Փաստ ինֆո

Արդարադատության նախարար Արփինե Հովհաննիսյանը, 1In.am-ի տեղեկացմամբ, լրագրողների հետ զրույցում անդրադառնալով դիտարկմանը, թե ԵՄ պատվիրակության ղեկավար, դեսպան Պյոտր Սվիտալսկին նշել է, որ կոռուպցիայի դեմ պայքարի համար կառավարությանը գումար չի տրամադրվի, քանի դեռ շոշափելի արդյունքներ չկան,  արձագանքել է. «Կոռուպցիայի դեմ պայքարը ՀՀ կառավարության պարտականությունն է։ Ես կոռեկտ չեմ համարում մեկնաբանել դա, բայց ուզում եմ ասել, որ Եվրամիությունը մեզ աջակցում է այդ հարցում։ Կարծում եմ՝ պարոն դեսպանը նախևառաջ ինքը պիտի մեկնաբանի՝ շոշափելի արդյունքներ կան, թե՝ ոչ։ Մեր քայլերի հաջորդականությունը մենք իրագործելու ենք։ Այնպես չէ, որ մենք պայմանավորել ենք այդ քայլերի իրականացումը կամ դրանց արդյունավետությունը Եվրամիության աջակցությամբ։ Այդ աջակցությունը մեզ համար կարևոր է, բայց դրա պատճառով չէ, որ մենք հայտարարել ենք այդ պայքարի մասին»։

Նրա խոսքով՝ գուցե քայլերը շատ դանդաղ են և ոչ տեսանելի, բայց արդյունքներ եղել են: Նա նշեց, որ արդյուքներ կան, օրինակ, արդարադատության ոլորտում, ոստիկանությունում:

Անդրադառնալով Արդարադատության նախարարի նախկին ենթակայի՝ ԴԱՀԿ ծառայության նախկին պետ Միհրան Պողոսյանի անվան շուրջ սկանդալին, երբ հայտնի դարձավ, որ նրա անունն առկա է պանամական փաստաթղթերում, Արփինե Հովհաննիսյանը նշեց. «Նախ ուզում եմ ասել, որ կոռուպցիայի դեմ պայքարում իրականում քայլեր ձեռնարկվում են։ Գուցե դուք կարող եք խոսել տեմպերի դանդաղ լինելու մասին, կամ չբավարարեն արդյունքները, բայց որ քայլեր կատարվում են, դա ակնհայտ է։ Իսկ այդ հարցի հետ կապված ասեմ, որ ընդամենն օրեր առաջ է գործն ուղարկվել իրավապահ մարմիններին, և այս պահին ընթանում է նախաքննություն։ Մեղմ ասած, քիչ ժամանակ է անցել՝ վերջնական գնահատականներ տալու համար»։

Մանրամասները՝ տեսանյությում
Տեսանյութը՝ 1In.am-ի

Աղբյուր` Փաստինֆո