Փաստ ինֆո

«6-րդ զգայարան» հաղորդման էքստրասենս Անի Մաջնունյանի սպանության գործով այսօրվա դատական նիստը սկսվեց քիչ ուշացումով. ամբաստանյալի առողջական վիճակով պայմանավորված՝ դատարան շտապ օգնություն էր հրավիրվել:

Ամբաստանյալ Մուշեղ Մխիթարյանը զարկերակային ճնշման հետ կապված խնդիր էր ունեցել և ցուցաբերված բժշկական օգնությունից հետո դատական նիստն սկսվեց, սակայն կարճ ժամանակ անց՝ հետաձգվեց:

Տուժողի իրավահաջորդի ցանկությամբ գործին ներգրավվեց հանրային պաշտպան Թամարա Բաղդասարյանը:

Պաշտպանը միջնորդեց դատական նիստը հետաձգել և իրեն ժամանակ տրամադրել՝ գործի նյութերին ծանոթանալու համար, ի պատասխան որի դատարանը՝ Վարդան Աբրահամյանի նախագահությամբ, նշեց. «էլի կծանոթանաք, 5 նիստ է չենք կարողանում վկային բերել, այսօր վերջապես բերվել է դատարան, հարցաքննենք հետո կծանոթանաք»:

Պաշտպանը պնդեց միջնորդությունը՝ նշելով, որ եթե գործի նյութերին ծանոթ չէ, ինչպե՞ս պետք է պատշաճ պաշտպանություն իրականացնի, որից հետո դատարանը բավարարեց այն:

Միևնույն ժամանակ դատարանը պարզեց նաև, որ վկան դատական նիստերին չի ներկայացել՝ ծանուցագրերը ուշ ստանալու պատճառով:

Ըստ մեղադրանքի՝ Մուշեղ Մխիթարյանն ապօրինաբար Անի Մաջնունյանին դիտավորությամբ կյանքից զրկել է, որը զուգորդվել է ավազակությամբ:

Նրան մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով և որպես խափանման միջոց է կիրառվել կալանավորումը։

Ավելի վաղ տեղեկացրել էինք, որ Անի Մաջնունյանի գլխի, դեմքի, պարանոցի, կրծքավանդակի, որովայնի, զույգ վերին և ձախ ստորին վերջույթների շրջաններում հայտնաբերվել է ծակած-կտրած և կտրած, թափանցող և չթափանցող 59 վնասվածք, որոնք էլ իրենց համակցության մեջ առաջացրել են հեմոռագիկ շոկ, որն էլ բերել է Ա.Մաջնունյանի մահվան։

Աղբյուր` Փաստինֆո