Փաստ ինֆո

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում կքննվի նաև խարդախության մեջ մեղադրվող Սպարտակ Դանիելյանի վերաբերյալ՝ նույն դատարանից փախուստի դեպքով հարուցված քրեական գործը:

Ինչպես ավելի վաղ «Փաստինֆո»-ն տեղեկացրել էր, Դանիելյանը փախուստի էր դիմել ապրիլի 5-ին, և միայն ապրիլի 29-ին նա հայտնաբերվեց:

Դանիելյանը, գտնվելով դատարանի 1-ին հարկում՝ կալանավորներին պահելու համար նախատեսված խցում, ձեռնաշղթայով փակված ճաղավանդակը չպարզված եղանակով բացելու միջոցով դուրս էր  եկել դատարանի շենքից, ապա դատարանի ավտոկայանատեղիի պարսպի վրայից ցատկելու միջոցով դիմել է փախուստի:

Նրան մեղադրանք է առաջադրվել ՀՀ քրեական օրենսգրքի 355-րդ հոդվածի 1-ին մասով:

Հիշեցնենք, որ ավելի վաղ Դանիելյանին մեղադրանք էր առաջադրվել ՀՀ քրեական օրենսգրքի 178-րդ հոդվածի 2-րդ մասի 1-ին կետով, 178-րդ հոդվածի 2-րդ մասի 2-րդ կետով և 178-րդ հոդվածի 1-ին մասով:

Խարդախությունների մասով ավելի վաղ Քննչական կոմիտեն տեղեկացրել էր, որ ՀՀ քննչական կոմիտեի Երևան քաղաքի քննչական վարչության վարույթում քննվող քրեական գործով բացահայտվել է քրեակատարողական հիմնարկի դատապարտյալ Սպարտակ Դանիելյանի կողմից կատարված հափշտակության 40 դրվագ։

Մասնավորապես, Դանիելյանը քրեակատարողական հիմնարկում պատիժը կրելու ընթացքում  միայնակ կամ այլ անձանց հետ ուրիշի գույքի հափշտակություն կատարելու շուրջ նախնական համաձայնության գալով, տասնյակ քաղաքացիների վստահությունը չարաշահելու և խաբեության եղանակով, 2015 թվականի մարտ-նոյեմբեր ամիսների ընթացքում հափշտակել է բազմաթիվ բջջային հեռախոսներ, համակարգչային սարքեր և այլ ապրանքներ:

 

Աղբյուր` Փաստինֆո