Փաստ ինֆո

Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանության գործով վերջին՝ Նարեկ Խաչատրյանի վերաբերյալ գործով այսօրվա  դատական նիստում շարունակվեց գործի գրավոր ապացույցների հետազոտումը:

Մասնավորապես, հետազոտվեցին մեղադրանքի կողմի միջնորդության հիման վրա գործին կցված այլ փաստաթուղթ ճանաչված ապացույցները՝ գործով վկա Ահարոն Հակոբյանի հեռախոսային ելքային-մուտքային զանգերի վերծանումների արձանագրությունը, ինչպես նաև սպանության գործով կայացված նախորդ երկու դատավճիռները՝ բուն սպանության և սպանության պատվերի վերաբերյալ: Հաջորդ դատական նիստում ապացույցների հետազոտումը կշարունակվի:  

Հիշեցնենք, որ Սեդրակ Զատիկյանը սպանվել էր 2006թ. հունիսի 22-ին` Երևանի Սեբաստիա փողոցում: Արձակված կրակահերթից մահացել էր նաև պատահական մի անցորդ՝ երեք անչափահաս երեխաների մայր Կարինե Սարգսյանը:

Օրինական ուժի մեջ մտած բուն սպանության վերաբերյալ գործով 2007թ. դեկտեմբերի 29-ին կայացված դատավճռով  Արսեն Առուշանյանը ի թիվս ևս չորս հոդվածների՝ մեղավոր է ճանաչվել  ՀՀ քրեական օրենսգրքի 104-րդ հոդվածի երկրորդ մասի 1-ին, 6-րդ, 7-րդ, 8-րդ կետերով՝ մի խումբ անձանց կամ կազմակերպված խմբի կողմից պատվերով, շատերի կյանքի համար վտանգավոր եղանակով երկու կամ ավելի անձանց սպանությունը, և դատապարտվել  ցմահ ազատազրկման:

Նույն դատավճռով Արթուր Հովհաննիսյանը և Լուսինե Ղևոնդյանը սպանությանը օժանդակելու մեղադրանքով  դատապարտվել են համապատասխանաբար 10 և 8 տարվա ազատազրկման: 

Արդեն օրինական ուժի մեջ մտած 09-12-2013թ. դատավճռով Ստեփան Հակոբյանը մեղավոր է ճանաչվել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ պատվերով սպանությանը դրդելը, և դատապարտվել ազատազրկման 15  տարի ժամկետով:

Նույնպիսի մեղադրանք է առաջադրվել նաև Նարեկ Խաչատրյանին: Ըստ մեղադրանքի՝ Ն.Խաչատրյանը Ստեփան Հակոբյանի հետ, նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Արսեն Առուշանյանին նյութապես շահագրգռելով դրդել՝ պատվիրել են սպանել Սեդրակ Զատիկյանին:

Լուսանկարը՝ ՀՀ ոստիկանության