Փաստ ինֆո

2015թ. նոյեմբերի 27-ին «Շենգավիթ» ԲԿ-ում նորածնի մահվան դեպքով հարուցված քրեական գործի վարույթը կարճվել է: Այդ մասին «Փաստինֆո»-ի հարցման ի պատասխան հայտնեցին Քննչական կոմիտեից:

39 շաբաթական հղի Ռայան 2015թ.-ի նոյեմբերի 25-ին ինքնազգացողության վատացմամբ ընդունվել է ԲԿ, անցել համապատասխան ստուգումներ,  սակայն ծննդաբերության ցավեր չի ունեցել, և բժշկի կողմից որոշում է կայացվել կեսարյան հատման միջոցով կնոջը ծննդալուծել:

ԲԿ ընդունման նույն օրը կնոջը կեսարյան հատում են կատարել, և ծնվել է տղա երեխա: Ծննդկանն այդ օրը նորածին որդուն չի տեսել, քանի որ գտնվել է վերակենդանացման բաժանմունքում, և միայն հաջորդ օրը,  երբ հիվանդասենյակ է տեղափոխվել, երեխային տեղափոխել են մոր մոտ, հենց այդ օրը երեխային պատվաստել են, սակայն կարճ ժամանակ անց փոքրիկը սկսել է փսխել և անհանգիստ լաց լինել:

Փոքրիկին շնչառական սարք են միացրել, հետազոտություն կատարել՝ պարզելու  երեխայի վիճակի կտրուկ վատացման պատճառը: Այդ մասին բժիշկները տեղեկացրել են  ծննդկանի հարազատներին:

Նոյեմբերի 27-ին կինը հիվանդանոցից դուրս է գրվել, իսկ  երեխան մնացել  է հիվանդանոցում, որտեղ ժամեր անց մահացել է:

Ըստ դատաբժշկական փորձաքննության եզրակացության՝ փոքրիկը տառապել է «սրտի բնածին արատ, աորտայի կրիտիկական ստենոզ, ձախ հիպոպլաստիկ փորոք» հիվանդությամբ:

Փորձաքննությամբ նաև նշվել է, որ հիվանդությունը ի հայտ է գալիս սրտի Բոտալյան ծորանի փակումից հետո, այսինքն ծնվելուց առավելագույնը մի քանի օր հետո:

Փորձաքննությամբ նաև հաստատվել է, որ ծննդաբերությունից առաջ և դրանից հետո նորածնին ցուցաբերած բուժական գործողությունները եղել են համարժեք, իսկ կեսարյան հատումը կատարվել է անհրաժեշտ ցուցումներով, բժիշկների կողմից  ցուցաբերված բուժօգնությունը չի եղել հակացուցված:

Նշանակված փորձաքննության եզրակացությամբ` կնոջ և  նորածնի բուժման գործընթացում բժշկական օգնություն և սպասարկում իրականացնողների կողմից թույլ չեն տրվել խախտումներ և թերություններ, իսկ նորածնի մոտ հայտնաբերված հիվանդությունը գործնականում հնարավոր չէր հայտնաբերել ներարգանդային կյանքում:

Նշենք, որ նորածնի մահվան փաստով հարուցվել էր քրեական գործ՝ ՀՀ քրեական օրենսգրքի 130-րդ 2-րդ մասով:

Այսպիսով, նախաքննական մարմինը ձեռք բերված ապացույցները գնահատելով վերաբերելիության և թույլատրելիության, իսկ ամբողջ ապացույցներն իրենց  համակցությամբ գտնել է, որ «Շենգավիթ» ԲԿ-ի բժիշկներ Արմինե Ֆանյանի և Հակոբ Մելքումյանի գործողություններում բացակայում է նախատեսված հանցագործության հատկանիշները և քրեական գործի վարույթը կարճվել է՝ նրանց արարքում հանցակազմի բացակայության պատճառաբանությամբ:

Աղբյուր` Փաստինֆո