: Ա.Ալավերդյանի խոսքով` օրենքով հին եկամտի աղբյուրի հրապարակման մասին պահանջ չկա, իսկ այսօրվա եկամտի դեպքում նման պահանջ կա:

«Ես այդ կոռուպցիան տեսնում եմ այնտեղ, որ պաշտոնյա կա, որ կարողանում է այդ հայտարարագրված 2 մլն դրամով իր ընտանիքը պահել: Ես գտնում եմ, որ այդտեղ ավելի շատ կոռուպցիա կա,- ասաց Ա.Ալավերդյանը և շարունակեց,- Պետական չինովնիկը պետք է միանշանակ պատրաստ լինի այդ հարցերը և´ լսելու, և´ պատասխանելու, և´ դրանց տակից դուրս գալու»:

Մանրամասները՝ սկզբնաղբյուր-կայքում

Լուսանկարում՝ Արմեն Ալավերդյանը
Լուսանկարը՝ Ֆոտոլուրի

Աղբյուր` Փաստինֆո