Փաստ ինֆո

Սեփական տատի նկատմամբ ավազակությամբ զուգորդված սպանության փորձ կատարելու մեջ մեղադրվող Արման Կարապետյանի գործով դատական նիստում հարցաքննվեցին վկաներ:

Նրանցից մեկի մոտ ամբաստանյալն աշխատում էր որպես տաքսու վարորդ, պարտաճանաչ վճարումները կատարում էր, դեպքից մեկ օր առաջ էլ վկան տեսել է ամբաստանյալին՝ վերջինս եկել էր մուծումներ կատարելու:

Երկրորդ վկան, տուժող կնոջ հարևանն էր: Ի դեպ, վկան ակնհայտորեն չէր հասկանում «տուժող» բառի իմաստը՝ այդ բառը լսելիս, վկան  թեքվում էր ամբաստանյալի կողմը: Վկան պատմեց, որ տուժող կինը չէր պատասխանել դստեր հեռախոսազանգերին, դուստրն անհանգստացել էր և հարևանների հետ կոտրել էին մոր դռան ապակին ու ներս մտել, լույսերը վառել են ու տեսել մահացած կնոջը, ոստիկանություն զանգահարել: Ըստ վկայի, կնոջ կողքին ջարդած շիշ կար, սակայն կինը վնասվածքներ ունեցե՞լ է, թե՞ ոչ, չի կարող ասել, շատ մոտ չի գնացել: Հարևանը հայտնեց, որ լուսանկարներ է տեսել, որոնց վրա գրված էր՝ «Արման, սրանով չպրծար» ու հայհոյանք կար:

Գործով  կա երեք չհարցաքննված վկա: Նրանցից մեկի մասով, մասնավորապես, նշվեց, որ նա զբաղվում է մարմնավաճառությամբ և նրա հասցեն հայտնի չէ: Այնուամենայնիվ, տեսակետ հնչեց, որ եթե քննիչները նախաքննության ժամանակ նրան կարողացել են գտնել ու հարցաքննել, այժմ ևս չեն վերացել նրան գտնելու հնարավորությունները: Դատարանը որոշեց նրանց բերման ենթարկել:  

Ըստ մեղադրանքի, Արման Կարապետյանի,  04.11.2015թ. ժամը 18։00-ի սահմաններում գնացել է իր տատի տուն և վերջինիս ավազակությամբ զուգորդված սպանելու ուղղակի դիտավորությամբ առաջին հարկի ննջասենյակում հարձակվել ու կյանքի և առողջության համար վտանգավոր բռնություն գործադրելով՝ ջրով լի շշով հարվածել է մահճակալին պառկած տատի գլխին: Դրա հետևանքով կինը սկսել է խռխռալ։ Տեսնելով, որ տատը չի մահացել՝ ջրով լի մեկ այլ ապակյա տարայով ևս մեկ անգամ հարվածել է կնոջ կենսական կարևոր նշանակություն ունեցող մարմնի հատվածին՝ գլխի ձախ գագաթային շրջանին՝ պատճառելով մարմնական վնասվածքներ գլխի սալջարդ վերքի և գլխի մաշկի տակ արյունահավաքի ձևով, ինչի հետևանքով վերջինս կորցրել է գիտակցությունը և անշարժացել։ Կարծելով, որ հարվածների հետևանքով տատը մահացել է, շարունակել է մտադրված հանցավոր գործողությունները՝ հափշտակելով տուժողի 14.000 ՀՀ դրամ արժողությամբ ոսկյա ականջօղերը, 50.000 ՀՀ դրամ գումարը, 10.500 ՀՀ դրամին համարժեք 20 Եվրո գումարը ու հեռացել: Սակայն Արման Կարապետյանի կամքից անկախ հանգամանքներով հանցագործությունն ավարտին չի հասցվել, քանի որ կնոջ մահվան պատճառն եղել է սուր սրտային անբավարարությունը։

Աղբյուր` Փաստինֆո