Փաստ ինֆո

Գյումրիում Ավետիսյանների ընտանիքի անդամների դաժան սպանության գործով այսօրվա դատական նիստում հետազոտվել է քննչական փորձարարության արձանագրությունը՝ լուսանկարչական հավելվածով: Միայն արձանագրությունը կազմում է 100 թերթից ավելի:

Քննչական գործողությունը կատարվել է ռուսաստանյան կողմի քննության շրջանակում՝ Ավետիսյանների տան նմանությամբ կառուցվել է մակետ, որտեղ Պերմյակովը մանրամասն նկարագրել է Ավետիսյանների տանը կատարած իր գործողությունները:  Փորձարարության ժամանակ կատարվել է նաև տեսանկարահանում, սակայն ռուսական կողմը հայկական կողմին չի տրամադրել փորձարարության տեսագրությունը:

 Ինչպես «Շանթ» հեռուստաընկերության ուղիղ եթերում նշել է տուժողների իրավահաջորդի ներկայացուցիչ, փաստաբան Լուսինե Սահակյանը, անհասկանալի է, թե ինչու ռուսական կողմը հայկական կողմին չի տրամադրել տեսագրությունը:  «Թե ինչու չի տրամադրվել, արդյոք եղե՞լ են տեխնիկական խնդիրներ, թե՞ ոչ, համենայն դեպս,  քրեական գործում այդ պատասխանը չկա, և ռուսական կողմը այդ տեսագրությունն այդպես էլ հայկական կողմին չի տրամադրել»,- ասել է փաստաբանը՝ հավելելով, որ ամբողջական լինելու համար տեսագրությունը պետք է լիներ:

Ըստ տուժող կողմի ներկայացուցչի, իրենց շատ հետաքրքրում է տեսագրությունը, որովհետև հետաքրքիր է, թե  ինչպես է Պերմյակովը նկարագրում իր գործողությունները: Դա հետաքրքիր է նաև պարզելու համար, թե ցուցմունքներում ամբաստանյալը նկարագրո՞ւմ է, արդյոք,  ճշմարտությունը, թե՞ ոչ: «Եթե տեսագրությունը լիներ, կարծում եմ, մեր հասարակության համար շատ ավելի համոզիչ կլիներ, որովհետև համենայն դեպս լուսանկարչական հավելվածից հստակ երևում է, որ երբ նա նկարագրում է այդ սպանությունները, նրա դեմքին ժպիտ կա և յուրաքանչյուր անգամ, երբ շարունակում է նկարագրել, թե քանի հոգի է սպանել, կարծես նրա մոտ ինքնավստահությունն ավելի է ավելանում»,- ասել է Լ.Սահակյանը: 

Ըստ փաստաբանի, ըստ էության դատավարությունն ամենայն մանրամասնությամբ է ընթացել: Կային միջնորդություններ, որոնք շատ կարևոր էին, այդ թվում՝ այն միջնորդությունները, որոնք տուժող կողմը ներկայացրել է այսօր: Մասնավորապես, կողմը միջնորդել է դատարան հրավիրել ու հարցաքննել այն բոլոր ոստիկաններին ու նաև մարզային ոստիկանության պետին, ովքեր ներկա են գտնվել Պերմյակովի ձերբակալությանը: Ըստ վկաների ցուցմունքների, հայկական կողմն է այդ ոստիկանների ուղեկցությամբ Պերմյակովին տեղափոխել ՌԴ ռազմաբազա:  Փաստաբանը հիշեցրել է, որ շատ բարդություններ առաջացել են հենց այն պատճառով, որ Պերմյակովը հայտնվել է ռուսական կողմում:

«Մենք պետք է հասկանանք, որ վերջին հաշվով յուրաքանչյուր պետություն նաև պարտավոր է կյանքի իրավունքը հարգել և եթե ամենայն մանրամասնությամբ չի քննարկվում սպանության դեպքը, առավել ևս այս պարագայում, երբ որ զինվորն է սպանել, ապա պետության առջև իրավունքի խախտման համար պատասխանատվության հարց կարող է բարձրանալ»,- նշել է Լուսինե Սահակյանը՝ հայտնելով, որ դատարանը ակնհայտ ապօրինի կերպով մերժել է տուժող կողմի այս միջնորդությունը:

Փաստաբանը գտնում է նաև, որ շատ էական կլիներ նաև Պերմյակովի անմիջական հրամանատար Նիկիշինի հարցաքննությունը, Նիկիշինից որևէ նորություն չկա: Նա այն անձն է, ով Պերմյակովին տեղափոխել է Հայաստանի Հանրապետություն: «Մենք գիտենք Պերմյակովի առողջական լուրջ խնդիրների մասին, գիտենք, որ նրան զենք չպետք է տրամադրվեր»,- ասել է Լուսինե Սահակյանն՝ ընդգծելով, որ որպեսզի նման հանցագործությունները չկրկնվեն, պետք է քրեական պատասխանատվության ենթարկվեն նաև այն անձինք, ում թողտվության հետևանքով այս հանցագործությունը կատարվել է:  

Լ.Սահակյանը նշեց, որ Նիկիշինի հետ կապված հարցը փակված չէ և դատարանը կրկին կծանուցի նրան: «Ըստ էության մենք պետք է սպասենք, որ ռուսական կողմն իր մեջ ուժ գտնի, որպեսզի հենց ինքն ապահովի Նիկիշինի ներկայությունը Հայաստանի Հանրապետության դատարանում»,- ասել է փաստաբանը:

Ի պատասխան լրագրողի հարցի՝ Լուսինե Սահակյանը նշել է, որ դեռևս բաց է հարցը, թե Պերմյակովը  որտեղ է կրելու պատիժը: «Չեմ կարծում, որ Հայաստանի Հանրապետությունը կկարողանա հասնել նրան, որ Պերմյակովն իր պատիժը կրի Հայաստանում»,- տեսակետ է հայտնել Լուսինե Սահակյանը:

Աղբյուր` Փաստինֆո