Փաստ ինֆո

«Կոնսենսուսն ինքնանպատակ լինել չի կարող: Այն շատ ցանկալի է, և դրա վրա մենք էլ շատ մեծ ռեսուրսներ դրեցինք: Ցավում ենք, որ Ընտրական օրենսգրքի նախագծի շուրջ կոնսենսուսը չկայացավ»,-այսօր Ազգային ժողովում, ի պատասխան լրագրողների հարցերի, ասաց ՀՀ կառավարության աշխատակազմի ղեկավար-նախարար Դավիթ Հարությունյանը՝ անդրադառնալով իշխանության հասցեին ընդդիմության քննադատությանը:

Միևնույն ժամանակ Դ.Հարությունյանն ընդգծեց, որ իրենք չենք բացառում, որ ինչ-որ պահի կհաջողվի ընդդիմության հետ գալ ընդհանուրի:

«Ցավալի է, բայց դա ամենևին չի նշանակում, որ մենք պետք է կանգ առնենք և ոչինչ չանենք»,-ասաց նա:

Ըստ նրա՝ Ընտրական օրենսգիրքը պետք է հունիսի 1-ին ուժի մեջ մտնի, «բայց դա ամենևին չի նշանակում, որ կոնսենսուսի վերաբերյալ համաձայնություններն ի սպառ փակվում են այս փոլում. մենք կարող ենք անգամ հունիսի 1-ից հետո էլ գալ կոնսենսուսի և փոփոխություններ կատարել Ընտրական օրենսգրքում»:

Նշենք, որ Դ.Հարությունյանն ԱԺ պետական-իրավական հարցերի մշտական հանձնաժողովի այսօրվա նիստում ներկայացրեց նոր ԸՕ-ի երկրորդ ընթերցմամբ խորհրդարանի քննարկմանը ներկայացվելիք նախագիծը: Ինչպես «Փաստինֆո»-ն արդեն հայտնել է, ըստ Դ.Հարությունյանի՝ Ընտրական օրենսգրքի նախագծում առաջին ընթերցումից հետո բազմաթիվ փոփոխություններ են արվել` հաշվի առնելով Պետական-իրավական հարցերի հանձնաժողովում նախագծի քննարկումների ժամանակ ծագած հարցադրումներն ու առաջարկությունները, Վենետիկի հանձնաժողովի և ԵԱՀԿ ԺՀՄԻԳ-ի օրերս ստացված զեկույցի մեջ նշված դիտողությունները, տարբեր հասարակական կազմակերպությունների և անհատների, ՄԱԿ-ի վարձած տեխնիկական փորձագետների առաջարկությունները:

Քննարկված նախագիծն այդուհանդերձ հանձնաժողովում քվեարկության այսօր չդրվեց: Որոշվեց քննարկումը շարունակել ԱԺ-ի ապրիլի 16-ի կեսօրին մեկնարկելիք քառօրյա նիստերից  առաջ՝ հանձնաժողովի առավոտյան ժամը 9-ին գումարվելիք նիստում, որտեղ կներկայացվեն ԸՕ-ի նախագծի հետ բավականին մեծածավալ օրենդրական փաթեթում ներառված մի շարք օրենքներում ԸՕ-ի նախագծից բխող փոփոխություններն ու լրացումները՝ այն էլ «միայն բովանդակային փոփոխությունները, քանի որ տեխնիկական հարցերը բազմաթիվ են»:

Փաթեթի քննարկման ավարտին կքվեարկվի ԱԺ-ին դրա վերաբերյալ դրական եզրակացություն տալու հարցը:

Նշենք, որ հանձնաժողովի այսօրվա նիստին՝ ի տարբերություն առաջին ընթերցմամբ նախագծի քննարկման, չէին մասնակցում «Ժառանգություն», «ՀԱԿ» և «Բարգավաճ Հայաստան» խմբակցությունների ներկայացուցիչները:

 

Աղբյուր` Փաստինֆո