Փաստ ինֆո

Քաղաքացի Հայրապետ Բաբայանի հայցն ընդդեմ «Միքայելյան վիրաբուժական ինստիտուտ» ՓԲԸ-ի՝ Արաբկիր Քանաքեռ-Զեյթուն վարչական շրջանների ընդհանուր իրավասության դատարանը մերժել է:

Ինչպես «Փաստինֆո»-ն ավելի վաղ տեղեկացրել էր Հայրապետ Բաբայանը, պատասխանողից՝ «Միքայելյան վիրաբուժական ինստիտուտ» ՓԲԸ-ից, պահանջում է  հօգուտ իրեն բռնագանձել պատասխանողին վճարած 450 000 ՀՀ դրամ գումարը և 4058 եվրո:

Մասնավորապես,  հայցապահանջի հիմքում դրվել է այն, որ տվյալ ԲԿ-ի վիրաբույժ  Արմեն Հարությունյանը հայցվորին պատշաճ բժշկական ծառայություն չի մատուցել, և հայցվորը ստիպված է եղել դիմել այլ բժշկական կազմակերպություն` վճարելով լրացուցիչ գումարներ, կրել է գույքային վնաս:

Բանն այն է, որ դեռևս 2013թ. հոկտեմբերի կեսերին հայցվոր Բաբայանը, գանգատվելով որովայնի սուր ցավերից,  դիմել է «Միքայելյան վիրաբուժական ինստիտուտ», որտեղ նրան վիրահատել են՝ հեռացնելով լեղապարկը և դրանում առկա քարերը:  

Սակայն վիրահատությունից  2 ամիս անց` Գերմանիա մեկնումից 3 օր առաջ, բժիշկ Արմեն Հարությունյանը հեռացրել է վիրահատությունից հետո տեղադրված դրենաժը` նրան վստահեցնելով, որ ամեն ինչ նորմալ է: Գերմանիա հասնելու հաջորդ օրը Բաբայանի մոտ սկսվել են ցավեր և նորից վիրահատվել է, այս անգամ նրա լեղածորանից հեռացվել է քարեր, ինչի համար նա վճարել է 4085 եվրո:

Պատասխանող կողմը՝ ի դեմս բժիշկ Արմեն Հարությունյանի, գտնում է, որ ինքը և իր թիմն աշխատանքը շատ լավ են կատարել և որ հիվանդն առողջացած դուրս է գրվել` առանց ցավերի:

Ավելին, պատասխանողը կասկածի տակ  է դնում  Գերմանիայում կատարված վիրահատության մասին հայցվորի պնդումներն ու ներկայացրած փաստաթղթերը:

Դատարանը՝  նախագահող Սիմիզար Հովսեփյանի, իր իրավական վերլուծություններում նշել է, որ պատասխանողի կողմից հայցվորին առաջարկվել է վիրահատական բուժում, հայցվորը և նրա կինը տվել են իրենց համաձայնությունը, և ըստ բժշկական փատաթղթերի` պատասխանողի կողմից պատշաճ կատարվել են ստանձնած պարտավորությունները, հետվիրահատական ընթացքը եղել է հարթ, վերքերը լավացել են առաջնային ձգումով:

18.11.2013 թվականին հիվանդը բաժանմունքից դուրս է գրվել առողջացումով:

Քաղաքացու պնդմամբ` «Միքայելյան վիրաբուժական ինստիտուտ»-ում իրեն պատշաճ բժշկական ծառայություն չի մատուցվել

 

Գործով նշանակված դատաբժշկական հանձնաժողովային փորձաքննության համաձայն՝ «Միքայելյան վիրաբուժական ինստիտուտ» ՓԲԸ-ի անձնակազմի և վիրաբույժ  Ա.Հարությունյանի կողմից Հայրապետ Բաբայանի հետազոտումը և բժշկական միջոցառումները, վիրահատությունը կատարվել են ճիշտ, լրիվ ծավալով:

Հայրապետ Բաբայանի մոտ ընդհանուր լեղածորանում եղած քարերը հեռացվել են վիրահատական միջամտության ժամանակ: Ըստ հիվանդության պատմագրի կրկնակի ստուգումով պարզվել է, որ այնտեղ մնացորդային քարեր չկան:

Բացի այդ ըստ եզրակացության՝ «Միքայելյան վիրաբուժական ինստիտուտ» ՓԲԸ-ի անձնակազմի և վիրաբույժ Ա.Հարությունյանի կողմից հետազոտությունները, բուժումները կատարվել են լրիվ ծավալով, պատշաճ կարգով և Հ.Բաբայանի առողջությանը վնաս չի պատճառվել:

Այսպիսով, դատարանը, գործում առկա ապացույցների բազմակողմանի և օբյեկտիվ վերլուծության արդյունքում հիմնավորված է համարել, որ  պատասխանողի գործողություններում բացակայում են վնասի հատուցման համար պարտադիր պայման հանդիսացող վերը նշված տարրերի, այն է` իրավունքը խախտած անձի` տվյալ դեպքում պատասխանողի ոչ օրինաչափ վարքագծի, վնասների ու պատասխանողի ոչ օրինաչափ գործողության միջև պատճառահետևանքային կապի և պատասխանողի մեղքի առկայությունը:

Դատարանը գտնել է, որ հայցվորը չի ապացուցել իր կողմից վկայակոչված փաստերը ուստիև ներկայացված հայցն անհիմն է, և ենթակա մերժման: