Փաստ ինֆո

«6-րդ զգայարան» հաղորդման էքստրասենս Անի Մաջնունյանի սպանության մեջ մեղադրվող Մուշեղ Մխիթարյանը չի ցանկանում մասնակցել դատական նիստերին: Այդ մասին այսօրվա նիստում հայտարարեց ամբաստանյալը, ով մինչև այսօրվա նիստը նույնաբովանդակ գրություն էր ուղարկել դատարան:

Երևանի Աջափնյակ և Դավթաշեն վարչական շրջանների ընդհանուր իրավասության դատարանում այսօր շարունակվեց գործի քննությունը և հրապարակվեց ամբաստանյալի գրությունը:

Վերջինս, դիմելով նախագահող դատավորին, տեղեկացրել էր, որ հրաժարվում է մասնակցել դատական նիստերին և ցանկանում է ունենալ օրինական ներկայացուցիչ, և որ  դատական նիստերը կարող են շարունակվել առանց իրեն և իր պաշտպան Մարինե Ֆարմանյանի:

Ամբաստանյալն որպես իր այս որոշման պատճառաբանություն նշել էր, որ քննչական խումբը և մեղադրող դատախազ Սաֆթալյանը ծիծաղաշարժ մեղադրական եզրակացություն են կազմել:

Իսկ գործով դատավորը, ով, ըստ ամբաստանյալի, փորձառու  է, պետք է արժանվույնս գնահատեր ու իր «վրայից հաներ մեղադրանքը»՝  հռչակելով իր անմեղությունը:

Դիմելով դատարանին՝ ամբաստանյալը գրել էր, որ դատարանը խորշել է իր խափանման միջոց կալանավորումը փոխարինել ստորագրությամբ:

«Ես անմեղի իրավունքով հայտնում եմ, որ չեմ վստահում որևէ մի դատավորի, դատախազի, քննիչի, բոլորդ էլ անմեղ մարդկանց արյան գնով վեր եք բարձրանում: Սա ոչ այլ ինչ է,  քան ՀՀ քաղաքացու իրավունքի ոտնահարում: Այս գրությունիցս հետո կանխատեսում եմ առաջիկա վճիռը, որն արդեն պատրաստ է, ես խնդրելու ոչինչ չունեմ, արեք ինչ ուզում եք, պահեք դատախազի և քննչական խմբի խայտառակությունները», - գրառել էր ամբաստանյալը՝ հավելելով, որ իր անձնական հարցերը կլուծի միջազգային չափանիշներով:

Սպանության մեջ մեղադրվողը գրությունն ավարտել էր հետևյալ խոսքերով «դուք ինձ զրկում եք ամենակարևորից՝ իմ ազատությունից, ընտանիքից, հեղինակությունից, մաղթում եմ ձեզ նորանոր հաջողություններ ու ամենայն բարիք»:

Դատարանի հարցին ի պատասխան նա կրկին պնդեց իր հայտարարությունը՝ դատական նիստերին չներկայանալու վերաբերյալ, նշելով, որ ինքը և իր պաշտպանը չեն մասնակցելու:

Նախագահող դատավորը, ինչպես նաև ամբաստանյալի պաշտպան՝ հանրային պաշտպանի գրասենյակի փաստաբան  Մարինե Ֆարմանյանը ամբաստանյալին պարզաբանեցին, որ իր ցանկությամբ պաշտպանը չի կարող չմասնակցել նիստերին, և որ դա կարգավորվում է օրենքով, անկախ այն հանգամանքից, որ ամբաստանյալը ցանկանում է նիստերին մասնակցել, թե ոչ, պաշտպանը պարտավոր է ներկա գտնվել դատական նիստերին:

Ամբաստանյալի պաշտպանը դատարանին դիմելով խնդրեց ժամանակ տրամադրել իր պաշտպանյալին վերջնական դիրքորոշում հայտնելու համար:

Նախագահող դատավորը, դատարանին հասցեագրված ամբաստանյալի հայտարարությունն անհեթեթություն համարելով, հնարավորություն տվեց ամբաստանյալին կրկին մտածել և քննարկել իր իսկ հայտարարությունը:

Ամբաստանյալը վերջում դժգոհեց իր խափանման միջոցը չփոփոխելուց, որ ինքը շարունակում է մնալ բանտում, կորցնելով առանց այդ էլ չունեցած առողջությունը, «ուր պետք ա փախնեի  կամ ինչի համար, Հայաստանում ամեն երկրորդը իմ դեմքը գիտի, եթե ոչ ռեժիսյոր, ապա որպես մարդասպան հաստատ գիտեն,  ուր պետք ա փախնեի, հաստատ կգտնեին:

Հիշեցնենք նաև, որ այսօր նախատեսվում էր շարունակել վկաների հարցաքննությունը, սակայն նրանց ներկայությունն ապահովվել կրկին չէր հաջողվել,  վկաներին բերման ենթարկելու վերաբերյալ ոստիկանությունից տարբեր գրություններ էին ստացվել, ոմանք հանրապետությունում չէին կամ տեղեկություններ չկային, սակայն նրանց թվում 2 վկայի վերաբերյալ սեքթ համակարգից տեղեկություն էր ստացվել, որ հատել են սահմանը:

Նրանց բերման ենթարկելու որոշումը կրկին անգամ կուղարկվի:

Աղբյուր` Փաստինֆո