Փաստ ինֆո

«Ժողովուրդ»-ն անդրադարձել է  Լևոն Դոխոլյանի՝ իր ֆեյսբուքյան էջում Արցախին ուղարկված օգնության ճակատագրի վերաբերյալ գրառմանը:

Թերթի մեկնաբանմամբ՝ Հայաստանում արդեն ավանդույթ է դարձել, որ ներկա և նախկին իշխանությունների մաս կազմող գործիչները, առանց իրենց հաշիվ տալու, հայտարարություններ են հնչեցնում։ Ի դեպ, կապ չունի՝ նրանք տվյալ պահին շարունակում են իշխանության ներկայացուցիչ լինել, թե ընդդիմադիր խաղալու «սեզոնում» են։

միաժամանակ թերթը մեջբերում է պատգամավորի գրառումը. «Միջնորդ օղակները հավաքում են ֆիզիկական կամ իրավաբանական անձանցից տարաբնույթ օգնությունները, ամբողջը ուղարկում են իրենց կողմից և համապատասխան գումար դուրս գրում իրենց բյուջեից։ Օգնությունները վաճառվում են Հայաստանի կամ Արցախի խանութներում»։

Ոստիկանությունը պատգամավորի հայտարարությանն անմիջապես ընթացք է տվել և սկսել նյութեր նախապատրաստել։ Իսկ երբ պատգամավորին խնդրել են իր հայտարարության հիմքում դրված փաստերը ներկայացնել, նա իրավապահներին պատասխանել է, թե ուրիշներից է լսել, փաստեր չունի։

«Այսինքն՝ Աժ պատգամավորը, որը ժողովրդի «ընտրյալն» է, իրեն թույլ է տալիս խոհանոցային բամբասանքներ տարածել և չհիմնավորել դրանք։ Ու ՀՀ գլխավոր դատախազությունը ստիպված է լինելու նյութերի նախապատրաստան արդյունքում քրգործի հարուցումը մերժել։ Դժվար թե բանը հասնի սուտ մատնության։ Ու կատարվածն առավել քան նողկալի է, քանի որ դրանով փորձ է արվել սևացնել Արցախի համար օգնություն հավաքագրելու ողջ գործընթացը՝ իր արարքը ներկայացնելով փիս «ընդդիմադիր» շապիկի ներքո դրսևորված սրտացավություն։ Ի դեպ, Դոխոլյանից մեկնաբանություն ստանալու «Ժողովուրդ»–ի բոլոր փորձերն անցան ապարդյուն»,–գրում է թերթը։

Հոդվածն ամբողջությամբ կարող եք կարդալ «Ժողովուրդ» օրաթերթի՝ 30.04.16թ. համարում:

Լուսանկարում՝ ԱԺ պատգամավոր Լևոն Դոխոլյանը