Փաստ ինֆո

«Արմենիա» ՀԲԿ-ի վերակենդանացման և սուր թունավորումների բաժանմունքում խուլիգանության վերաբերյալ գործով այսօր ամբաստանյալ Հարություն Մկրտչյանի պաշտպան, փաստաբան Վահագն Մանուկյանը դատարանի ուշադրությունը հրավիրեց նախաքննության ընթացքում թույլ տրված մի շարք խախտումների վրա:

Ըստ պաշտպանի, մի շարք փորձաքննություններ նշանակելու որոշումներ ընդունվել են քրեադատավարական համապատասխան նորմի խախտմամբ: Մասնավորապես, Հարություն Մկրտչյանը չի ծանոթացել փորձաքննություն նշանակելու որոշումներին, այդպիսով զրկվելով փորձագետների կազմին, փորձագետներին ներկայացված հարցադրումներին ծանոթանալու իր դատավարական իրավունքից:

Հ.Մկրտչյանն այդ թվում չի ծանոթացել համալիր դատահոգեբանական և դատահոգեբուժական ստացիոնար փորձաքննություն նշանակելու որոշմանը, փորձագետների կազմն ու նրանց ներկայացված հարցերի շրջանակը հայտնի չի եղել նրան: Պաշտպանն ընդգծեց, որ փորձաքննությամբ չի պարզվել կարևոր մեկ հանգամանք՝ ամբաստանյալի սահմանափակ մեղսունակության հարցը:

Պաշտպանը դատարանին տեղեկացրեց նաև, որ ըստ գործի տվյալների, իր պաշտպանյալը դեպքի օրը՝ ժամը 02.35-ին է տեղափոխվել «Արմենիա» ՀԲԿ, նույն ժամն է նշված նաև նրան ոստիկանության բաժին բերման ենթարկելու արձանագրության մեջ:

«Փաստինֆո»-ի լրագրողի հետ զրույցում պաշտպան Վահագն Մանուկյանը նշեց, որ այդ երկու գործողությունները չէին կարող միաժամանակ, նույն ժամին տեղի ունեցած լինել, նշանակում է, որ դրանցից մեկը կեղծ է:

Ըստ պաշտպանի՝ եթե մարդը 02.35-ին տեղափոխվել է հիվանդանոց, և այնտեղ իրադարձություններ են տեղի ունեցել, ժամանակ է անցել, նույն ժամին նա ինչպե՞ս կարող էր բերման ենթարկվել ոստիկանություն: 

«Այս փաստաթղթերը իրականությանը չեն համապատասխանում և որպես հետևանք նրան ձերբակալելը, որպես կասկածյալ հարցաքննելը, բոլոր փաստաթղթերն, իմ դիտարկմամբ, որպես պաշտպան, առոչինչ են»,- ասաց Վ.Մանուկյանը:

Պաշտպանական կողմը մտադիր է միջնորդություններ ներկայացնել լրացուցիչ դատահոգաբանական և դատահոգեբուժական համալիր փորձաքննություն նշանակելու մասին՝ Հ.Մկրտչյանի սահմանակ մեղսունակության հարցը պարզելու համար:

Պաշտպանական կողմի մոտ կասկած է հարուցում նաև այն, որ թեև իրեղեն ապացույցների՝ տուժողի հագուստի, առգրավման արձանագրությունը ստորագրվել է 4 անձանց կողմից, սակայն համապատասխան փաթեթի կնիքի վրա առկա են երեք ստորագրությունները, բուն ստորագրությունները նույնպես կասկածի տեղիք են տալիս: Ուստի անհրաժեշտ է, ըստ պաշտպանական կողմի, պարզել, թե ովքեր և ինչ պարագայում են ստորագրել:

Հ. Մկրտչյանի պաշտպան Վահագն Մանուկյանը և Արգիշտի Գոմցյանի պաշտպան Խաչատուր Խաչատրյանը հայտարարեցին նաև, որ նախաքննության ընթացքում նշանակված դատատոքսիկոքիմիական փորձաքննության եզրակացությունը մեղադրանքի հիմքերի հետ որևէ առնչություն չունի և չի կարող դիտվել որպես մեղադրանքը հիմնավորող ապացույց:

Հարություն Մկրտչյանը մեղադրվում է ՀՀ քրեական օրենսգրքի 112-րդ հոդվածի 2-րդ մասի 2-րդ կետով՝ ծառայողական գործունեության հետ կապված անձի առողջությանը դիտավորությամբ ծանր վնաս պատճառելը, 258-րդ հոդվածի 4-րդ մասով՝ որպես զենք օգտագործվող առարկաների գործադրմամբ կատարված խուլիգանություն, և 316-րդ հոդվածի 2-րդ մասով՝ իշխանության ներկայացուցչի նկատմամբ կյանքի կամ առողջության համար վտանգավոր բռնություն գործադրելը, իսկ Արգիշտի Գոմցյանը՝ ՀՀ քրեական օրենսգրքի 316-րդ հոդվածի 1-ին մասով՝ իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը:

Հիշեցնենք, որ ըստ մեղադրանքի, Հարություն Մկրտչյանն ու Արգիշտի Գոմցյանը Երևանի «Արմենիա» ՀԲԿ-ի վերակենդանացման և սուր թունավորումների բաժանմունքում կատարել են խուլիգանություն` կոպիտ կերպով խախտել են հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով` զուգորդված որպես զենք օգտագործվող առարկաների գործադրմամբ հիվանդանոցի գույքը վնասելով և անվտանգության աշխատակիցների նկատմամբ բռնություն գործադրելով:

Աղբյուր` Փաստինֆո