Փաստ ինֆո

Շորթման մեղադրանքով Analitik.am կայքի տնօրենի ձերբակալությունից, քրեական գործ հարուցելուց և կալանավորելուց հետո տեղեկատվական դաշտում ստոր ու ագրեսիվ արշավ է սկսվել մեր երկրում կարգով, օրենքով, իրավապահների ու դատական համակարգի միջոցով բոլոր խնդիրները լուծելու կողմնակիցների դեմ: Այս մասին, մասնավորապես, ասված է Ազգային ժողովի պատգամավոր Տիգրան Ուրիխանյանի՝ ՀՀ Ոստիկանապետին ուղղված բաց դիմումի և ցուցմունքի վերաբերյալ հայտարարության մեջ:

«Գիտեմ, որ համամիտ եք՝ բոլոր խնդիրները, վեճերը պիտի լուծվեն օրինական ճանապարհով, հանցագործներով պիտի զբաղվեն իրավապահ մարմինները, այլ ոչ թե լծակային, թիկնազորային, փողային կամ այլ ազդեցություն ունեցողները:

Ապավինելով երկրում կարգ, կանոն և օրինականություն հաստատելու Ձեր ցանկությանն ու գործողություններին՝ բևեռում եմ Ձեր ուշադրությունը այն հանգամանքի վրա, որ սոցիալական ցանցերում ոստիկանության անունից հանդես եկող, ոստիկանության քարոզչական տարրերի տպավորություն ստեղծող, ըստ մամուլի՝ ոստիկանության համակարգի որոշ աշխատակիցների հետ առնչություն ունեցող էջեր կամ առանձին կայքեր իրականացնում են օրինական դաշտում գործելու դեմ ստոր ու կեղտոտ հակաքարոզչություն»,-գրել է պատգամավորը:

Օգնականը ցուցմունք է տվել «analitik.am» լրատվական կայքի տնօրենի դեմ (Տեսանյութ)

Նա խնդրել է  Ոստիկանապետին՝ միջոցներ ձեռնարկել բացահայտելու համար այդ մարդկանց, եթե այդպիսիք իրականում առնչություն ունեն համակարգի հետ:

Բաց դիմումի հետ մեկտեղ Տ.Ուրիխանյանը տարածել է նաև հայտարարություն այն մասին, որ որոշում է կայացրել «վաղը ցուցմունք տալու ՀՔԾ-ում «Անալիտիկ»-ի գործով, քանի որ ձեռք եմ բերել ինձ համար բավարար ու համոզիչ ապացույցներ առ այն, որ հիշյալ գործին առնչվում են կոնկրետ բարձրաստիճան պատվիրատուներ և հովանավորներ»:

Աղբյուր` Փաստինֆո