Փաստ ինֆո

Սպանության հանգեցրած դանակահարության  հերթական գործով  այսօր դատարանում հարցաքննվեց դեպքի ականատես վկան: Նա տուժողի ազգականն է, Երևան էր եկել Կապանից՝ իր հղի կնոջը բժշկի տանելու համար և հյուրընկալվել գործով տուժող իր ազգականի տանը:

Ըստ վկայի, ինքն ու տուժողը երեքական բաժակ օղի են խմել, սակայն խմած չեն եղել: Տուժող Վազգենն իրեն պատմել է, որ մի աղջկա է հավանել՝ «բոյով, շագանակագույն աչքերով ու սև մազերով»,  ու առաջարկել է գնալ տեսնել նրան: Թեև, ըստ վկայի, ինքն ասում էր՝ ուշ է, ամոթ է, սակայն տուժողն իր մտադրությունից հետ չի կանգնում: Տուժողն, ըստ վկայի,  գիտեր միայն, որ աղջիկը բնակվում է 32-րդ բնակարանում, սակայն ո՛ր մուտքի ու ո՛ր շենքի, հստակ չգիտեր:

Բարձրացել են երրորդ հարկ, վկան ծեծել է դուռը ու այն բաց արած ամբաստանյալին հարցրել՝  ո՞րն է 32-րդ բնակարանը, վերջինս պատասխանել է, որ չգիտե, իր բնակարանը 33-րդն է: Նորմալ պատասխանել է, նշեց վկան: Ապա տուժողը ծեծել է դիմացի դուռը և նույն հարցն ուղղել այդ բնակարանի բնակիչներին, նրան ենթադրաբար ասել են, որ հավանաբար փնտրվող բնակարանը երկու բնակարանների մեջտեղում ընկած բնակարանն է: Այդ բնակարանի դուռը չեն բացել, և տուժողը որոշել է ևս մեկ անգամ բախել ամբաստանյալի տան դուռն ու հարցնել՝ իսկ ո՞վ է բնակվում 32-րդ բնակարանում, ինքը չգիտի՞: Այս անգամ ամբաստանյալը հայտարարել է՝ «ես քեզ չե՞մ ասել, ինչո՞ւ ես նորից հարցնում», ապա հետևել է տուժողի արձագանքը՝ «ինչո՞ւ ես մունաթ գալիս»: Դրան ի պատասխան ամբաստանյալն ասել է՝ գնամ շորերս հագնեմ, գամ (ժամը կեսգիշերին մոտ էր):

Սկսվել է քաշքշուկ, ապա վկան տեսել է, որ տուժողի դեմքից արյուն է հոսում, արյուն է տեսել նաև տուժողի որովայնի շրջանում, ձեռքը դրել է ազգականի որովայնին և այդ պահին ստացել դանակի հարված իր ձեռքին՝ հարվածն երևի Վազգենին էր ուղղված: Այդ ժամանակ է, որ տեսել է դանակը, երկու ձեռքով բարձրացրել դանակը բռնած ամբաստանյալի ձեռքը: Ապա նկատելով, որ մի քանի աստիճան ինքնուրույն իջնելուց հետո Վազգենն ընկնում է, նրան թևանցուկ է արել, իջեցրել առաջին հարկ, օգնություն կանչել, որից հետո եկել են ոստիկանությունն ու շտապօգնությունը:

Վկան հայտնեց, որ ինքը տեղյակ չէ, թե ինչպե՞ս է ամբաստանյալը վնասվածքներ ստացել, ինչպե՞ս է վնասվել ամբաստանյալի տան դուռը: Նա հայտարարեց, որ իրենք չեն փորձել ու չեն ներխուժել ամբաստանյալի տուն: Տեղյակ չէ նաև, թե ամբաստանյալի տան միջանցքում ինչպե՞ս են հայտնվել արնանման հետքերը, ինչպե՞ս են տուժողի ակնոցները հայտնվել ամբաստանյալի հյուրասենյակում:

