Փաստ ինֆո

Ապրիլյան քառօրյա պատերազմի ընթացքում և դրանից հետո դիրքեր մեկնած կամավորականների և Զինված ուժերի միջև հարաբերությունների կանոնակարգումը գտնվում է պաշտպանության նախարարության ուշադրության կենտրոնում: Ազգային ժողովում կառավարության հետ հարցուպատասխանի ժամանակ այս մասին ասաց ՀՀ պաշտպանության նախարար Սեյրան Օհանյանը՝ պատասխանելով ՀԱԿ խմբակցության պատգամավոր Գագիկ Ջհանգիրյանի հարցին:

«Ապրիլյան քառօրյա մարտական գործողությունների ժամանակ, որը սանձազերծվել էր Ադրբեջանի կողմից, ամբողջ երկրագնդի հայ ժողովուրդը, հատկապես՝ Մայր հայրենիքում, արձագանքեց եւ կամովի մեկնեց Արցախի պաշտպանությանը մասնակցելու: Մենք բոլորս՝ բանակի ղեկավարությունն ու հայ ժողովուրդը, շատ բարձր ենք դա գնահատում, որովհետեւ այդ գործունեությունը բերեց այսօրվա բանակի, հրամանատարի, նրա զինվորների մարտական պատրաստության, վարպետության համապատասխան մակարդակի համադրմանը մեր կամավորների՝ մարտական ծառայության անցման փորձի հետ: Այդ փորձի շրջանակներում մենք կարողացանք ունենալ հաջողություններ արցախյան ռազմաճակատի հատվածում»,- «Արմենպրես»-ի հաղորդմամբ՝ նշեց նախարարը:

Սեյրան Օհանյանը հավելեց, որ Զինված ուժերը խիստ ուշադիր են կամավորների նկատմամբ: Ստեղծված է աշխատանքային խումբ, որը սոցիալական ոլորտի բազմաթիվ հարցեր քննարկելու համար է: Բացի այդ, ՀՀ պաշտպանության նախարարությունում ՀՀ աշխատանքի եւ սոցիալական հարցերի նախարարության աշխատակիցների հետ անց է կացվել խորհրդակցություն, բոլոր հարցադրուﬓերը բարձրացվել են:

«Այն կամավորները, որոնք մարտական գործողությունների ժամանակ զոհվել են կամ վիրավորվել են, համապատասխան որոշման համաձայն օգտվում են զինծառայողների պաշտպանության՝ այսօր գոյություն ունեցող բոլոր օրինական արտոնություններից: Ներկայումս դիրքերում գտնվող կամավորների ծառայությունը եւ աջակցությունը բանակին կամավոր իրավունքի շրջանակներում է: Նրանք այնտեղ կամավոր են ընդգրկված ու ցանկության դեպքում կարող են հետ վերադառնալ: Այս պարագայում բանակի ղեկավարությունը, Պաշտպանության բանակի հետ համագործակցության եւ փոխադարձ օգնության շրջանակներում, համապատասխան քայլեր ենք ձեռնարկում իրավիճակին համարժեք որոշումներ ընդունելու համար»,- մանրամասնեց նախարարը:

Պատգամավորի դիտարկմանը, թե կամավորների ծառայության ընթացքում կարող են լինել նաեւ ոչ կանոնադրական միջադեպեր, Սեյրան Օհանյանը պատասխանեց. «Փորձը ցույց է տվել, որ մարտական գործողությունների ժամանակ հանցագործությունները, տարբեր տեսակի խախտոմները քիչ են լինում: Մենք համապատասխան քննարկումներ կատարել ենք, նաեւ՝ այսօր ուսումնասիրում ենք, որպեսզի քննարկենք ընդհանուր ռեզերվում գտնվող զորահավաքային ռեսուրսի համար կամավորական ծառայողի, կամավորական ստորաբաժանումների առկայության հարցեր:

Այսինքն, այդ խնդիրները եւս ուսումնասիրման առարկա են: Ի վերջո մենք պետք է հասկանանք, որ նաեւ Արցախյան հատվածից մասնակի եւ հիﬓական զորահավաքի ընթացքում մասնակից ամբողջ ռեսուրսն օգտվում է զինծառայողների բոլոր իրավունքներից եւ արտոնություններից:

Ինչ վերաբերում է Հայաստանյան հատվածի կամավորականներին, ապա հարցը այսօր նաեւ իրավական ոլորտում է քննարկվում: Կան խնդիրներ, որոնք առանձին լուծում են պահանջում, եւ կան խնդիրներ, որոնք, զինվորական ծառայության առանձնահատկություններից ելնելով, հրապարակային չեն»:

Աղբյուր` Փաստինֆո