Փաստ ինֆո

Հայաստանի Հանրապետության Ազգային ժողովում այսօր շարունակվեցին Ընտրական օրենսգրքի նախագծի երկրորդ ընթերցման քննարկումները, որի ընթացքում բազմաթիվ ելույթներ հնչեցին թե ընդդիմադիր գործիչների, և թե իշխանական թևի ներկայացուցիչների կողմից: Արտահերթ ելույթի իրավունքով ԱԺ փոխնախագահ Հերմինե Նաղդալյանը, իր խոսքը ուղղելով ընդդիմադիր գործընկերներին, նախ իր վրդովմունքը հնչեցրեց առ այն, որ երկրի կարևորագույն օրենքի քննարկումներն անցնում են կիսադատարկ դահլիճում.

«Որտե՞ղ է ընդդիմությունը, թե՞ բավական է նեգատիվ էմոցիաները արտահայտել ու համարել ձեր գործը ավարտված», - հարցով դիմեց ընդդիմադիր գործընկերներին տիկին փոխխոսնակը, այնուհետև անդրադառնալով կոնսենսուսի շուրջ չարչրկված եզրահանգումներին, նշեց, որ կոնսենսունսը հենց այնպես «օդից կախված» չի լինում:

«Նախ պետք է ձևակերպել, թե ինչ եք հասկանում «կոնսոլիդացիա», «կոնսենսուս» տերմինների տակ»,- մինչդեռ, ըստ Հերմինե Նաղդալյանի, Ընտրական օրենսգրքի առաջարկվող նախագիծը աննախադեպ քննարկված  մի փաստաթուղթ է, որի ընդամենը 88 էջի վրա շուրջ 250 առաջարկություն է բերված:

«Մենք ինչպես Սահմանադրական բարեփոխումների ժամանակ, այնպես ել հիմա ասել և ասում ենք ՝ եթե ընդդիմության համար սա կենաց ու մահվան պայքար է և այդ բառապաշարն է գործածվում ՝ մորթել, արյունահեղություն, բարձր գոռալ, գոչել,  և այլն, ապա մեզ համար սա հնարավորություն է օրենքը կատարելագործելու, գնալ վստահության մթնոլորտ ձևավորելուն,  և այդ առումով սա աննախադեպ բարեփոխում է, որն ընթանում է լայն կոնսոլիդացիայի պայմաններում, ողջամիտ կոմպրոմիսը կա, այդ մասին են խոսում ոչ միայն քննարկումներին մասնակցողների, նրանց արած առաջարկությունների  քանակը բնութագրող թվերը, այլև քվեարկության պատկերը՝ առաջին ընթերցումից հետո  շուրջ 100 ձայն»,- իր ելույթում նշեց ԱԺ փոխնախագահը ՝ վստահություն հայտնելով, որ նախագծի երկրորդ ընթերցումը նույնպես քվեարկության նման պատկեր կարձանագրի:

«Ուզում եմ ևս մեկ անգամ ուշադրությունը կենտրոնացնել նախագահ Ս.Սարգսյանի աննախադեպ բանաձևի վրա՝ ընտրությունների որակը ավելի կարևոր է, քան արդյունքը: Երբևէ եղե՞լ է, որ իշխանության ղեկավարը մեր երկրում նման խնդիր դրած լինի», -նշեց տիկին Նաղդալյանը, ավելացնելով, որ Ընտրական օրենսգրքի հիմքում դրված է մեխանիզմ, որը կեղծիքի տեղ չի թողնում, մինչդեռ շատերը փորձում են գտնել, թե որտեղ է թաղված շան գլուխը, ո՞ր փուլում, ո՞ր քայլում են ընտրությունները կեղծվելու:

Աղբյուր` Փաստինֆո