Փաստ ինֆո

Գյումրիում տեղակայված ՌԴ ռազմաբազայի տարածքում այսօր շարունակվում է Ավետիսյանների ընտանիքի անդամների դաժան սպանության գործով դատաքննությունը:

Նախաքննական առաջին ցուցմունքներում գործով միակ ամբաստանյալ, ՌԴ ռազմաբազայի զինծառայող Պերմյակովը որոշ հանգամանքների շուրջ սուտ ցուցմունքներ է տվել, որոնք հետագայում հերքվել են: Ըստ «Շանթ» հեռուստաընկերության, այդ մասին պարզ է դարձել Ավետիսյանների սպանության գործով այսօրվա դատական նիստում:

Մասնավորապես, սկզբում նա նշել է, որ փոքրիկ Սերյոժա Ավետիսյանին հարվածել է սվին-դանակով, քանի որ ինքնաձիգը խափանվել է: Մինչդեռ փորձաքննություններով պարզվել է, որ ինքնաձիգը սարքին է եղել:

Պերմյակովը հակասական ցուցմունքներ է տվել նաև փոքրիկ Հասմիկի սպանության վերաբերյալ. նախ նա նշել է, որ երեխայի վրա կրակել է, ապա ասել է, որ դանակով է հարվածել:

Պերմյակովն իր ցուցմունքներում առկա հակասությունները ոչ մի կերպ չի բացատրում:

Դատարանն ավարտել է Պերմյակովի նախաքննական ցուցմունքների հրապարակումը: Ի պատասխան դատավարության մասնակիցների հարցերի՝ Պերմյակովը հայտարարել է, թե չի հիշում, թե ինչպե՞ս է հայտնվել Հայաստան ուղարկվող զինվորների թվում: Հայտարարել է նաև, որ հայ-թուրքական պետական սահմանը հատելու մտադրություն ինքը չի ունեցել:  

«Արﬔնպրես» գործակալության փոխանցմամբ, Պերմյակովի նախաքննական ցուցմունքների հրապարակումից հետո ի պատասխան մեղադրողի հարցի, թե արդյոք այս ցուցմունքները տալու ժամանակ Պերմյակովի նկատմամբ բռնություն կամ սպառնալիք կիրառվե՞լ է, ամբաստանյալը բացասական պատասխան է տվել: Ամբաստանյալը հայտարարել է, որ ինքն իրեն ﬔղավոր է ճանաչում ներկայացված բոլոր ﬔղադրանքում: Նա հայտնել է նաև, որ ինքն այդ աﬔնը կատարել է ﬕայնակ:

Պերմյակովը հայտնել է, որ իր ընկերների ﬔջ եղել են նաև հայեր և նրանց հետ ինքը նորմալ հարաբերություններ է ունեցել:

Պերմյակովը հրաժարվել է բացատրել իր դաջվածքի իմաստը, իսկ «Օդնոկլասսնիկի» սոցցանցում գրառուﬓերի մասին Պերմյակովը հայտարարել է. «Դրանք իմ գրառուﬓերը չեն»:

Ըստ Պերմյակովի, ինքը տեղյակ չի եղել, որ ծառայության ընթացքում երեք ամսով զենք կրելու իրավունք չի ունեցել, ինչպես նշված է եղել քրեական գործում:

Դասալքության պատճառների, զենքով դասալքություն կատարելու վերաբերյալ հարցերին ամբաստանյալը հրաժարվել է պատասխանել:

Պերմյակովը հայտնել է, որ չի կարող նկարագրել Ավետիսյանների տան ճանապարհը, քանի որ չի հիշում: Ըստ նրա, ինքը չի հիշում նաև, թե ինչպե՞ս է մտել Ավետիսյսնների տուն: Ամբաստանյալը չի պատասխանել նաև այն հարցին, թե ինչո՞ւ է մտել հենց Ավետիսյանների տուն:

Ավետիսյանների տունն ու իր գործողությունները նկարագրելու մասին փաստաբան, տուժող կողմի ներկայացուցիչ  Լուսինե Սահակյանի հարցին ի պատասխան` ամբաստանյալը նշել է. «Չեմ ուզում և չեմ կարող պատասխանել»:

Դատարանի դահլիճում իրեն ուղղված հարցերին Պերմյակովը հիﬓականում պատասխանում էր. «Չեմ հիշում, չեմ կարող պատասխանել»:

Լուսանկարը՝ Ֆոտոլուրի