Փաստ ինֆո

Շորթմամբ կաշառք ստանալու մեջ մեղադրվող Վարդուհի Գևորգյանն այսօր հայտարարեց, որ չի ընդունում իրեն առաջադրված մեղադրանքը:

Ըստ մեղադրական եզրակացության, ՀՀ աշխատանքի և սոցիալական հարցերի նախարարության սոցապ պետական ծառայության հիշյալ տարածքային բաժնի պետ Վարդուհի Գևորգյանն իր լիազորությունների շրջանակներում ՀՀ քաղաքացի Գագիկ Գաբրիելյանին կենսաթոշակ նշանակելու համար 2015թ. նոյեմբեր ամսվա կեսերին նույն բաժնի ավագ մասնագետ Մարգարիտա Ստեփանյանի օժանդակությամբ, շորթմամբ քաղաքացուց  պահանջել է 100.000 ՀՀ դրամ կաշառք՝ հակառակ պարագայում սպառնալով ոտնահարել Գ.Գաբրիելյանի՝ 63 տարին լրանալու կապակցությամբ կենսաթոշակ նշանակելու իրավունքը:

Ըստ մեղադրանքի, այդ  դիտավորյալ գործողություններով Գ.Գաբրիելյանի համար սոցցապ բաժնի պետը  ստեղծել է իր օրինական իրավունքների իրականացումը բացառապես կաշառք տալու միջոցով պաշտպանելու համար անհրաժեշտ պայմաններ՝ Գ.Գաբրիելյանին հայտնելով, որ իրեն կաշառք չտալու պարագայում վերջինիս կենսաթոշակը կձևակերպի միայն 65 տարին լրանալուց հետո։

01.12.2015թ. Վարդուհի Գևորգյանն իր աշխատասենյակում Գ.Գաբրիելյանից ստացել է շորթմամբ  պահանջված 100.000 ՀՀ դրամ կաշառքը։

Վարդուհի Գևորգյանն իր այսօրվա ցուցմունքում նշեց, որ քաղաքացին եկել էր ոչ թե թոշակ նշանակելու հարցով, այլ՝ ուրիշ նպատակով: Ամբաստանյալը հայտարարեց, որ փող շորթելու սովորություն ինքը չունի, երբեք մարդկանց վատություն չի անում, եթե կարողանում է, օգնում է:  «Իմ կյանքը հագեցած է եղել մարդկանց օգնելով»,- ասաց նա:

Վ.Գևորգյանը հայտարարեց, որ վեց էջ կազմող գաղտնալսման արձանագրությունում 36 տեղ տուժողը փող է խոստանում, որպեսզի դրդի իրեն ասելու՝ եթե փող չբերես, թոշակ չես ստանա: «Ես տուժողից գումար չեմ պահանջել»,-  ասաց Վարդուհի Գևորգյանը՝ հավելելով, որ այդ տուժողն էր անընդհատ ասում՝ «ես քո լավության տակից դուրս կգամ»: Ըստ ամբաստանյալի, տուժողը փողը բերել է, դրել իր  սեղանին, ասելով՝ «ես իմ խոստումը կատարեցի» ու արագ հեռացել:

Ամբաստանյալը նշեց նաև, որ երբ տուժողի հետ առերես հարցաքննության ժամանակ ինքը նրան ասել է՝ «ի՞նչ Հուդայի գործ արեցիր», տուժողի մեջ փոփոխությունը նկատելի էր, նա դարձել էր ռեմբո, ասում էր՝ «այս երկիրը պե՞տք է դզվի, թե՞ ոչ»:

Տուժողի ու ամբաստանյալի խոսակցությունների ձայնագրության վերաբերյալ որոշ հարցերի ամբաստանյալը չպատասխանեց, հայտարարեց, որ հարցերին կպատասխանի, երբ ձայնագրությունը փորձաքննության ենթարկվի:

Դատական նիստին տուժողը չէր ներկայացել: Մինչ ամբաստանյալի հարցաքննությունն սկսելը պաշտպանական կողմը միջնորդեց դատական նիստը հետաձգել՝ տուժողի ներկայությունն ապահովելու նպատակով: Դատարանը, սակայն, գտավ, որ այս փուլում ծայրահեղ անհրաժեշտություն չկա դատական նիստն անցկացնել նրա ներկայությունը ապահովելուց հետո, քանի որ այս փուլում տուժողի իրավունքն է և ոչ թե պարտականությունը ներկայանալ դատարան: Նախագահող դատավորն ընդգծեց, որ տուժողն արդեն իսկ հարցաքննվել է դատարանում:

Տուժողն իր դատաքննական ցուցմունքում հայտարարել էր, որ բաժնի պետն իրենից հարյուր հազար դրամ է պահանջել թոշակ նշանակելու համար, չի ճարել պահանջվող գումարը, դիմել է Ազգային անվտանգության ծառայությանը:

«Մեր երկիրը վերջիվերջո պե՞տք է դզվի, թե՞ ոչ»,- ասել էր նա:

Բաժնի պետն, ըստ տուժողի ցուցմունքի, իրենից հարյուր հազար դրամ է պահանջել թոշակը ձևակերպելու համար, ինքը սակարկել է, սակայն իրեն ասվել է՝ «բարդ գործ է»,  «տանջված տղա ես, ուրիշների համար թանկ է, քեզ համար՝ հարյուր հազար»:

Աղբյուր` Փաստինֆո