Փաստ ինֆո

Քրեական հեղինակություն համարվող Թևոսիկի  եղբոր՝ Արթուր Սաֆարյանի սպանության գործով ավարտվում է գրավոր ապացույցների հետազոտման փուլը. կողմերին մնացել է հետազոտել 26 հատոր կազմող գործի վերջին երկու հատորները:

Գործով ամբաստանյալ Իսրայել Սարգսյանը, ով մեղադրվում է Մովսես Ներսիսյանի կողմից Արթուր Սաֆարյանի սպանությունը կազմակերպելու ու դրան օժանդակելու մեջ, ապա այդ հանցանքը թաքցնելու նպատակով նաև Մովսես Ներսիսյանին սպանելու մեջ, շարունակեց դատարանի ուշադրությունը հրավիրել, իր կարծիքով, ապացույցների բացակայության վրա:

Մասնավորապես, պաշտպանական կողմը նշեց, որ Մովսես Ներսիսյանին պատկանող «Մերսեդես» մակնիշի ավտոմեքենայում հայտնաբերված մանրաթելերը չեն համապատասխանել Ի.Սարգսյանի հագուստի մանրաթելերին:

Ըստ պաշտպանական կողմի, ինչպե՞ս կարող էր Իսրայել Սարգսյանը նստել այդ մեքենան, տանել ու թողնել այն օդանավակայանում ու մանրաթելեր չթողնել:

Հեռախոսազրույցների ձայնագրություններով փորձագետները պարզել են, որ խոսողը Իսրայել  Սարգսյանն է, սակայն ով է զրուցակիցը, չի հաջողվել պարզել: Փորձաքննության համար պիտանի չեն եղել նաև մինչև օդանավակայան տեսահսկման խցիկների կողմից արձանագրված տեսապատկերները: Ըստ Իսրայել Սարգսյանի, պատճառն այն է, որ«ես օդանավակայանում ու մնացած տեղերում ֆիզիկապես չեմ եղել»:

Դատարանում հրապարակվեց ԱԱԾ քննչական վարչության գրությունն՝ ուղղված ոստիկանությանը, որտեղ բարձրացվել էին ոստիկանների կողմից թերացումների վերաբերյալ հարցեր, մասնավորապես, ի՞նչն է պատճառը, որ Մովսես Ներսիսյանի սպանությունից ժամեր առաջ Իսրայել Սարգսյանը ոստիկանների հսկողությունից դուրս է մնացել, ինչո՞ւ Իսրայել Սարգսյանի մենակ, առանց Մովսես Ներսիսյանի, հայտնվելը չի նկատվել և նա բերման չի ենթարկվել և այլն:

Ըստ Իսրայել Սարգսյանի, չէին կարող այսպիսի պատահականություններ ու սխալներ լինել օպերատիվ աշխատողների կողմից: «Իրականության մեջ այդպիսի բան չի եղել, հորինվել է»,- ասաց ամբաստանյալը:

Աղբյուր` Փաստինֆո