Փաստ ինֆո

Հարևանուհուն սեռական հարաբերության հարկադրելու մեջ մեղադրվող Պերճը դատապարտվեց 1 տարի ժամկետով ազատազրկման:

Միևնույն ժամանակ Գեղարքունիքի մարզի ընդհանուր իրավասության դատարանի դատավճռով նրա նկատմամբ պատիժը պայմանականորեն չի կիրառվել, քանի որ սահմանվել է 1 տարի ժամկետով փորձաշրջան:

Ինչպես ավելի վաղ տեղեկացրել էինք,  ըստ մեղադրանքի՝ Պերճը, օգտվելով այն հանգամանքից, որ իր հարևանությամբ բնակվող կինը միայնակ է ապրում, վերջինիս շանտաժի է ենթարկել և գույքը վնասելու և ոչնչացնելու սպառնալիքով հարկադրել է սեռական  հարաբերության:

Պերճն իր բջջային հեռախոսահամարով զանգահարել և հաղորդագրություններ է ուղարկել հարևանուհուն՝ սպառնալով, որ գյուղում կտարածի, թե իբրև նա անբարոյական է, սպառնացել է նաև իրենց հարևանությամբ բնակվող մեկ այլ կնոջ տան դռան մոտ գրություն թողնելով՝ «… անբարոյական է, նրա հետ չշփվեն»:

Նախաքննության ընթացքում հաստատվել է նաև, որ Պերճը օրվա տարբեր ժամերի գնալով հարևանուհու տան պատուհանի մոտ, նրան սպառնալիքներ տալով հարկադրել է նահանջել իր սեռական ազատության իրավունքից, ինչպես նաև վնասել է նրա տան բակում եղած ջրի խողովակները, ջրի պոմպը և հողամասը:

Պերճին մեղադրանք է առաջադրվել՝ ՀՀ քրեական օրենսգրքի 140-րդ հոդվածի 1-ին մասով, նրա նկատմամբ որպես խափանման միջոց է ընտրվել չհեռանալու մասին ստորագրությունը:

Առաջադրված մեղադրանքում Պերճը իրեն մեղավոր է ճանաչել մասնակիորեն,  վերջինս ցուցմունք տալով հայտնել է, որ իր բջջային հեռախոսահամարով հարևանուհուն ուղարկած հաղորդագրությունները և հարևանությամբ բնակվող մեկ այլ կնոջ տան դռան մոտ թողած գրությունն ինքն է գրել, որպեսզի հարևանուհին իր տուն չգնա, քանի որ վերջինս գնացել է իր տուն լողացել,  գայթակղող հագուստ հագել:

Ավելին, ըստ Պերճի ցուցմունքի՝ հարևանուհին իրենց տնից պոկ չի եկել, բազմիցս կնոջը ասել եմ, որ հարևանուհու հագ ու կապը իր դուրը չի գալիս: Հայտնել է նաև, որ հարևանուհու տան բակի ջրի խողովակները, հողամասը չի ավիրել, նրա ձեռքից դանակ չի վերցրել և չի դրել նրա կոկորդին և սեռական հարաբերություն ունենալու առաջարկություն չի արել և նման միտք չի ունեցել:

Եթե նման ցանկություն ունենար ապա եղել է պահեր, որ հարևանուհին մենակ իր հետ իր ավտոմեքենայի մեջ է եղել, ոչինչ իրեն չէր խանգարի, որ ինքը իրականացներ իր ցանկությունը:

Տուժող հարևանուհին էլ ցուցմունք տալով հայտնել է, որ Պերճ իր բջջային հեռախոսահամարով զանգահարել և հաղորդագրություններ է ուղարկել իրեն՝  սպառնալով, որ գյուղում կտարածի, թե իբրև ինքը անբարոյական է, եթե իր հետ սեռական հարաբերություն չունենա: Ըստ տուժողի ցուցմունքի՝ իր ամուսինը և որդիներ  գտնվել են ՌԴ-ում՝ արտագնա աշխատանքի:

Տուժողը նշել է նաև, որ Պերճին ասել է, որ այլևս չզանգահարի իրեն, ամոթ է իրենք լավ հարևաններ են և այդպիսի բան այլևս չառաջարկի իրեն, սակայն Պերճ  երեկոյան ժամերին հաճախակի գնացել է իր տան բակ խփել տան պատուհաններին, դռանը և ասել, որ դուռը բացի, մտնի իր տուն և իր հետ սեռական հարաբերություն ունենա՝ չբացելու դեպքում էլ սպառնացել  պատուհանը ջարդել մտնել  տուն  և իր հետ սեռական հարաբերություն ունենալ:

Ըստ տուժողի՝ Պերճը նաև ասել է, որ այդ ամենից հետո էլ իրեն կսպանի և այդ մասին որևէ մեկը չի իմանա: Ռուզաննա Ավետիսյանը դուռը չի բացել և Պերճ Հարությունյանը հեռացել է տան մոտից:  Սեռական հարաբերություն ունենալու համար սպառնացել է նաև, որ գիշերով նրա անասուններին բաց կթողնի գոմից:

Այս ամենից հետո տուժողը ՌԴ-ից հետ է կանչել իր ամուսնուն և այդ ամենի մասին պատմել է նրան և Պերճի կնոջը, վերջինս և նրա դստերը ցույց է տվել նաև ամուսնու ուղարկած հաղորդագրությունները , սակայն նրանք չեն հավատացել, ասել են, որ Պերճը նման բանի ընդունակ չէ և իր տնից գնացել են:

Դատարանը,  Պերճի պատիժը և պատասխանատվությունը մեղմացնող հանգամանք է դիտել այն, որ նախկինում դատված չի եղել, զղջացել է կատարած արարքի համար, խնամքին է գտնվում 3  անչափահաս երեխա, որոնցից մեկի 14 տարին լրացած չէ:

Նշենք, որ տուժող կինը վերաքննիչ բողոք է ներկայացրել՝ պահանջով վերանայել Պերճի վերաբերյալ դատավճիռը և նրա  նկատմամբ նշանակել արժանի պատիժ:

Սակայն տուժողի վերաքննիչ բողոքը մերժվել է, օրինական ուժի մեջ մնալով առաջին ատյանի դատարանի դատավճիռը:

Աղբյուր` Փաստինֆո