Փաստ ինֆո

ԵԱՀԿ Մինսկի խմբի համանախագահ երկրների արտաքին գործերի նախարարների հայտարարությունն իր մեջ ներառում է այն թեզիսները, որոնց մասին ապրիլին խոսել է ՀՀ Նախագահը: 

Այս մասին այսօր լրագրողների հետ զրույցում ասաց ԱԺ փոխնախագահ Էդուարդ Շարմազանովը՝ անդրադառնալով երեկ ուշ երեկոյան Վիեննայում կայացած Սերժ Սարգսյան-Իլհամ Ալիև հանդիպման արդյունքներին:

«Ապրիլին Հայաստանի Հանրապետության Նախագահը նշել է, որ 1994 թ. զինադադարը, որը վերահաստատվել է 1995 թ.-ին, պետք է լինի միակ փաստաթուղթը, որի հիման վրա պետք է շարունակվեն բանակցությունները: Այսինքն, նոր զինադադարի պայմանագրի կնքումն անթույլատրելի է, որովհետև կա 1994 թ.-ին կնքված զինադադարը:

Մինսկի խմբի համանախագահող երկրների արտգործնախարարներն իրենց հայտարարության մեջ հստակ ամրագրեցին, որ 1994 թ.-ի զինադադարը գործում է և միակ փաստաթութղն է: Իսկ այդ զինադադարով հստակ ամրագրված է Լեռնային Ղարաբաղի ստորագրությունը: Երբ արտգործնախարարները հայտարարում են, որ այդ զինադադարը գործում է, սա նշանակում է, որ այն գործում է իր ողջ հետևանքներով: Այդ հայտարարության մեջ անուղղակիորեն նշվում է, որ Լեռնային Ղարաբաղը հակամարտության կողմ է, և առանց Լեռնային Ղարաբաղի այդ խնդիրը որևէ մեկը չի կարող լուծել, և 1994 թ. զինադադարի ստորագրման տրամաբանությունը պետք է շարունակվի:

Այլ նոր տրամաբանություն, այլ նոր փիլիսոփայություն, այլ նոր սկզբունք չի կարող լինել»,-ասաց Է.Շարմազանովը՝ ընդգծելով, թե Ադրբեջանն այստեղ չհաջողեց, քանի որ նրա նպատակն էր նախևառաջ չեղյալ հայտարարել 1994 թ.-ի զինադադարը:

Երկրորդ, ըստ Է.Շարմազանովի՝ Հայաստանի Հանրապետության Նախագահի առաջարկն ընդունվեց, և երրորդ՝ վերահաստատվեց, որ Լեռնային Ղարաբաղը բանակցությունների և հակամարտության կողմ է:

ԱԺ փոխնախագահը նշեց նաև, թե տարիներ շարունակ հայկական կողմը հստակ հայտարարել է, որ միայն կողմ է շփման գծում հետաքննության մեխանիզմների ներդրմանը: «Միակ կողմը, որը դեմ է հանդես եկել հետաքննության մեխանիզմների իրականացմանը, եղել է Ադրբեջանը՝ իր Նախագահով հանդերձ»,-ընդգծեց նա:

Ըստ Է.Շարմազանովի՝ մենք տեսանք, որ այստեղ ևս Ադրբեջանն իր նպատակին չհասավ, իսկ Հայաստանի Նախագահի առաջարկը, որ այս փուլում հետաքննության մեխանիզմների ներդրումն անհրաժեշտ է, ընդունվեց, ընդ որում՝ այն ընդունվել է երեք համանախագահ երկրների կողմից:

Նա ընդգծեց, որ համանախագահ երկրների արտգործնախարարներն իրենց հայտարարությամբ վերահաստատել են, թե հակամարտությունը պետք է կարգավորվի բացառապես խաղաղ ճանապարհով. «Այսինքն, Ադրբեջանի նպատակը՝ զինադադարը խախտել, նոր զինադադար պարտադրել, զիջումներ կորզել, կարգավորման նոր քաղաքական փաստաթուղթ առաջ բերել, Լեռնային Ղարաբաղին հանել բանակցային գործընթացից, չիրականացավ»: Ըստ Է.Շարմազանովի՝ այս ամենը ցույց է տալիս, որ պաշտոնական Մոսկվան, պաշտոնական Վաշինգտոնը և պաշտոնական Փարիզը ընդունել են պաշտոնական Երևանի առաջարկներն և ունեն նույն տեսլականը:

Լուսանկարը՝ Ֆոտոլուրի

Աղբյուր` Փաստինֆո