Որևէ մեկի գլուխը պատին խփե՞լ են, վերևի հարևանուհին ասում էր՝ նկարները պատից ընկնում էին, չե՞ք լսել, որ ամբաստանյալն իր կնոջն ասում էր՝ փակիր, ռազբոյ է, երեխային վնաս չտան, արդյոք ամբաստանյալը «ձեր հարվածների՞ց էր պաշտպանվում» և այլն՝ հարցերին հնչեց  «ոչ» պատասխանը, կամ ոչ մի  պատասխան էլ չհնչեց: Ավազակային հարձակում անելու նպատակ ունեցե՞լ եք հարցին վկան բացասական պատասխան տվեց՝ «ոչ, ես կնոջս էի հիվանդանոց բերել»:

Եթե իրենք խմած չեն եղել, ինչպե՞ս է պատահել, որ դատաբժիշկները նրանց մոտ միջին աստիճանի խմածություն են արձանագրել հարցին վկան պատասխանեց՝ չեմ կարող ասել: Որևէ պատասխան չհնչեց նաև, թե  տուժողի տնից դուրս գալուց հետո մինչև դեպքի վայր հասնելը «երկու ժամ ի՞նչ էիք անում» հարցին: 

Վկան փոխարենը հավելեց, որ չպետք է գնային այդ շենք, այդ դեպքում Գագիկ Աբրահամյանը ամբաստանյալ չէր լինի, Վազգենն էլ ողջ կլիներ: տեղի ունեցածի մեջ, ըստ վկայի,  ինքն որևէ մեղքի բաժին չի ունեցել:

Գործի ելքով չշահագրգռված վկաները հայտնել են, որ 15-30 րոպե տևողությամբ սեռական բնույթի հայհոյանքներ են հնչել, «գմփգմփոց է եղել» դատարանի հարցին վկան հայտարարեց, որ նման բան չի եղել:

Դատարանը տարակուսանք հայտնեց, որ այն կարևոր պահին, երբ ամբաստանյալն ասաց՝ գնամ, շորերս հագնեմ, գամ, վկան որոշել է զանգահարել կնոջը, չէ՞ որ ակնհայտ էր, որ ամբաստանյալը տուժողին ճանապարհային քարտեզ չէր տալու: Դատարանն առաջարկեց  նորմալ ներկայացնել իրավիճակը, ապա հարցրեց՝ Դուք ինչ-որ բանից մտահոգվա՞ծ եք, Ձեզ սովորեցրե՞լ են ինչպես պատասխանել, վկան բացասական պատասխաններ տվեց:

Հաջորդ դատական նիստում կհրապարակվեն գործով նախորդ դատաքննության ընթացքում վկայի տված ցուցմունքները, դրանց ու ներկա ցուցմունքների միջև, ըստ կողմերի,   կան հակասություններ:

Գործը նախկինում քննվել է դատավոր Մարինե Մելքոնյանի նախագահությամբ, ապա նրա այլ դատարան աշխատանքի անցնելու կապակցությամբ տեղի է ունեցել դատարանի կազմի փոփոխություն, և գործը մակագրվել էր այլ դատավորի՝ Արմեն Խաչատրյանին:    

Ըստ մեղադրանքի, Գագիկ Աբրահամյանը 2015թ. հունվարի 18-ին իր իսկ բնակարանի դռան դիմացի աստիճանահարթակում, իր բնակարանի դուռը ուշ ժամի ծեծելու և իրենց անհանգստացնելու կապակցությամբ ծագած վիճաբանության ընթացքում ապօրինաբար կյանքից զրկելու դիտավորությամբ դանակով հարվածներ է հասցրել Վազգեն Դալլաքյանի կենսական կարևոր օրգաններ հանդիսացող դեմքի, կրծքավանդակի առաջնային, հետին մակերեսների և որովայնի շրջանում՝ սպանելով նրան:

Աղբյուր` Փաստինֆո