Փաստ ինֆո

Մայիսի 25-ին Ազգային ժողովի արտահերթ նիստի ընթացքում Ընտրական օրենսգրքի նախագիծը քննարկվելու է երրորդ ընթերցմամբ, ինչը նշանակում է, որ կարող են լինել միայն խմբագրական փոփոխություններ:

«Դեռևս մենք չենք տեսնում այն փոփոխությունները, որոնք կարևոր են: Իհարկե, ինչ-որ փոփոխություններ տեղի են ունեցել, իհարկե, մենք կարծում ենք, որ սա մի փոքր բարելավում է, սակայն մի շարք հիմնական խնդիրներում փոփոխություններ չկան»,-այսօրվա ճեպազրույցում ասաց Ազգային ժողովի «Օրինաց երկիր» խմբակցության քարտուղար Մհեր Շահգելդյանը:

Ըստ նրա` հատկապես խոսքը վերաբերում է քվեարկության արդյունքերի ամփոփման, հրապարակայնության խնդիրներին:

«Մասնավորապես, մենք առաջարկում ենք հանել արգելքը ինչպես լրատվամիջոցների, այնպես էլ՝ հասարակական կազմակերպությունների քանակի հետ կապված: Դա տեղամասերում օնլայն հեռարձակումն է և որոշակի պարբերականությամբ կոնկրետ տեղամասային ընտրական հանձնաժողովների կողմից քվեարկողների քանակի և արդյունքների ներկայացումն է»,- ասաց նա:

Մ.Շահգելդյանը նշեց նաև, որ թեև նախագծի հեղինակներն տեղամասերում քվեարկության առցանց հեռարձակման իրենց առաջարկը մերժել են ֆինանսների բացակայության հիմնավորմամբ, սակայն, իրենց «խորին համոզմամբ, դա մեծ ֆինանսներ չի պահանջում»: «Եթե լիներ նախնական համաձայնություն, կարծում եմ, միջազգային կազմակերպությունները ցանկություն կունենային ֆինանսավորելու այս գործընթացը` ավելի հրապարակային դարձնելու համար»,-նշեց նա:

Ըստ նրա` կան կարծիքներ, թե ընդունումից հետո դեռևս հնարավոր կլինի աշխատել, սակայն անձամբ ինքը դա չի պատկերացնում:

«Բայց այս պահի դրությամբ, քանի որ մեր առաջարկների մեծ մասը չի ընդունվել, մեր դիրքորոշումը դուք գիտեք»,-ընդգծեց նա:

Լուսանկարը՝ Ֆոտոլուրի

Աղբյուր` Փաստինֆո