Փաստ ինֆո

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը, դատավոր Արշակ Վարդանյանի նախագահությամբ, քիչ առաջ անպարտ է ճանաչել և արդարացրել դիտավորությամբ մեկ ուրիշին մարմնական վնասվածք կամ առողջությանն այլ վնաս պատճառելու մեջ մեղադրվող Հակոբ Հակոբյանին:

«Փաստինֆո»-ն այդ մասին տեղեկացավ Հակոբ Հակոբյանի պաշտպան Սիրանուշ Հարությունյանից:

Պաշտպանը նաև նշեց, որ Հակոբյանն արդարացվեց, քանի որ վերջինս գործել էր անհրաժեշտ պաշտպանության սահմաններում:

Միևնույն ժամանակ գործով մյուս ամբաստանյալ Արեգ Պետրոսյանը դատապարտվել է 100 000 ՀՀ դրամի չափով տուգանքի:

Նշենք նաև, որ մեղադրող դատախազը, հիմնավորված համարելով նրանց առաջադրված մեղադրանքները, միջնորդել էր Հակոբ Հակոբյանին դատապարտել 100 000 ՀՀ դրամի չափով տուգանքի, իսկ Արեգ Պետրոսյանին՝ 150 000 ՀՀ դրամի չափով տուգանքի:

Ըստ մեղադրանքի՝ Արեգ Պետրոսյանը Երևան քաղաքի Ամիրյան փողոցում «ՍԱՍ» և «Նեքստ» խանութների միջև ընկած հատվածում, ավտոմեքենան կայանելու հարցի շուրջ վիճաբանել է Հակոբ Հակոբյանի հետ, որի ընթացքում բռունցքներով և իր մոտ օրինական կարգով գտնվող «Վոլտրան» տեսակի գազային ատրճանակով մի քանի անգամ հարվածել է վերջինիս գլխին և դիտավորությամբ նրա առողջությանը պատճառել է թեթև վնաս:

 

Հակոբ Հակոբյանին մեղադրանք էր առաջադրվել նշված վայրում ավտոմեքենան կայանելու հարցի շուրջ Արեգ Պետրոսյանի հետ վիճաբանելու համար, որի ընթացքում բռունցքով մի քանի անգամ հարվածել է Պետրոսյանի դեմքին և դիտավորությամբ նրա առողջությանը պատճառել է թեթև վնաս:

Արեգ Պետրոսյանին և Հակոբ Հակոբյանին մեղադրանք էր առաջադրվել ՀՀ քրեական օրենսգրքի 117-րդ հոդվածով և որպես խափանման միջոց էր ընտրվել չհեռանալու մասին ստորագրությունը: