Փաստ ինֆո

Եվրամիությունը չեղարկել է Թուրքիայի հետ մայիսի 13-ին ծրագրված բարձր մակարդակի հանդիպումը:

Այս մասին, ինչպես հաղորդում է «Արմենպրես»-ը` վկայակոչելով ՏԱՍՍ-ը, հայտարարել է ԵՄ արտաքին քաղաքական ծառայության ներկայացուցիչ Մայա Կոսյանովիչը:

«Բարձր մակարդակի երկխոսությունը պետք է տեղի ունենար ուրբաթ, սակայն, այն հետաձգվել է: Որոշումն ընդունվել է համատեղ», -ասել է նա` նշելով, որ դեռեւս հայտնի չէ, թե այն երբ տեղի կունենա: Կոսյանովիչի խոսքով` չեղարկված հանդիպման օրակարգում շատ հարցեր կային, այդ թվում` Անկարայի ԵՄ անդամակացության գործընթացը եւ վիզաների ազատականացումը:

Ուշագրավ է, որ ԵՄ կողմից Անկարայի հետ բարձր մակարդակի հանդիպումը չեղարկվելուց անմիջապես հետո Եվրոպայի Խորհրդարանը հայտարարել է, որ մայիսի 11-ին արտահերթ լիագումար նիստ է անցկացնելու, որտեղ պետք է քննարկվի Թուրքիայի հետ վիզայի ազատականացման համար չափանիշների Անկարայի կողմից իրագործվելու աստիճանը որոշելու
համար: Թուրքական NTV հեռուստաալիքը հայտնում է, որ եթե նիստում որոշվի, որ Անկարան չի կատարել ԵՄ հետ վիզայի ազատականացման համար պահանջվող չափանիշները, ապա Եվրոպայի Խորհրդարանը դադարեցնելու է այդ հարցի օրենսդրական գործընթացը: Նշվում է, որ Եվրոպայի Խորհրդարանը Անկարայից պահանջում է փոփոխել ահաբեկչության դեմ պայքարի օրենքը, ինչի հիման վրա այդ երկրի զինված ուժերը Քուրդիստանի աշխատավորական կուսակցության ազատամարտիկների դեմ ռազմական գործողություններ անցկացնելու պատրվակով հարձակումներ են գործում քրդաբնակ շրջանների խաղաղ բնակչության վրա:

Ուշագրավ է նաեւ, որ գերմանական հեղինակավոր Bild թերթը մայիսի 9-ին հայտնել է, որ ﬕգրացիոն խնդիրը լուծելու գործում օգնության համար ԵՄ կողﬕց Թուրքիային խոստացված 6 ﬕլիարդ եվրոն կարող է բաժին ընկնել Հունաստանին, եթե Թուրքիայի նախագահ Ռեջեփ Թայիփ Էրդողանը խզի գործարքը:

Թուրքիայի տարածքով փախստականների հոսքը ԵՄ երկրներ կանխելու եւ նրանց թուրքական տարածքում պահելու նպատակով Բրյուսելը Անկարայի հետ համաձայնագիր է ստորագրել, որով խոստացել է Թուրքիայի քաղաքացիների համար չեղարկել վիզային ռեժիմը եւ երեք փուլով երեքական միլիարդ եվրո վճարել: Սակայն, այդ գործարքի եւ այլ քաղաքական հարցերի հետ կապված Էրդողանի եւ Թուրքիայի վարչապետ Ահմեթ Դավութօղլուի միջեւ ծագած տարակարծությունների պատճառով վերջինս որոշել է մայիսի 22-ին պաշտոնաթող լինել, ինչի հետեւանքով Բրյուսելում կասկածում են, որ Էրդողանը կարող է խզել Դավութօղլուի հետ ԵՄ միջեւ ձեռք բերված համաձայնությունը: Մի քանի օր առաջ Էրդողանը Թուրքիայի ԵՄ անդամակցության հետ կապված տառացիորեն հայտարարել էր. «Մենք գնում ենք ﬔր ճանապարհով, դուք էլ գնացեք ձեր ճանապարհով»:

Եվրոպական ուղղությունից ճանապարհը շեղած Թուրքիայի նախագահ Թայիփ Էրդողանը երեկ էլ հայտարարել է, որ Անկարայի «ռազմավարական նպատակը» Եվրաﬕությանը լիիրավ անդամակցությունն է:

Անհավասարակշիռ Էրդողանի հայտարարությունների հետ կապվա՝ Bild-ը գրել է, որ ԵՄ որոշ երկրների կառավարությունների ղեկավարներ ներկա պահին քննարկում են փախստականների գծով Թուրքիայի հետ համաձայնագրի այլընտրանքը, քանի որ նրանք ավելի շատ հիմքեր ունեն համարելու ,որ թուրքական կողմը կարող է խզել գործարքը:

Թերթը հայտնել է, որ եթե Եվրոպայից երես թեքած Էրդողանը դարձյալ բացի սահմանները փախստականների համար, նրանց ընդունման գլխավոր կետը կարող են դառնալ հունական կղզիները, ինչի դեպքում նրանց եւ Հունաստանի մայր ցամաքային հատվածի միջեւ լաստանավային հաղորդակցությունը կդադարեցվի:

«Այդ կղզիներում կքննարկվեն փախստականներին ապաստան տալու հայտերը, եւ հենց այդտեղից կսկսեն հետ ուղարկել հայրենիք նրանց, որոնց մուտքը ԵՄ մերժվելու է: Այդ դեպքում, Թուրքիային խոստացված 6 միլիարդ եվրո գումարը կարող է բաժին հասնել Աթենքին», -ընդգծել է թերթը:

Բրյուսելն ու Անկարան մարտի 18-ին համաձայնագիր են ստորագրել` պայմանավորվելով թուրքական քաղաքացիների համար առանց վիզային ռեժիﬕ, 3 ﬕլիարդ եվրոյի եւ Թուրքիայից ԵՄ սիրիական փախստականների ընդունման դիմաց հետ վերադարձնել Թուրքիայի տարածքով Հունաստան ժամանած բոլոր անլեգալ միգրանտներին:

 

Աղբյուր` Փաստինֆո