Փաստ ինֆո

Կաշառք ստանալու մեջ մեղադրանքում արդարացված, ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի Արմավիրի բաժանմունքի պետ Սահակ Հարությունյանը նախնական ցանկություն է հայտնել իրեն պատճառված նյութական և ոչ նյութական վնասի հատուցման պահանջով դիմել դատարան: Այս մասին «Փաստինֆո»-ին հայտնեց փաստաբան Ինեսսա Պետրոսյանը, ով բոլոր դատական ատյաններում իրականացրել է Սահակ Հարությունյանի պաշտպանությունը եւ ավելացրեց. «Ուստի կդիմենք դատարան»:

Ս.Հարությունյանն առաջին ատյանի  դատարանի դատավճռով մեղավոր էր ճանաչվել ՀՀ քրեական օրենսգրքի 311-րդ հոդվածի 3-րդ մասի 1-ին, 2-րդ և 3-րդ կետերով, այն է՝ մի խումբ անձանց կողմից նախնական համաձայնությամբ, շորթմամբ խոշոր չափերով կաշառք ստանալը և դատապարտվել չորս տարվա ազատազրկման:

Սահակ Հարությունյանի պաշտպան Ինեսսա Պետրոսյանը տևական ժամանակ բարձրաձայնում էր, որ մեղադրանքն անհիմն է, և որ դատաքննությամբ էլ է պարզվել, և որևէ ապացույցով չի հիմնավորվում իր պաշտպանյալին առաջադրված մեղադրանքը՝ տուժողի նկատմամբ համաներման գործընթացը սկսելու համար մի խումբ անձանց կողմից նախնական համաձայնությամբ, շորթմամբ, խոշոր չափերով կաշառք ստանալը:

ՀՀ վերաքննիչ քրեական դատարանը՝ դատավոր Մխիթար Պապոյանի նախագահությամբ, կաշառք ստանալու մեղադրանքում արդարացրել էր ու անմեղ ճանաչել Սահակ Հարությունյանին՝ նրա արարքում հանցակազմի բացակայության հիմքով: Երկու տարուց ավելի կալանքի տակ գտնվելուց հետո նա ազատ էր արձակվել դատարանի դահլիճում:

Վճռաբեկ դատարանը մերժել էր ՀՀ վերաքննիչ քրեական դատարանի հիշյալ որոշման դեմ ՀՀ գլխավոր դատախազի տեղակալ Ա.Հարությունյանի բողոք բերելու բաց թողնված ժամկետը հարգելի համարելու և այն վերականգնելու մասին միջնորդությունը, և վճռաբեկ բողոքը թողնվել է  առանց քննության: Այսպիսով, արդարացման դատական ակտը մտել է օրինական ուժի մեջ:

Լուսանկարում` փաստաբաններ Ինեսսա Պետրոսյանը եւ Կարեն Մեժլումյանը

Աղբյուր` Փաստինֆո