Փաստ ինֆո

Ռուսաստանյան փորձագետ Մոդեստ Կոլերովը Tert.am-ի հետ զրույցում անդրադառնում է Վիեննայում Ադրբեջանի ու Հայաստանի նախագահների հանդիպման արդյունքներին, թե ինչ կարելի է սպասել Ադրբեջանից հետայսու, ինչ կտա շփման գծում ԵԱՀԿ դիտորդների ավելացումը: Ըստ Կոլերովի` դիտորդների թվի ավելացումը նրանց կվերածի գրեթե խաղաղապահների։

-Պարո՛ն Կոլերով, Ձեր գործընկեր Դուբնովը, անդրադառնալով Վիեննայում Հայաստանի ու Ադրբեջանի նախագահների հանդիպմանը, նշել էր, որ ժամանակը ցույց կտա` կողմերից որի օգտին է հաղթանակը, նշել էր՝ ժամանակը ցույց կտա: Ձեր կարծիքը։
 

-Կարծում եմ՝ տակտիկապես հաղթեց Երևանը, բայց այդ տակտիկական հաջողությունը կարող է վերածվել իլյուզիայի, եթե Ադրբեջանը, ինչպես նախկինում արել է, չկատարի իր իսկ հայտարարությունները՝ հակամարտության հետ կապված:
 

-Հայաստանյան քաղաքագետների կարծիքով՝ Վիեննան դրական էր, ի՞նչ եք կարծում` այն ինչ-որ մի քայլով հետ մղե՞ց կողմերին պատերազմից:
 

-Այդ հանդիպման ընթացքում ստորագրված փաստաթուղթը թույլ է տալիս մտածել, որ հակամարտությունը ինչ-որ ժամանակով ապասառեցված է: Հարցն այն է, թե որքան ժամանակով: Անկասկած, Ադրբեջանի համաձայնությունը ԵԱՀԿ առաքելության մանդատի ավելացմանը, ինչպես նաև՝ միջադեպերի հետաքննությանը նպաստող սարքավորումների տեղադրմանը, Սերժ Սարգսյանի առաջարկների մի մասի կատարումն է: Սա ավելացնում է միջազգային հանրության ներգրավվածությունը հակամարտությանը, ինչպես նաև Արցախում իրավիճակի վերահսկողությանը: Ինչն էլ նշանակում է, որ բանակցային սեղանին Արցախի` որպես կողմի կամ համամասնակցի ներգրավվածությունը ավտոմատ կերպով ավելանում է:

Բայց, կրկնում եմ, այս պահին խոսքը միայն սառեցման մասին է: Եվ, այդ իսկ պատճառով, առաջին հարցը, որ հիմա դրված է, այն է,թե այս սառեցումը որքան ժամանակով է: Որովհետև որքան էլ Ադրբեջանը հերթական անգամ դրել է իր ստորագրությունը «ֆրազի» տակ, թե դեմ է խնդրի ռազմական լուծմանը, այս մասին ասել է բազմիցս, ապրիլյան միջադեպը փաստում է, որ նման հայտարարությունները Ադրբեջանին երբևէ հետ չեն կանգնեցրել: Այս իսկ պատճառով, հայկական կողմերին անհրաժեշտ է հստակ իմանալ, թե ինչ ժամկետով է սառեցվել հակամարտությունը, թե երբ Ադրբեջանը նորից կփորձի վերսկսել պատերազմը:
 

-Անձամբ ի՞նչ եք մտածում` ինչ ժամկետով:
 

-Ես չգիտեմ: Ինչ-որ մեկն ասում է, որ ապասառեցված է մինչև Ադրբեջանում «Ֆորմուլա 1»-ի մրցության անցկացումը: Բայց կա նաև երկրորդ գործոնը՝ հայկական կողմերը պետք է զարգացնեն այդ փոքր առաջընթացը` փորձելով հասնել ԼՂ կարգավիճակի բարձրացմանը` որպես բանակցային կողմի: Դրա համար, դա պետք է արվի մինչև Ադրբեջանի ու Հայաստանի նախագահների հաջորդ հանդիպումը:
 

-Ուրի՞շ ինչ քայլեր պետք է արվեն՝ ռազմական առումով:
 

-Ժամանակը, որը կտա Ադրբեջանը, պետք է մաքսիմալ արդյունավետ օգտագործել, առավելագույնս աշխատել ԼՂ կարգավիճակի ուղղությամբ: Պետք է այս աշխատանքը տանել նաև միջազգային կազմակերպությունների հետ `քաղաքական առումով, նախապատրաստվելու Ադրբեջանի կողմից հերթական հարձակումից առաջ, որպեսզի այդ ժամանակ Արցախը էլ ավելի ուժեղ լինի:
Բնականաբար, պետք է այս ժամանակը օգտագործվի ռազմական նախապատրաստվածության համար:
 

-Ամեն դեպքում տպավորություն էր, Իլհամ Ալիևը երեկ փոխել էր տոնայնությունը, որը այնքան էլ չէր համընկնում իր վերջին շրջանի հռետորաբանության հետ:
 

-Պետք է տարանջատել երկու բան՝ խոսքեր, որոնք Ալիևն ասում է իր երկրի համար և խոսքեր, որոնք ասում է արտաքին աշխարհի համար: Իհարկե, նա փոխել էր իր տոնայնությունը և փոխել էր, որովհետև Ադրբեջանի ապրիլյան բլիցկրիգը չհաջողվեց: Եվ սա ամենագլխավոր գործոնն է: Այո, եղել են մեծ կռիվներ ու կորուստներ, բայց Ադրբեջանը անմիջապես հասկացավ, որ չի կարողանալու արագ լուծել իր ռազմական խնդիրները: Առհասարակ՝ լուծել:
 

-Սա իրեն հետ կպահի՞ նոր պատերազմից:
 

- Նրան հետ կկանգնեցնի, եթե նախագծերը, որոնց մասին նշեցի, իրականացվեն: Եթե Արցախում մոնիտորինգ իրականացնող ԵԱՀԿ ուժերի՝ դիտորդների քանակը էապես ավելանա, այդ ավելացումը կնշանակի, որ ի դեմս այդ մարդկանց՝ Արցախում գրեթե խաղաղապահներ են հայտնվում: Այս չզինված, գրեթե խաղաղապահները միայն իրենց ներկայությամբ փակում են առաջնագիծը ադրբեջանական հարձակումներից: Ակնհայտ է, որ Ղարաբաղը չի սկսել ապրիլյան պատերազմը և չի պատրաստվում հարձակվել, այդ իսկ պատճառով, ԵԱՀԿ առաքելության դիտորդների յուրաքանչյուր ավելացում Ադրբեջանի շահերի դեմ է:

Աղբյուր` Փաստինֆո