Փաստ ինֆո

Ես մնում եմ այն համոզմունքի կողմնակիցը, որ, բոլոր դեպքերում, ժամանակակից պատերազմների համար զորակոչային բանակներն արդեն հնացած են ու շատ դեպքերում ի վիճակի չեն կատարել իրենց առջև դրված պարտականությունները: Այդ մասին ֆեյսբուքյան իր էջում գրառել է փաստաբան Նորայր Նորիկյանը:

Գրառման մեջ մասնավորապես նշվում է.

«Հիմնական պատճառն այն է, որ պրոֆեսիոնալ բանակներն ավելի արդյունավետ են կատարում իրենց պարտականությունները, քանի որ ժամանակակից բարդ ռազմական սարքավորումներից օգտվելու համար պահանջվում են ավելի շատ գիտելիքներ և ճշգրտություն, ինչին պրոֆեսիոնալ ծառայողները կարող են հասնել միայն տարիների ուսուցման և պրակտիկայի արդյունքում։

Այժմ ուսումնասիրում եմ պարտադիր զինվորական ծառայության զորակոչից ուսումը շարունակելու համար տրվող տարկետումը վերացնելու և 18 տարին լրացած և զինվորական ծառայության համար պիտանի ճանաչված արական սեռի բոլոր քաղաքացիներին զորակոչելու հարցը և առաջիկա օրերին առավել ծավալուն կներկայացնեմ իմ պատկերացումներն այդ հարցի կապակցությամբ:

Անկեղծ ասած` դեմ եմ սխալը մեկ այլ սխալով «ուղղելու» կամ այս կամ այն խնդիրը շտկելու փոխարեն առավել մեծ խնդիր ստեղծելու գաղափարին:

Մեր բանակին ոչ թե քանակ է պետք, այլ որակ:

Չեմ կասկածում, մեր զինված ուժերի ապագան ինտելեկտուալ, գիտելիքի հիման վրա կառուցված բանակի կայացումն է, որը պետք է դրսևորվի պրոֆեսիոնալ բանակի տեսքով…

Այսպես դասեր չեն քաղում: Ճիշտ ժամանակն է, որ ռազմավարական փոփոխության ենթարկվի զինված ուժերի համալրման համակարգն ամբողջությամբ և արագ, հաստատուն տեմպերով սկսվի պրոֆեսիոնալ բանակի ներդրման գործընթացը:

Միայն այդ դեպքում մենք կստեղծենք ժամանակի այն մարտունակ բանակը, որը պատրաստ կլինի դիմագրավել ու հաղթահարել մեզ սպառնացող մարտահրավերները:

Վստահ եմ` ունենք բոլոր ռեսուրսները, ընդամենը դրանց ռացիոնալ օգտագործման կամքն է բացակայում:

Թող ոչ ոք չփորձի համոզել, որ բանակի թերությունները գտնվում են ուսումը շարունակելու համար տրվող տարկետման իրավունքի գոյության մեջ:

Պետք չէ փորձադաշտ դարձնել այս լուրջ ինստիտուտները` կասկածի տակ դնելով թե՛ բանակի մարտունակությունը, թե՛ բարձրագույն կրթության համակարգը»:

Աղբյուր` Փաստինֆո