Փաստ ինֆո

ՀՀ քրեական օրենսգրքի 104-րդ հոդվածի 1-ին մասով  Սամվել Դարբինյանին առաջադրված  մեղադրանքը դատարանը վերաորակեց՝ նշանակելով ավելի մեղմ պատիժ:

Այսօր  Շենգավիթ վարչական շրջանի ընդհանուր իրավասության դատարանում,  դատավոր Ալեքսանդր Ազարյանի նախագահությամբ հրապարակվեց մայրասպանության մեջ մեղադրվող Սամվել Դարբինյանի գործով դատավճիռը, դատարանը նրան առաջադրված մեղադրանքը վերաորակեց ՀՀ քրեական օրենսգրքի 112-րդ հոդվածի 2-րդ մասով՝ դատապարտելով  8 տարի ժամկետով ազատազրկման:

Ավելի վաղ տեղեկացրել ենք, որ  մեղադրանքը դատարանում պաշտպանող դատախազի գնահատմամբ՝  Սամվել Դարբինյանին առաջադրված մեղադրանքը հիմնավորված է ապացույցների համակցությամբ առավել քան բավարար համարելով մեղադրական դատավճիռ կայացնելու համար միջնորդել էր նրան  դատապարտել 12 տարի ժամկետով ազատազրկման:

Փաստինֆո-ի թղթակցի հետ զրույցում Սամվել Դարբինյանի պաշտպան Լյուդվիգ Ավետիսյանը նշեց, որ իր պաշտպանյալը վերջին խոսքում պնդել էր, թե չի կատարել իրեն մեղսագրվող արարքը և դատարանին խնդրել արդարացի դատական ակտ կայացնել:

Ըստ մեղադրանքի՝ Սամվելը բնակվել է մոր հետ նույն բնակարանում և, ցավագին ընդունելով իր խմելու վերաբերյալ մոր դիտողությունները, խմած վիճաբանել է նրա հետ ու դիտավորությամբ բութ, կոշտ առարկաներով բազմաթիվ հարվածներ հասցրել մոր մարմնի տարբեր մասերին՝ պատճառելով կյանքի համար ծանր մարմնական վնասվածքներ, սպանել նրան:

Նրա նկատմամբ որպես խափանման միջոց է ընտրվել կալանավորումը:

Նշենք նաև, որ գործով դատաքննության ընթացքում նշանակված դատահոգեբուժական և դատահոգեբանական ստացիոնար համալիր հանձնաժողովային փորձաքննության եզրակացության համաձայն՝ Դարբինյանը մեղսունակ է ճանաչվել:

Նշենք նաև, որ դատաքննության ընթացքում դատակոչված վկաներից երեքը դատարանում հայտարարել  էին, որ Սավելը իրենց ասել է, թե տունը գողեր են մտել և մորը խեղդամահ արել:

Աղբյուր` Փաստինֆո