Փաստ ինֆո

Երբ Վալերի Պերմյակովը հարցերին  պատասխանում էր կամ փորձում էր դրանց մեջ խուսանավել,  ակնհայտ էր դառնում, որ գործ ունենք անգամ դատարանում կայանալու խնդիր լուծող մի անձնավորության հետ: Այս մասին «Շանթ» հեռուստաընկերության հետ հարցազրույցում նշել է Գյումրիում Ավետիսյանների սպանության գործով տուժողների իրավահաջորդի ներկայացուցիչ, փաստաբան Երվանդ Վարոսյանը: Փաստաբանն ընդգծել է, որ «գործ ունենք մի մարդու հետ, որից ամեն ինչ սպասելի է, ամեն ինչ, ու զարմանալի է, որ նա ոչ միայն ծառայել է բանակում, այլ տեղափոխվել է ծառայության Գյումրի, նա ունեցել է հրազեն, հնարավորոթյուն է ունեցել հրազենով փախուստի դիմել, հայտնվել Գյումրի քաղաքում»:     

Ըստ փաստաբանի, ամբաստանյալը մի կողմից  կարևոր հարցերից խուսափում էր, սակայն մյուս կողմից կարող էր կենտրոնանալ այնպիսի հարցերի վրա, որոնք վերաբերվում էին «Օդնոկլասնիկի» ցանցում իր գրագրությանը և այնտեղ պատմած ինչ-որ հեքիաթներին:

«Դրա վրա կենտրոնանում էր, փորձում էր խուսափել սուտասանի պիտակից: Շատ հետաքրքիր էր իր կերպարն ի վերջո հասկանալու համար, թե ում հետ գործ ունենք»,- հավելել է Ե.Վարոսյանը:

Փաստաբանը շատ կարևոր է համարում, որ ի վերջո « այդ անձը խոսեց, մենք ուզում էինք, որ դա տեղի ունենա, անգամ եթե իր պատասխանները հիմնականում սահմանափակվում էին «չեմ հիշում» կամ «չեմ ուզում ասել»  արտահայտություններով»:

Ե.Վարոսյանը նշել է, որ գործում ներգրավված փաստաբանների համար Պերմյակովի այսօրվա հարցաքննության մեջ գուցեև նորություն չկար, որովհետև իրենք դիտել են  նախաքննության ժամանակ նրա բոլոր հարցաքննությունների տեսագրությունները, ուսումնասիրել  նրա վերաբերյալ նշանակված փորձաքննությունների եզրակացությունները: Սակայն կարևոր է, որ հանրությունն՝ ի դեմս ներկա լրագրողների, հնարավորություն է ունեցել հասկանալու, թե «ում հետ գործ ունենք»: Փաստաբանը նշել է, որ տվյալ պարագայում իրավական առումով խիստ կարևոր է ոչ թե այն, թե ո՞վ է նա, այլ այն, թե ինչպե՞ս կարող էր նման հոգեբանական իրավիճակում գտնվող անձը հրազենը ձեռքին հայտնվել Գյումրի քաղաքում:

Ե.Վարոսյանը Պերմյակովի նախաքննական ցուցմունքներում առկա հակասությունները պայմանականորեն բաժանել է երկու մասի՝ ստեր, որոնք նա հորինել է այդպես էլ անհասկանալի պատճառներով և հանգամանքների վերաբերյալ իրականությունից տարբերվող իր ընկալումները:

Ստերի շարքում է, մասնավորապես,  սպանությունից հետո ինչ-որ տաքսիստի զանգահարելու մասին Պերմյակովի ցուցմունքը, հեռախոսազանգերի վերծանումներով հերքվելուց հետո ամբաստանյալը ստիպված ասել է, որ պարզապես խաբել է:

Իսկ ընկալումների շարքում է ստի դետեկտորով Պերմյակովի պնդումն առ այն, որ իրոք հավատում է, որ տեղի է ունեցել այսպես, թեև «մենք գիտենք, որ իրականում այդպես տեղի չի ունեցել»:

Ե.Վարոսյանը չի կարծում, որ Պերմյակովն իրոք չէր հիշում այն ամենը, ինչի մասին ասում էր, որ չի հիշում: Իրականում փաստաբանը տպավորություն ունի, որ նա երբեմն ալարում էր պատասխանել:  Երբ հարցերը մեկ նախադասությունից ավելի երկար էին լինում, Պերմյակովը թարգմանչին մի երկու անգամ դիմում էր, որ նա իր համար նորից թարգմանի, որ հասկանալի լինի: Երբեմն քմծիծաղ էր տալիս, ինքն իր ասածից ուրախանում էր, երբ ասում էր՝ «չեմ հիշում» կամ «չեմ ուզում հիշել» և այլն: «Ես դա կապում եմ բացառապես իր հոգեբանական վիճակի հետ, ոչ թե չհիշելու»,- նշել է փաստաբանը:

Տուժող կողմի ներկայացուցիչն արձանագրել է, որ Պերմյակովը պատասխանել է, որ թողել է ծառայության վայրը, թողել է զենքով, ի վերջո ստիպված է եղել ընդունել, որ զինվորական համազգեստով է եղել, «որի մասին չգիտես ինչու փորձում էր ասել, որ չի հիշում, թե ինչ հագուստով է եղել»: Արդյոք քաղաքացիական հագուստո՞վ էիր փաստաբաններից մեկի հարցին Պերմյակովը քմծիծաղ տալով ասել է, որ «ոչ, ծառայության մեջ էի, զինվորական համազգեստով էի»:

Ըստ Ե.Վարոսյանի, ամբաստանյալն ըստ էության  ամեն ինչ պատմում էր: Սակայն երբ փորձ էր արվում մանրամասնել, փաստաբանի տպավորությամբ, Պերմյակովը փորձում էր ճիգ չգործադրել ինչ-որ բան վերհիշելու, հստակ ներկայացնելու կամ երկար-բարակ խոսելու, քմծիծաղ տալով փորձում էր ամեն ինչ կարճացնել:

Ե.Վարոսյանը լուրջ չի վերաբերվում զղջալու մասին Պերմյակովի արտաբերած խոսքերին: Փաստաբանը դժվարանում է հավատալ, որ Պերմյակովն իրոք հասկանում է «զղջալ» բառի իմաստը և որ նա հասկանում է՝ ի՞նչ ասել է զղջալ: Ըստ տուժող կողմի ներկայացուցչի, եթե իրոք Պերմյակովը զղջում է, ապա ինչո՞ւ երբ իրեն առաջարկեցին որևէ կերպ դիմել Ավետիսյանների  հարազատներին, նա ասաց, որ ոչինչ չունի ասելու:

«Անհասկանալի է, եթե դու իրոք զղջում ես, զղջման խոսքեր պետք է ասես՝ ուղղված հարազատներին»,- տեսակետ է հայտնել Երվանդ Վարոսյանը:

Միաժամանակ տուժող կողմի ներկայացուցիչը  նշել է, որ Պերմյակովն, իր կարծիքով,  իրոք անկեղծ էր, երբ ասում էր՝ եթե հնարավորություն ունենայի ժամանակը ետ պտտելու, այդ ամենը տեղի չէր ունենա: «Այդ պահին նա լուրջ էր խոսում»,- ընդգծել է Երվանդ Վարոսյանը:

Աղբյուր` Փաստինֆո