Փաստ ինֆո

Դոնի Ռոստովում ավազակության, մարդու առևանգման ու մահվան հանգեցրած ծանր մարմնական վնասվածք հասցնելու գործով այսօրվա դատական նիստում ամբաստանյալ Արմեն Ղազարյանը հայտարարեց, որ չի պատասխանելու մեղադրողի հարցերին: Մեղադրողն իր վերջին երկու հարցերը տվեց, սակայն պատասխան չստացավ:

Գործում վերջերս որպես ամբաստանյալի պաշտպաններ ներգրավված՝ «Ընդդեմ իրավական կամայականության» հասարակական կազմակերպության փաստաբաններ Արա Ղարագյոզյանն ու Հայարփի Սարգսյանը դատարանի ուշադրությունը հրավիրեցին իր դեմ ցուցմունք տված անձանց հարցաքննելու Մարդու իրավունքների եվրոպական կոնվենցրայի 6-րդ հոդվածով՝ արդար դատաքննության իրավունք, երաշխավորված իրավունքի վրա: Մինչդեռ՝ մեղադրյալի դեմ ցուցմունքներ տված վկաները պարբերաբար ծանուցվում են, սակայն որևէ արձագանք չի ստացվել այդ  մասին:

Երրորդ տարին է ամբաստանյալը գտնվում է ապօրինի կալանքի տակ, դատական նիստերը անիմաստ ձգձգվում են, դժգոհություն հայտնեց պաշտպանական կողմը: Նաև բողոքեց առ այն, որ ամբաստանյալը դատարանի դահլիճ բերվեց ձեռնաշղթաներով, ինչն ըստ պաշտպանի, դաժան, անմարդկային, նվասատացուցիչ վերաբերմունք է: Արա Ղարագյոզյանը հայտարարեց, որ այդ հարցով դիմելու են Մարդու իրավունքների եվրոպական դատարան:

Հայաստանյան, այն է՝ Երևանի Կենտրոն և Նորք-Մարաշ վարչական շրջանների դատարանն իր հերթին դժգոհություն հայտնեց փաստաբանի վրդովմունքի կապակցությամբ:

Դատարանը միաժամանակ հայտնեց, որ դատարանի կողմից վկաների ներկայությունն ապահովելու համար միջոցներ են ձեռնարկվել, հանձնարարականներ ուղարկվել: Այսօրվա դատական նիստը հետաձգվեց:

 Ըստ մեղադրական եզրակացության, Արմեն Ղազարյանը 2000թ. մայիսին, նախնական համաձայնությամբ գործելով Ի. Մոգիլևսկու և քննությամբ չպարզված անձի հետ, առևանգել է Ս. Կրուգլովային և Ե. Տոլստիխին, նրանց պատկանող դրամական միջոցների գտնվելու վայրը պարզելու նպատակով: Խաբեությամբ նրանց տարել են դոնիռոստովյան  բնակարան, որտեղ  պահանջել են ասել տնային տնտեսության վաճառքից ստացված գումարի գտնվելու տեղը: Խոշոր չափի գումար գույքին տիրանալու նպատակով սկսել են նրանց ծեծի ենթարկել, որից Ե. Տոլստիխը գիտակցությունը կորցրել է և գիտակցության գալով,  չդիմանալով հարվածներին ասել է, թե որտեղ են գտնվում իրենց պահանջած գումարները:

Ըստ մեղադրական եզրակացության, այնուհետև Ղազարյանը գործելով ըստ նախնական համաձայնության Մոգիլևսկու և քննությամբ չպարզված հանցագործի հետ ուղևորվել է Տոլստիխի նշած հասցե,  որտեղ այդ պահին գտնվել են Ս. Կրուգլովայի և Ե. Տոլստիխի ծեր բարեկամները Յու. Կրուգլովը, Ա. Կրուգլովան, Ե. Պտուխան:

 Ղազարյանը գնալով այդ հասցեով և օգտվելով այն հանգամանքից, որ իրեն նախկինում ծանոթ Կրուգլովը բացել է դուռը, մտել է բնակարան, որտեղ նախնական համաձայնությունը կատարելու նպատակով, քննությամբ չպարզված հանցագործի հետ Ս.Կրուգլովայի գումարին տիրանալու նպատակով սկսել է ծեծի ենթարկել նրանց,  որից հետո հափշտակել է Ս. Կրուգլովային պատկանող 6900 ԱՄՆ դոլար գումարը:

 Բացահայտելով, որ Ս. Կրուգլովան ստացված հարվածներից մահացել է,   Ղազարյանը, Մոգիլևսկին և քննությամբ չպարզված հանցագործը Ս. Կրուգլովայի դիակը փաթաթել են փալասի մեջ և այն թողել բնակարանում, իսկ Ե. Տոլստիխին Մոգիլևսկին ստիպողաբար դուրս է բերել բնակարանից և ավտոմեքենայով տարել ք. Դոնի Ռոստովի Մալինովսկու փող, որտեղ  ավտոշուկայի շրջանում նրան բաց է թողել և թաքնվել:

 Արմեն Ղազարյանը մեղադրվում է  ՀՀ քրեական օրենսգրքի 175-րդ հոդվածի 3-րդ մասի 3-րդ կետով՝  առողջությանը ծանր վնաս պատճառելով ավազակություն, 131-րդ հոդվածի 2-րդ մասի 1-ին, 6-րդ և 7-րդ կետերով՝ շահադիտական դրդումներով երկու կամ ավելի անձանց  առևանգելը, որը կատարվել է մի խումբ անձանց կողմից նախնական համաձայնությամբ, 112-րդ հոդվածի 2-րդ մասի 14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը:

Աղբյուր` Փաստինֆո