Փաստ ինֆո

Երկու մանկահասակ՝ 4 և 2 տարեկան, երեխաների մայր, երիտասարդ կինը ենթարկվել է խաբեության ու սեռական բռնության՝ նույն անձնավորության կողմից:

Երիտասարդ կինը աշխատել է «Գուդվին» ընկերության գրասենյակներից մեկում, որտեղ ծանոթացել է մեկ այլ գրասենյակի աշխատակցի հետ, նրա հետ համակարգչային ներքին ցանցով ունեցել որոշակի շփումներ: Անձը սկսել է ընդհանուր հետաքրքրություն ներկայացնող հարցերի շուրջ զրուցել կնոջ հետ՝ ընտանիք, երեխաներ, առողջական խնդիրներ, ապա «կամաց-կամաց մտել է այդ աղջկա վստահության մեջ» և չարաշահել նրա վստահությունը. խաղադրույքներ է կատարել, չի վճարել, աղջկան անընդհատ իրենից կախվածության մեջ է պահել, ասելով՝ գումարը կբերեմ, խնդիր չկա:

Աղջիկը 200 հազար դրամից ավելի պարտքեր է կուտակել, ապա «գործընկերը» կնոջը մի քանի անգամ գումարային հարցերի շուրջ զրուցելու պատրվակով տարբեր տեղեր է տարել, փորձել բռնաբարել, սակայն կնոջը հաջողվել է հեռանալ: Նույն մտացածին պատրվակով գործընկերը կնոջը ևս մեկ անգամ հրավիրել է վերջինիս համար անծանոթ վայր և բռնաբարել նրան:

Տուժողն ընկել է հոգեկան շատ ծանր ապրումների, սթրեսի մեջ՝ հասկանալով, որ բռնաբարված է ու բոլոր առումներով խաբված, ինքնասպանության փորձ է կատարել:

Ամուսինն, ով աշխատում է ոստիկանության համակարգում, հասկանալով, որ կնոջը կորցնում է, հավաստիացրել է, որ կնոջ կողքին կլինի, խնդրել պատմել եղելությունը: Կեսճշմարտությունը պատմելուց հետո կինը նաև պատմել է ողջ իրականությունը: Ամուսնու հորդորով կինը դիմել է իրավապահ մարմիններին:

Կինը հանցագործության մասին դիմում է ներկայացրել ոստիկանություն՝ ակնկալելով, որ պաշտպանություն կստանա և առերևույթ հանցագործություն կատարած անձն էլ պատասխանատվության կենթարկվի:

Թեև դեռևս ընթացիկ տարվա հունվարի 6-ին քրեական գործ է հարուցվել ՀՀ քրեական օրենսգրքի 138-րդ հոդվածի 1-ին մասով՝ բռնաբարություն, և 178-րդ հոդվածի 2-րդ մասով՝ խոշոր չափերի խարդախություն, և կինը ճանաչվել է որպես գործով տուժող, սակայն մինչև օրս հանցագործություն կատարած անձին չեն ներգրավել որպես մեղադրյալ:

Ինչպես «Փաստինֆո»-ի թղթակցի հետ զրույցում նշեց տուժողի ներկայացուցիչ, փաստաբան Ինեսսա Պետրոսյանը, ապացույցները հստակ են, կինը մանրամասն ցուցմունքներ է տվել, առերես պնդել դրանք առերևույթ հանցագործություն կատարած անձի ներկայությամբ, սակայն մինչև օրս անձնավորությանը մեղադրանք չի առաջադրվել: Ըստ փաստաբանի, այնպիսի տպավորություն է ստեղծվում, որ տուժողին պաշտպանելու փոխարեն պաշտպանության՝ հովանավորության ներքո են վերցրել առերևույթ հանցագործություն կատարած անձնավորությանը:

Բռնաբարության միջով անցած, անտանելի հոգեկան տառապանքների մեջ գտնվող կինը վերջերս՝ մայիսի 8-ին ինքնասպանության փորձ է կատարել, ինչը ըստ նրա ներկայացուցչի, գալիս է անպաշտպան լինելու զգացողությունից: Նրա մոտ սուիցիդալ մտքեր են ծագում և նա մտածում է՝ հանցագործություն կատարած անձն անպատիժ մնացել է, իզուր հաղորդում ներկայացրեցի, ավելի խայտառակ եղա:
Քննիչները մի բան էլ իրեն են սկսում մեղադրել, այլ որակի հարցեր տալ, իսկ հանցագործություն կատարած անձն էլ «օդնոկլասնիկի » սոցցանցում սպառնալիքներ, խայտառակ հայհոյանքներ է ուղղում կնոջ ընտանիքի անդամներին:

«Ես չորս գործ ունեմ իմ վարույթում, երբ քննչական մարմինները պաշտպանում են առերույթ հանցագործություն կատարած անձանց, խոսքը գնում է հենց սեռական բռնությունների մասին: Բոլոր չորս գործերով էլ նկատելի է, որ քննիչները հակված են պաշտպանելու առերույթ հանցագործություն կատարած անձանց, իսկ տուժողներն, ովքեր արդեն իսկ մեկ անգամ տուժել են հանցագործություններից, շարունակում են տուժել արդեն քննչական մարմնի պատճառով: Մարդը երբ որ դիմում է իրավապահ մարմիններին այն մտքով է դիմում, որ ինքը պետք է պաշտպանված լինի»,- նշեց Ինեսսա Պետրոսյանը:

Լուսանկարը՝ Ֆոտոլուրի

Աղբյուր` Փաստինֆո