Փաստ ինֆո

Մայիսի 5-ին, երբ ռուսաստանյան ԶԼՄ-ները տարածել էին տեղեկատվություն Բրյանսկի մարզի զորամասերից մեկում զինծառայողների նկատմամբ ծաղրուծանակի մասին, ԱՄՆ ռազմաօդային ուժերը հրապարակել են հետաքրքրական փաստաթուղթ, որում տվյալներ են ներկայացվում ամերիկյան բանակում բռնաբարությունների և սեռական նկրտումների դեպքերի մասին:

Ինչպես տեղեկացնում է gazeta.ru-ն, այդպիսի հաշվետվություն ներկայացվում է ամեն տարի, դրանում ներկայացվում են վիճակագրական տվյալներ ոչ պարզապես ոչ կանոնադրական հարաբերությունների դեպքերի, այլև հատկապես սեռական բնույթի հանցագործությունների մասին: Դա պատրաստում է ԱՄՆ պաշտպանության նախարարության կազմում հատուկ ստեղծված գերատեսչությունը՝ Սեքսուալ հանցագործությունների կանխարգելման և հակազդման ծառայությունը (SAPRO):

Այդ ծառայությունը սերտորեն համագործակցում է ուժայի գերատեսչությունների հետ՝ մշակելով բանակում սեքսուալ բնույթի հանցագործությունների կրճատման նոր մեթոդներ:

Վերլուծելով 2015թ.տվյալները, զինվորականները եկել են երկու կարևոր հետևության՝ բռնաբարությունների ընդհանուր թիվը (համենայն դեպս դրանց մասին հաղորդումները) ամերիկյան բանակում կրճատվել է, իսկ արական սեռի զինծառայողների թիվն, ովքեր հայտնել են այդ մասին, հակառակը, ավելացել է:

Հաշվետվության մեջ ասվում է, որ սեքսուալ հարձակումների մասին հայտնող արական սեռի զինծառայողների թիվը վերջին մեկ տարում աճել է  5%-ով:

«Կարծում եմ, մենք առաջընթացի ենք հասել սեքսուալ հանցագործության կանխարգելման հարցում և ճիշտ ուղղությամբ ենք ընթանում, սակայն ես որոշակի չափով բավարարված չեմ կատարված աշխատանքով»,- հայտարարել է Ռազմաօդային ուժերի նախարար Դեբորա Լի Ջեյմսը: «Մենք պետք է ուշադրություն հատկացնենք ու հոգանք զոհերի մասին: Մենք պետք է վստահ լինենք, որ օդուժում ծառայողները՝ տղամարդիկ և կանայք, իրենց հարմարավետ զգան՝ հայտնելով այդ մասին»,- ասել է նա:

Անցած տարում ամերիկյան բանակում բռնաբարությունների մասին բողոքել են 6083 անգամ, ինչը 1%-ով պակաս է 2014թ. ներկայացված բողոքների թվից:

Դրանցից 5240 բողոքները տրվել են գործող զինծառայողներից, 804-ը՝ քաղաքացիական անձանցից կամ ԱՄՆ բանակում ծառայություն չանցնող օտարերկրացիներից, 39-ը՝ անորոշ կարգավիճակի անձանցից: Հետազոտությունները ցույց են տալիս, որ ԱՄՆ բանակում սեքսուալ հարձակման զոհ դառնալու հավանականության վրա ազդում է մարդու տարիքը, ընտանեկան կարգավիճակը և ուրիշ դեմոգրաֆիական գործոններ: Սակայն ավելի հետաքրքրություն է ներկայացնում այլ գործոնների, օրինակ՝ ալկոհոլի դերակատարությունը:

Այսպես, հայտնի է, որ 2014թ. տվյալներով, զոհերի մեկ երրորդը մինչև հարձակման ենթարկվելը ալկոհոլ են ընդունել, իսկ 37% դեպքերում հարբածության վիճակում եղել են իրենք հարձակվողները:

Այդ պատճառով նման հանցագործությունների կանխարգելման նոր մեթոդները պաշտպանության նախարարությունում մեծամասամբ կապում են զինծառայողների կողմից հանգստի և ծառայության ժամանակ ալկոհոլի օգտագործման կանոնակարգման հետ: Կանխարգելման ևս մեկ մեթոդ է նախապատրաստվող հանցագործության ականատեսներ դարձած զինծառայողներին ուղղված կոչը՝  «չանցնել դրա կողքով»: Վիճակագրությունը ցույց է տալիս, որ հարցման ենթարկված զինծառայողների 3%-ը այսպես թե այնպես նման իրավիճակների ականատես է դարձել և նրանց 88%-ը ինչ-որ գործողություններ են ձեռնարկել՝ օգնություն են առաջարկել, մի կողմ են տարել ծառայակիցներին կամ տեղեկացրել են հրամանատարությանը:

Բանակում սեքսուալ բռնության զոհեր դառնում են ինչպես կանայք, այնպես էլ տղամարդիկ: Սակայն ԱՄՆ պաշտպանության նախարարության հաշվետվություններում գենդերային դետալացումը կատարվում է միայն ամեն երկու տարին մեկ անգամ: Այսպես,  2014թ. տվյալներով, ԱՄՆ բանակում բռնության զոհեր են դարձել 10 600 տղամարդ և  9600 կին: Դա կապված է այն բանի հետ, որ ԱՄՆ բանակը 85%-ով կազմված է տղամարդկանցից: Ընդ որում, մասնագետների գնահատականներով, կանանց  38%-ը և տղամարդ զինծառայողների միայն տասը տոկոսն է հայտնում նման միջադեպերի մասին: Պաշտպանության նախարարությունում կոչ են անում զինծառայողներին հայտնել բանակում նկրտումների բոլոր դեպքի մասին՝ չվախենալով հրապարակումից ու ծառայության մեջ խնդիրներից: «Մինչև այն պահը, երբ այն չկրճատվի ու չդառնա տարեկան մեկ դեպք, մենք խնդիր կունենանք»,- պարզաբանել է Ռազմաօդային ուժերում սեռական հանցագործությունների ու դրանց կանխման ծառայության տնօրեն, գնդապետ Մարկ Ռամսին:

Ռուսաստանյան զինվորականները նման հաշվետվություններև չեն կազմում ու չեն հրապարակում:

Հազվադեպ ճեպազրույցների կամ հարցազրույցների ընթացքում զինվորականները հաշվետվություն են ներկայացնում բանակում ոչ կանոնադրական հարաբերությունների վիճակագրության մասին: Այսպես,  2014թ. օգոստոսին Ռուսաստանի պաշտպանության նախարար Սերգեյ Շոյգուն հայտարարել է, որ նման դեպքերի թիվը նվազել է  30%-ով և դրանցով զբաղվում է ստեղծված ռազմական ոստիկանությունը: Այդ կառույցի ղեկավար Իգոր Սիդորկեվիչը այդ ժամանակ նշել էր, որ իր գերատեսչության առաջ խնդիր է կանգնած «որպեսզի բանակ գնացած երիտասարդները հասկանային, որ այնտեղ այնպիսի երևույթ, ինչպիսին ոչ կանոնադրական հարաբերություններն են, դեդովշչինան, պարզապես գոյություն չունի»:

Աղբյուր` Փաստինֆո