Փաստ ինֆո

Ոստիկանի նկատմամբ կյանքի կամ առողջության համար ոչ վտանգավոր բռնություն գործադրելու մեջ մեղադրվող Հիմնադիր խորհրդարանի անդամ Գևորգ Սաֆարյանի գործով առաջին իսկ դատական նիստում՝ այսօր, նրա պաշտպան Տիգրան Հայրապետյանն ինքնաբացարկի միջնորդություն ներկայացրեց նախագահող դատավոր Մնացական Մարտիրոսյանին: Ըստ պաշտպանի, իրենք կասկածներ ունեն դատավորի անկողմնակալության ու անկախության հարցում:

Տ.Հայրապետյանը նշեց, որ իր պաշտպանյալն ինքն իրեն քաղբանտարկյալ է համարում ու բազմիցս հայտարարել է, որ իշխանություններն իր հետ հաշվեհարդար են տեսնում քաղաքական հայացքների համար: Գ.Սաֆարյանը համապատասխանում է նաև ԵԽ ԽՎ բանաձևում տեղ գտած քաղբանտարկյալի սահմանումներին:

Պաշտպանի գնահատմամբ, իր պաշտպանյալը ենթարկվել է ահաբեկչությունների, մասնավորապես, անհայտ անձը մահափորձ է կատարել նրա նկատմամբ, մեկ այլ դեպք էլ է տեղի ունեցել, երբ երկու ոստիկաններ գցել են նրան գետնին ու հարվածել, մի դեպքում հանցագործությունը չի բացահայտվել, մյուս դեպքում էլ ոստիկանները պատասխանատվության չեն ենթարկվել: Սա ևս հիմնավորում է, որ նա քաղբանտարկյալ է:

Տ.Հայրապետյանը հիշատակեց ՀՀ գլխավոր դատախազին ուղղված Human Rights Watch միջազգային իրավապաշտպան կազմակերպության դիմումը, որում նշվել էր, որ Գ.Սաֆարյանը մինչև քննությունը պետք է ազատ արձակվի: Սակայն, այդուհանդերձ, նրա նկատմամբ խափանման միջոց է ընտրվել կալանավորումը, որը միտված է Գ.Սաֆարյանի մտքի, խոսքի, հավաքների ազատության սահմանափակմանը:

Քաղաքական ընդդիմադիր հայացքներ ունեցող Գ.Սաֆարյանի գործով նախագահող դատավորը, ըստ Տ.Հայրապետյանի, մարտիմեկյան, 7-ի, Ժիրայր Սեֆիլյանի, Շանթ Հարությունյանի, ՀԱԿ ակտիվսիտների վերաբերյալ քաղաքական հնչեղության գործեր քննած  և մեղադրական դատավճիռներ կայացրած դատավոր է, նա, մամուլի հրապարակումների համաձայն, քաղաքական պատվերների դատավոր է: Այս գործը ևս քաղաքական է, ըստ պաշտպանի, ուստի դատավորը չի կարող արդարացի քննություն իրականացնել:

Պաշտպանը նշեց նաև, որ Գևորգ Սաֆարյանի կալանավորման, կալանավորման ժամկետը երկարացնելու, գրավ կիրառելու միջնորդությունը մերժելու ակնհայտ ապօրինի որոշում կայացրած թվով չորս դատավորների դեմ ՀՀ արդարադատության խորհուրդ ներկայացված իր դիմումների վերաբերյալ որոշումներ կայացրել է հենց դատավոր Մնացական Մարտիրոսյանը՝ որպես Դատավորների ընդհանուր ժողովի էթիկայի ու կարգապահական հարցերի հանձնաժողովի նախագահ: Որոշումներում դատավորների գործողություններում խախտումներ չեն հայտնաբերվել:

Ի վերջո, Մնացական Մարտիրոսյանը վարույթ է ընդունել գործը՝ վերահաստատելով կալանավորումն ընտրելու որոշումը՝ հաշվի չառնելով բազմաթիվ հեղինակավոր անձանց, այդ թվում՝ ԱԺ պատգամավորների, երաշխավորությունները:

Պաշտպանը ամփոփեց, որ իրենք կասկածներ ունեն դատավորի անկախության ու անկողմնակալության առումով և մտավախություն հայտնեց, որ դատավորի նախագահությամբ կստեղծվի սոսկ արդարացի քննության պատրանք:

Դատավոր Մնացական Մարտիրոսյանն իր հերթին պարզաբանեց, որ Դատավորների ընդհանուր ժողովի էթիկայի ու կարգապահական հարցերի հանձնաժողովը միաձնյա չէ որոշումներ կայացնում, ընդամենը դիմումների վերաբերյալ հանձնաժողովի որոշումները դիմողներին են ուղարկվում հանձնաժողովի նախագահի ստորագրությամբ:

Գևորգ Սաֆարյանն էլ իր հերթին նշեց, որ չէր ցանկանա, որ իր գործը քններ մի դատավոր, որի քննած գործերից մեկով Մարդու իրավունքների եվրոպական դատարանը մարդու իրավունքների խախտումներ էր արձանագրել: Այդ գործի՝ Ժիրայր Սեֆիլյանի գործի վերաբերյալ դատավոր Մ.Մարտիրոսյանը պարզաբանեց, որ Ժ.Սեֆիլյանի մեղադրանքի մեկ հոդվածով՝ ավելի ծանրով, նա արդարացվել է, իսկ ՄԻԵԴ-ի արձանագրած խախտումներն առնչվել են մինչդատական վարույթին:

Գործով մեղադրողն առարկեց ինքնաբացարկի միջնորդության դեմ՝ նշելով, որ դրա համար որևէ հիմք առկա չէ:

Դատարանը հեռացավ խորհրդակցական սենյակ՝ որոշում կայացնելու: Որոշումը կհրապարակվի ժամը 16.00-ին:

Աղբյուր` Փաստինֆո