Փաստ ինֆո

Կնոջ մահվանը հանգեցրած ընտանեկան բռնության գործով ամբաստանյալ Արտակ Առաքելյանն այսօր հայտարարեց, որ հրաժարվում է իր պաշտպան, հանրային պաշտպան Լյուդվիգ Ավետիսյանի ծառայություններից: Ըստ ամբաստանյալի, ինքը չի վստահում իր պաշտպանին:

Ըստ դատարանի սահմանած ապացույցների հետազոտման կարգի, այսօր դատարանը պետք է անցներ ամբաստանյալի  հարցաքննության փուլին: Ամբաստանյալը հայտարարեց, որ անպայման ուզում է նոր պաշտպան ներգրավել: «Հանրային պաշտպան կվերցնեմ, հետո պաշտպան կվարձեմ»,- ասաց նա:

Դատարանի այն հարցին, թե եթե ֆինանսապես հնարավորություն ունեիք վճարովի հիմունքներով պաշտպան ներգրավել, ինչո՞ւ միջնորդեցիք հանրային պաշտպան ներգրավել, ամբաստանյալը հայտարարեց՝ «ինձնից կախված չէր»:

Դատարանն ամբաստանյալին պարզաբանեց, որ չի կարող ևս մեկ անգամ օգտվել հանրային պաշտպանի ծառայությունից, ապա՝ վճարովի հիմունքներով պաշտպան ներգրավել:

Ամբաստանյալը հայտարարեց, որ ինքը վճարովի պաշտպան կներգրավի:

Դատարանն ամբաստանյալին երկու շաբաթ ժամանակ տրամադրեց պաշտպան ներգրավելու համար այն հաշվարկով, որ նոր պաշտպանը մինչև հաջորդ դատական նիստը ծանոթանա մեկ հատոր կազմող գործի նյութերին:  

իշեցնենք, որ ըստ մեղադրանքի, 27.09.2015թ ժամը 14.00-ի սահմաններում Ա.Առաքելյանը խանդի շարժառիթով և ամուսնական անհավատարմության պատճառով սպանելու դիտավորությամբ իր մոտ եղած որսորդական դանակով բազմաթիվ հարվածներ է հասցրել իր նախկին կնոջ  մարմնի տարբեր մասերին՝ այդ կերպ ապօրինաբար նրան զրկել է կյանքից:

Լրագրողների հետ զրույցում տուժողի իրավահաջորդի ներկայացուցիչ, փաստաբան Սեդա Սաֆարյանը նշեց, որ ամբաստանյալի՝ պաշտպանից հրաժարվելու պատճառն երևի այն էր, վերջինս չի մասնակցել գույքի բաժանման գործընթացին: Փաստաբան Լ.Ավետիսյանը երևի  պատճառաբանել է, որ ինքը ներգրավված է միայն քրեական գործով պաշտպանություն իրականացնելու համար: Ըստ Ս.Սաֆարյանի, հանրային պաշտպանը պարտավոր չէր ներկայանալ գույքի բաժանմանը:

Ինքը՝ Սեդա Սաֆարյանը, նույնպես գնացել է գույքի բաժանմանը զուտ մարդկային առումով՝  տուժողի երեխաների շահերից ելնելով: «Բայց ես քաղաքացիական գործով կողմ չեմ, առնչություն չունեմ»,- հավելեց փաստաբանը:

Ամբաստանյալի ու նրա հոր կողմից, ըստ Սեդա Սաֆարյանի, մի քանի օր առաջ գույքի բաժանման վերաբերյալ խնդիր էր դրվել:

Մենք ասում էինք՝  տանք երեխաներին՝ մի քանի կտոր գույք է, ամբաստանյալն ու հայրն ասացին, որ գույքը պետք է բաժանվի:  Ես գտնում եմ, որ մանր մարդկանց հետ գործ ունենք»,- նշեց տուժողի իրավահաջորդի ներկայացուցիչը՝ ընդգծելով, որ  հակառակ կողմը պահանջում էր, որպեսզի անգամ լոսկուտներն առգրավվեն ու արձանագրվեն:

«Ուզում եմ սահմանազատել քրեական գործը գույքի բաժանումից, բայց վերջինիս ժամանակ իրենց ամբողջի դեմքը տեսնում եմ և հավատում եմ, որ այո՛, չնչին առիթը, պատրվակն  օգտագործեն ու   մարդ սպանեն»,- ասաց Սեդա Սաֆարյանը:

Լուսանկարում՝ Լյուդվիգ Ավետիսյանը