Փաստ ինֆո

Կալանավոր Հրաչյա Գևորգյանին անհրաժեշտ բժշկական օգնություն և խնամք տրամադրելու ուղղությամբ անհապաղ միջոցներ ձեռնարկելու վերաբերյալ ՄԻԵԴ ներկայացված միջնորդությունը արդեն իսկ կոմունիկացվել է: Միջնորդությունը Հելսինկյան Քաղաքացիական Ասամբլեայի Վանաձորի գրասենյակի աջակցությամբ ներկայացվել է կալանավոր Հրաչյա Գևորգյանի ներկայացուցիչ, փաստաբան Տիգրան Սաֆարյանի կողմից:

Ըստ Հելսինկյան Քաղաքացիական Ասամբլեայի Վանաձորի գրասենյակի հաղորդագրության,  ՄԻԵԴ-ն իր հարցադրումներն է ներկայացրել ՀՀ կառավարությանը՝ կալանավոր Հրաչյա Գևորգյանին տրամադրված բժշկական օգնության, խնամքի և համապատասխան բժշկական հաստատություն տեղափոխելու  վերաբերյալ: Մասնավորապես՝ պահանջվել է տրամադրել տեղեկատվություն այն մասին, թե ինչ ընթացք է ստացել ՔԿՀ ղեկավարության 2016 թ. ապրիլի 11-ի գրությունը, որով թույլատրվել էր կալանավորին տեղափոխել ՀՀ Առողջապահության նախարարության համապատասխան բուժական հաստատություն՝ հետազոտություններ և մասնագիտական խորհրդատվություններ կազմակերպելու համար:

Հարցադրումներ են ներկայացվել նաև Հրաչյա Գևորգյանին նախկինում տրամադրված բժշկական օգնության և խնամքի վերաբերյալ:

ՀՀ Կառավարությունն այս հարցադրումներին պետք է պատասխանի մինչև 2016 թ. մայիսի 29-ը:

Իրավապաշտպան կազմակերպությունը հիշեցնում է, որ «Նուբարաշեն» քրեակատարողական հիմնարկում գտնվող կալանավորը առողջական վիճակի կտրուկ վատթարացման պատճառով զրկված է իր պահանջմունքները ինքնուրույն հոգալու հնարավորությունից: ՔԿՀ ղեկավարությունը հրաժարվում է քայլեր ձեռնարկել Հրաչյա Գևորգյանին համապատասխան բժշկական հաստատություն տեղափոխելու և անհրաժեշտ խնամք կազմակերպելու ուղղությամբ, ինչի պատճառով կալանավորը շաբաթներ շարունակ գտնվել է հացադուլի մեջ:

«Փաստինֆո»-ն պարբերաբար անդրադարձել է նախկինում հինգ անգամ դատապարտված, տուժող կնոջն ու նրա անչափահաս որդուն ազատությունից զրկելու և ազատության դիմաց պահանջված գումարն ստանալու մեջ մեղադրվող  «Կիկեռ» մականվամբ Հրաչյա Գևորգյանի վերաբերյալ գործի դատաքննությանն ու ամբաստանյալի առողջական խնդիրներին:

«Կիկեռ» մականվամբ ամբաստանյալը ներկայացվեց դատարան, սակայն ի վիճակի չէր ո՛չ խոսել, ո՛չ էլ կանգնել

Դատարանը հիշյալ գործով կայացված դատավճռով ճանաչել և հռչակել էր ամբաստանյալ Հրաչյա Գևորգյանի անմեղությունը ՀՀ Քրեական օրենսգրքի 34-139-րդ հոդվածի 1-ին մասով՝ սեքսուալ բնույթի բռնի գործողությունների փորձ,   առաջադրված մեղադրանքով՝ ապացույցների անբավարարության հիմքով:

Հրաչյա  Գևորգյանը մեղավոր էր ճանաչվել ՀՀ Քրեական օրենսգրքի 218-րդ հոդվածի 2-րդ մասի 1-ին, 3-րդ, 4-րդ, 7-րդ կետերով՝ մի խումբ անձանց կողմից նախնական համաձայնությամբ, զենք կամ որպես զենք օգտագործվող առարկաների գործադրմամբ երկու կամ ավելի անձանց, այդ թվում՝ ակնհայտ անչափահասին պատանդ վերցնելը, 316-րդ հոդվածի 1-ին մասով՝ իշխանության ներկայացուցչի նկատմամբ ոչ վտանգավոր բռնություն, 182-րդ հոդվածի 1-ին մասով՝ շորթում, և դատապարտվել 8 տարվա ազատազրկման:

Դատավճռի դեմ Հ.Գևորգյանի պաշտպան Լյուդվիգ Ավետիսյանը բողոք է ներկայացրել վերաքննիչ դատարան՝ միջնորդելով բեկանել Հրաչյա Գևորգյանի վերաբերյալ 09.11.2015թ. դատավճիռը և նրան արդարացնել` ճանաչել և հռչակել նրա անմեղությունը կամ գործն ուղարկել նույն դատարան` նոր քննության, կամ նրա նկատմամբ նշանակված պատիժը պայմանականորեն չկիրառել:

Աղբյուր` Փաստինֆո