Փաստ ինֆո

«Նուբարաշեն» ՔԿՀ-ում տեղի ունեցած «բունտի» առերեւույթ պատճառը  քրեական հեղինակություն համարվող Արմեն Ալեքսանյանի խցում նախատեսված խուզարկությունն է եղել: Ա.Ալեքսանյանը ներկայումս ամբաստանյալի կարգավիճակում է գտնվում, եւ նրա գործը դատարանի վարույթում է:  «Փաստինֆո»-ին հայտնի դարձած տեղեկությունների համաձայն` ՀՔԾ-ում քննվող քրեական գործերից մեկով անհրաժեշտություն էր առաջացել խուզարկություն կատարել հենց այն խցում, որտեղ գտնվում է քրեական հեղինակությունը: Այս քննչական գործողությունն այնքան էր կարեւորվում, որ այն իրականացնելու համար «Նուբարաշեն» ՔԿՀ էր գնացել ՀՔԾ-ի պետի տեղակալը:

Այս նախաձեռնությունն ակնհայտոերն դուր չի եկել քրեական հեղինակությանը, ով բղավելով, թե «դաբրո» կա` կալանավորներին կոչել է անհնազանդության: Այն, ինչ կատարվել է «Նուբարաշենում», թերեւս միայն կինոներում ենք տեսել. կալանավորները տարբեր իրեր են նետել, աղմկել` հարվածելով դռներին, կոտրեն փականների եւ մի քանի տասնյակ կալանավոր հայտնվել է խցերից դուրս` գործադրելով տարաբնույթ բռնություններ իրավապահ մարմինների աշխատակիցների նկատմամբ, մածուն նետել ՀՔԾ պետի տեղակալի վրա:

«Փաստինֆո»-ին հաջողվել է պարզել, որ այդ անկարգությունները հրահրած քրեական հեղինակությունը ամբաստանվում է  գողության համար`  Ալեքսանդր Քոլոզյանի հետ միասին:

Մեր տեղեկույուններով՝ անկարգություններին ակտիվ մասնակցություն է ունեցել նաեւ  ավազակային հարձակում կատարելու մեջ մեղադրվող Իբոյանը: Վերջինիս գործը նույնպես գտնվում է դատարանի վարույթում, քննվում է անցած տարվա հունիս ամսից: Նրան մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 4-րդ կետով:

ՔԿՀ-ում անկարգությունների ակտիվ մասնակիցներից է կրկնահանցագործ` Արտակ Աղանիկյանը, ով նախկինում հաջողացրել է մի քանի անգամ դատվել:

Վերջինս 2008 թվականին դատապարտվել է ՀՀ քրեական օրենսգրքի 177 հոդվածի 2-րդ մասի 3-րդ, 4-րդ կետերով, 178 հոդվածի 2-րդ մասի 3-րդ կետով՝ պատիժների համակցությամբ 3 տարի ժամկետով ազատազրկման: Հաջորդ դատվածությունը, ըստ «Դատալեքս» դատական տեղեկատվական համակարգի, եղել է  2014թ.` մեղավոր ճանաչվելով  ՀՀ քրեական օրենսգրքի 177-րդ  հոդվածի 2-րդ մասի 3-րդ կետով և դատապարտվելով տուգանքի՝ 500.000 ՀՀ դրամի չափով:

Աղանիկյանի հաջորդ դատվածությունը իրեն սպասեցնել չի տվել. մեկ տարի անց՝  2015թ., երկու դրվագով գողության համար: Նույն թվականին նա դատվել է նաեւ մեկ այլ քրեական գործով` կրկին գողությունների համար` վերջնական պատիժ է նշանակվել 7 տարի 6  ամիս ժամկետով ազատազրկում` այս պատժաչափին գումարելով նախկին դատավածության չկրված մասը:

Նշենք, նաև որ քրեականտարողական հիմնարկում զանգվածային անկարգությունների փաստով հարուցվել է քրեական գործ՝ ՀՀ քրեական օրենսգրքի 225-րդ հոդվածի 2-րդ և 4-րդ մասերի հատկանիշներով:

Աղբյուր` Փաստինֆո