Փաստ ինֆո

Թուրքիայի նախագահի հայտարարությունը խոստովանություն է առ այն, որ Հայոց ցեղասպանությունից հարյուր տարի անց էլ Թուրքիայի ղեկավարության մտածելակերպը չի փոխվել: Այս մասին, ի պատասխանը Tert.am լրատվական կայքի հարցի, թե ինչպե՞ս կմեկնաբանեք Թուրքիայի նախագահի վերջին հայտարարությունը, ասել է ԱԳ նախարարի տեղակալ Շավարշ Քոչարյանը:

«Թուրքիայի նախագահը փորձում է սպառնալ Հայաստանին՝ կապակցելով Թուրքիայում բնակվող հայության կախվածությունը երկրի իշխանություններից և այս տարվա ապրիլի 24-ին արված իր ժխտողական հայտարարությունը:

Ըստ այդ հայտարարության՝ Ադրբեջանը նման չէ ոչ հարևան պետություններին, ոչ էլ Ուկրաինային: Մնում է ավելացնել, որ Ադրբեջանը իր այլատյացությամբ, ապակայունության և արյունահեղության ալիք տարածելու մոլուցքով ու ցեղասպան մոտեցումներով նման է և նույնական մեկ պետության՝ Թուրքիայի հետ:

Թե Անկարայի, թե Բաքվի նմանատիպ ջղաձիգ հայտարարություններն արտահայտությունն են իրենց ռասիստական քաղաքականության արդյունքում միջազգային ասպարեզում խորը մեկուսացման մեջ հայտնվելու սարսափի»,-ընդգծել է Շ.Քոչարյանը: 

Նշենք, որ Թուրքիայի նախագահ Ռեջեփ Թայիփ Էրդողանը Խորվաթիայում լրագրողների հետ զրույցում, անդրադառնալով ՀՀ նախագահ Սերժ Սարգսյանի այն հայտարարությանը, թե Հայաստանը պատրաստ է պատերազմի, ասել է. «Հայաստանը կրակի հետ է խաղում: Թուրքիայում 100 հազար հայ կա: Նրանց կեսը Թուրքիայի քաղաքացիներ չեն: Կացության իրավունք չունեցողներին էլ ենք հանդուրժում: Նրանց անշարժ գույքն էլ վերադարձրեցինք: Ապրիլի 24-ին էլ ուղերձ հղեցինք: Մենք ցույց ենք տալիս, որ բարի նպատակներ ունենք»:

Ապա, անդրադառնալով ղարաբաղյան հիմնախնդրին, Թուրքիայի նախագահը, պնդել է, թե հակամարտության գոտում Ադրբեջանը և Իլհամ Ալիևը գնալով ուժեղանում են իրենց դիրքերը, իսկ Ռուսաստանն Հայաստանին օգնություն ցույց չի կարողանում ցույց տալ, քանի որ Ադրբեջանի հետ ընդհանուր շահեր ունի:

«Ադրբեջանը նման չէ իր շրջակա երկրներին՝ ոչ Վրաստանին, ոչ էլ Ուկրաինային: Ռուսաստանը նույնիսկ Ոկրաինայում չկարողացավ իր ուզած արդյունքին հասնել:  Միայն թե Ղրիմում կարողացավ հաջողության հասնել, քանի որ այնտեղ թաթար բնակչությունը քիչ էր: Ռուսաստանը սխալ է անում»:

Աղբյուր` Փաստինֆո