Փաստ ինֆո

Լարվածությունը ղարաբաղա-ադրբեջանական շփման գոտում կարող է մեծանալ՝ հաշվի առնելով կուտակումները, Ադրբեջանի կեցվածքը՝ ռազմական ճանապարհով խնդիրը կարգավորելու:

Tert.am-ի հետ զրույցում այս մասին ասաց ԼՂՀ արտաքին քաղաքականության և անվտանգության հասարակական խորհրդի նախագահ Մասիս Մայիլյանը՝ հիշեցնելով, որ Ադրբեջանն անգամ դիմել է ՄԱԿ՝ 94թ.-ի հրադադարի մասին եռակողմ պայմանագիրը չեղարկելու համար:

«Մյուս կողմից Ադրբեջանը չի կարող հանկարծակի գործողությունների դիմել, որովհետև մերոնք ակտիվ վերահսկում են իրավիճակը, տեղաշարժերը, մեր բանակը կանխարգելիչ միջոցառումներ է իրականացնում, որ նման զարգացումներ չլինեն»,- նշեց Մասիս Մայիլյանը՝ համաձայնելով դիտարկման հետ, որ ադրբեջանական ԶՈւ-ն պաշտպանվողի դերում է:

ԼՂՀ արտաքին քաղաքականության և անվտանգության հասարակական խորհրդի նախագահը շեշտեց՝ դեռ ապրիլի 3-ին Ադրբեջանը խնդրում էր զինադադար հաստատել, ինչը տեղի ունեցավ Մոսկվայի միջամտությամբ: «Բայց դա չի նշանակում, որ իրենք այլևս չեն հարձակվելու: Մենք պետք է պատրաստ լինենք թե՛ հարձակողական, թե՛ պաշտպանողական մարտերի»,- ասաց Մայիլյանը:

Անդրադառնալով ԼՂ անկախությունը Հայաստանի կողմից ճանաչելու հնարավորությանը, ԼՂՀ արտաքին քաղաքականության և անվտանգության հասարակական խորհրդի նախագահն ասաց, որ 90-ականներին, երբ կար բանակցային գործընթաց ու կողմերը համաձայնել էին՝ որոշել Ղարաբաղի վերջնական կարգավիճակը, Հայաստանը չէր ճանաչում Ղարաբաղի անկախությունը:

«Վերջին տարիներին Հայաստանի իշխանությունները հայտարարել են, որ կճանաչեն ԼՂ-ն այն դեպքում, երբ Ադրբեջանը պատերազմ սկսի: Այս հայտարարությունները ուժի մեջ են: Ապրիլից հետո իրավիճակը փոխվեց: Փաստարկները, թե սրանով վերջ կդրվի բանակցություններին, այլևս չեն գործում: Ադրբեջանն իր գործողություններով ցույց տվեց, որ այդ փաստարկներն այլևս չեն աշխատում, որովհետև ՀՀ կառուցողական, ճկուն կամ զգույշ քաղաքականությունը չազդեց Ադրբեջանի վրա, իրենք սկսեցին պատերազմ: Ադրբեջանը սկսեց պատերազմն առանց ճանաչելու ԼՂ-ն, դիմեց հրադադարի մասին պայմանագրի չեղարկման: ՀՀ իշխանություններին մնում է ճանաչման հանգամանքը կիրառել որպես զսպող մեխանիզմ»,- մանրամասնեց Մասիս Մայիլյանը:

Նա ասաց, որ որևէ վատ բան չկա հին մոտեցումների վերանայման մեջ:

Հարցին՝ բանակցությունները վերսկսելու Հայաստանի նախապայմանները կընդունվե՞ն Ադրբեջանի կողմից, կամ կպարտադրվե՞ն Ադրբեջանին միջազգային հանրության կողմից, Մասիս Մայիլյանը պատասխանեց, որ ԵԱՀԿ Մինսկի խմբի համանախագահող երկրները՝ ՌԴ-ն, ԱՄՆ-ն, Ֆրանսիան, բավական ներուժ ունեն՝ իրագործելու այդ նախապայմանները:

Իսկ եթե դա չհաջողվի, ապա Մասիս Մայիլյանի խոսքով, «Հայաստանն ու Արցախը ազատ կլինեն՝ լուծել հարցը, ամրագրել անվտանգությունը: Ճանաչման հարցով, օրինակ, ավելի ազատ կլինենք»:

Նրա խոսքով՝ առաջնահերթությունը զինադադարի պահպանումն է, չնայած կասկածի տակ է հենց զինադադարը՝ այն գոյություն ունի՞, թե՞ ոչ:

«Մենք գտնվում ենք հայտարարված պատերազմի վիճակում: Երբ իրավիճակը կայունանա, նոր երաշխիքներ ստեղծվեն, կարելի կլինի մտածել բանակցային գործընթացի մասին: Դրանից հրաժարվել չի կարելի, բայց հնարավոր բանակցություններին նոր որակ պետք է ապահովենք: ԼՂ-ն պետք է վերադառնա բանակցային սեղան: Համանախագահների առաջարկները պետք է լինեն նորացված, սկզբունքները պետք է նորացված լինեն, բանակցային տրամաբանությունը պետք է փոխենք: Այդ տրամաբանությունը որդեգրվել է 91թ.-ի սկզբին ու չի փոխվել: Այդ մոտեցումները հնացած են»,- ընդգծեց Մասիս Մայիլյանը:

Հարցազրույցն ամբողջությամբ՝ Tert.am-ի տեսանյութում:

Աղբյուր` Փաստինֆո